ກົມໂຄສະນາ ຄອສພ ໄດ້ຈັດພິທີເລື່ອນສະມາຊິກສຳຮອງຂຶ້ນສົມບູນ
ຕອນເຊົ້າຂອງວັນທີ 21 ມັງກອນ 2021 ທີ່ຜ່ານມາ ກົມໂຄສະນາ ຄະນະໂຄສະນາອົບຮົມສູນກາງພັກ ໄດ້ຈັດພິທີ່ເລື່ອນສະມາຊິກພັກສຳຮອງຂຶ້ນ ເປັນສະມາຊິກພັກສົມບູນ, ໂດຍການໃຫ້ກຽດເປັນປະທານຂອງ ທ່ານ ນາງ ບົວລີ ບັນຊາລິດ ຄະນະພັກ, ເລຂາໜ່ວຍພັກ ກົມໂຄສະນາ; ມີຜູ້ຕ່າງໜ້າຈາກບັນດາໜ່ວຍພັກອ້ອມຂ້າງ ຄອສພ ແລະ ພະນັກງານສະມາຊິກພັກສົມບູນ ແລະ ສຳຮອງ ພາຍໃນໜ່ວຍພັກເຂົ້າຮ່ວມທັງໝົດ 20 ກວ່າສະຫາຍ.
ໃນພິທີ່ດັ່ງກ່າວ ທ່ານ ນາງ ພວງມາລີ ອັກຄະມູນຕີ ຮອງເລຂາໜ່ວຍພັກ ໄດ້ຂຶ້ນຜ່ານມະຕິຕົກລົງສະບັບເລກທີ 01/ຄພ.ຄອສພ ລົງວັນທີ 07/ 01 / 2021 ວ່າດ້ວຍການອະນຸມັດເລື່ອນສະມາຊິກພັກສຳຮອງເປັນສະມາຊິກພັກສົມບູນ ຈຳນວນ 04 ສະຫາຍ ທີ່ໄດ້ຜ່ານການຝຶກຝົນຫຼໍ່ຫຼອມທາງດ້ານຄຸນທາດການເມືອງຄຸນສົມບັດສິນທຳປະຕິວັດ ເປັນໄລຍະເວລາໜຶ່ງປີເຕັມ.
ຈາກນັ້ນ ທ່ານ ນາງ ບົວລີ ບັນຊາລິດ ກໍ່ໄດ້ມີຄຳເຫັນໂອ້ລົມຕໍ່ສະມາຊິກພັກສົມບູນໃໝ່ທັງ 4ສະຫາຍໂດຍເພີ່ນໄດ້ກ່າວວ່າ: ພວກສະຫາຍທັງ 4 ແມ່ນໄດ້ມີຄວາມບຸກບື່ນຫ້າວຫັນໃນການຈັດຕັ້ງປະຕິບັດໜ້າທີ່ວຽກງານດ້ານວິຊາສະເພາະ ແລະ ບັນດາວຽກງານອື່ນໆ ທີ່ການຈັດຕັ້ງມອບໃຫ້ຢ່າງມີຜົນສຳເລັດ. ສະນັ້ນ ມັນໄດ້ພິສູດໃຫ້ເຫັນແຈ້ງວ່າ ພວກສະຫາຍມີຄວາມບຸກບືນ, ຝຶກຝົນຫຼໍ່ຫຼອມຕົນເອງໃຫ້ກາຍເປັນສະມາຊິກພັກທີ່ສາມາດເຮັດໜ້າທີ່ນຳພາໃນຕໍ່ໜ້າ, ຈຶ່ງສາມາດນຳສະເໜີໃຫ້ເລື່ອນເປັນສະມາຊິກສົມບູນຂອງ ພັກປະຊາຊົນປະຕິວັດລາວ ແລະ ຂໍຮຽກຮ້ອງໃຫ້ສະມາຊິກພັກສົມບູນໃໝ່ທັງ 4 ສະຫາຍຈົ່ງພ້ອມກັນ ຮັກສາມູນເຊື້ອທີ່ເຮັດໄດ້ດີທີ່ຜ່ານມາ ແລະ ຈົ່ງຢືດໝັ້ນໃນ 7 ໜ້າທີ່ ແລະ 11 ຂໍ້ຫ້າມທີ່ມະຕິກອງປະຊຸມໃຫຍ່ຄັ້ງທີ່ຜ່ານມາໂດຍສະເພາະມະຕິກອງປະຊຸມໃຫຍ່ຄັ້ງທີ X ແລະ XI ຂອງພັກວາງອອກ. ພ້ອມກັນນັ້ນ ກໍຈົ່ງຕັ້ງໜ້າຝຶກຝົນຕົນເອງໃນການຊອກຮູ້ຮ່ຳຮຽນບັນດາມະຕິຄຳສັ່ງ, ທິດສະດີມາກ-ເລນິນ, ແນວຄິດໄກສອນ ພົມວິຫານ ແລະ ພາສາຕ່າງປະເທດ ໃຫ້ເລີກເຊິ່ງກວ້າງຂວາງຕື່ມອີກ.
ໂດຍ: ຜ.ຜົນບຸນ
