ກອງປະຊຸມສະຫຼຸບຖອດຖອນບົດຮຽນວຽກງານອົບຮົມປະຈໍາປີ 2020
ໃນຕອນເຊົ້າຂອງວັນສຸກ ວັນທີ 26 ກຸມພາ 2021 ກົມອົບຮົມ ໄດ້ຈັດກອງປະຊຸມສະຫຼຸບຖອດຖອນບົດຮຽນຂຶ້ນ ໂດຍການເປັນປະທານຂອງ ທ່ານ ຄໍາເຄນ ຈັນທະວົງ ຫົວໜ້າກົມອົບຮົມ, ມີຄະນະກົມຄະນະພະແນກ ແລະ ພະນັກງານວິຊາການທັງໝົດຂອງກົມອົບຮົມເຂົ້າຮ່ວມ.
ກົມອົບຮົມ ແມ່ນກົມໜຶ່ງທີ່ມີພາລະບົດບາດເປັນເສນາທິການໃນການສ້າງ, ປັບປຸງເອກະສານໃຫ້ແກ່ ຄະນະໂຄສະນາອົບຮົມສູນກາງພັກ ແລະ ປະສານສົມທົບກັບຄະນະໂຄສະນາອົບຮົມທ້ອງຖິ່ນ ຈັດຕັ້ງອົບຮົມໃຫ້ແກ່ເປົ້າໝາຍຕ່າງໆ ເພື່ອຍົກລະດັບຄວາມຮູ້ດ້ານທິດສະດີ, ແນວທາງ, ແຜນນະໂຍບາຍຂອງພັກ, ລະບຽບກົດໝາຍຂອງລັດ. ນອກນັ້ນ ຍັງໄດ້ຝຶກອົບຮົມວຽກງານວິຊາສະເພາະໃຫ້ພະນັກງານພາຍໃນກົມ ຊຶ່ງເປັນວຽກສໍາຄັນທີ່ຄະນະກົມ ໄດ້ເອົາໃຈໃສ່ເປັນພິເສດ ເພື່ອບໍາລຸງຍົກລະດັບວິຊາສະເພາະໃຫ້ພະນັກງານພາຍໃນກົມໃຫ້ມີຄວາມເຂັ້ມແຂງທາງດ້ານວິຊາສະເພາະ ຕາມທິດຫັນເປັນມືອາຊີບ.
ກອງປະຊຸມໄດ້ສະຫຼຸບການ ຈັດຕັ້ງອົບຮົມໃນໄລຍະ 1 ປີຜ່ານມາ ກ່ຽວກັບຄວາມຮູ້ພື້ນຖານດ້ານການເມືອງ-ການປົກຄອງ ແລະ ການສ້າງບ້ານພັດທະນາ ແລະ ອົບຮົມປະຊາຊົນລຽບຕາມຊາຍແດນ; ອົບຮົມຄູ-ອາຈານສອນວິຊາສັງຄົມ-ການເມືອງ; ອົບຮົມການເມືອງ-ແນວຄິດ ໃຫ້ຜູ້ຊົງຄຸນວຸດທິບັນດາເຜົ່າ ມີຜູ້ເຂົ້າຮ່ວມທັງໝົດ 384 ທ່ານ, ຍິງ 72 ທ່ານ; ຈັດຝຶກອົບຮົມວິຊາສະເພາະໃຫ້ພະນັກງານພາຍໃນກົມອົບຮົມໄດ້ 16 ຄັ້ງ (16 ເທື່ອຄົນ).
ກອງປະຊຸມ ໄດ້ສະຫຼຸບແລະຖອດຖອນບົດຮຽນ ເພື່ອເຮັດໃຫ້ການຈັດຕັ້ງອົບຮົມໃຫ້ເປົ້າໝາຍຕ່າງໆ ແລະ ຝຶກອົບຮົມວິຊາສະເພາະໃຫ້ພະນັກງານພາຍໃນກົມອົບຮົມໃຫ້ໄດ້ຮັບຜົນດີກວ່າເກົ່າ; ຢາກເຮັດໃຫ້ການຝຶກອົບຮົມມີຄຸນນະພາບ ຕ້ອງເອົາໃຈໃສ່ ດັ່ງນີ້:
- ຕ້ອງປັບປຸງເນື້ອໃນເອກະສານໃຫ້ຮັດກຸມ, ເຂົ້າໃຈງ່າຍ ແລະ ສອດຄ່ອງກັບແຕ່ລະເປົ້າໝາຍ.
- ຜູ້ບັນຍາຍເອກະສານຕ້ອງເຂົ້າໃຈເນື້ອໃນເອກະສານໃຫ້ເລິກເຊິ່ງ.
- ຜູ້ເຂົ້າຮ່ວມອົບຮົມຕ້ອງເລືອກໃຫ້ໄດ້ຜູ້ທີ່ເປັນເປົ້າໝາຍແທ້ ແລະ ອົງການປົກຄອງບ້ານຕ້ອງປຸກລະດົມແນວຄິດຂອງເຂົາເຈົ້າໃຫ້ມີຄວາມຕື່ນຕົວເຂົ້າຮ່ວມ.
- ການປະສານງານກັບຄະນະໂຄສະນາອົບຮົມທ້ອງຖິ່ນຕ້ອງລະອຽດ, ຈະແຈ້ງ ໂດຍສະເພາະແມ່ນຜູ້ບັນຍາຍເອກະສານ, ເປົ້າໝາຍເຂົ້າຮ່ວມ ແລະ ບັນຫານະໂຍບາຍຕໍ່ຜູ້ເຂົ້າອົບຮົມຕ້ອງເໝາະສົມ.
- ສຳລັບການຝຶກອົບຮົມວິຊາສະເພາະໃຫ້ພະນັກງານພາຍໃນກົມອົບຮົມ ຢາກເຮັດໄດ້ດີຕ້ອງເອົາໃຈ ໃສ່ບາງບັນຫາສໍາຄັນ ຄື:
– ຜູ້ບັນຍາຍເອກະສານຕ້ອງເອົາໃຈໃສ່ຄົ້ນຄວ້າ, ເຊື່ອມຊຶມ, ກໍາແໜ້ນເນື້ອໃນສໍາຄັນຂອງເອກະ ສານໃຫ້ໄດ້, ເວລາບັນຍາຍຕ້ອງສົມທຽບທິດສະດີໃສ່ພຶດຕິກໍາຕົວຈິງໃຫ້ຫຼາຍ ເພື່ອສ້າງຄວາມດຶງດູດຜູ້ຟັງ.
– ເອົາໃຈໃສ່ຝຶກຝົນທາງດ້ານທັກສະໃນການເວົ້າ (ເວລາບັນຍາຍຄວນໃຊ້ຄໍາໂຕ່ງໂຕຍ, ພະຫຍາ, ສຸພາສິດ, ນິທານທີ່ພົວພັນກັບເນື້ອໃນເອກະສານແຊກເຂົ້າເປັນບາງບ່ອນ, ບາງເວລາເພື່ອໃຫ້ມີບັນຍາກາດ).
– ເວລາບັນຍາຍຕ້ອງຫຼີກເວັ້ນພະຍາດຕາໃຫຍ່ກວ່າທ້ອງ (ອັນໃດກໍຢາກເວົ້າໝົດ ແລະ ເວົ້າໄປຕາມເອກະສານອ້ອຍຕ້ອຍຢ່າງບໍ່ເງີຍໜ້າ).
ກອງປະຊຸມຄັ້ງນີ້ເປັນການເປີດກວ້າງໃຫ້ບັນດາພະນັກງານມີຄຳເຫັນໃນການຖອດຖອນບົດຮຽນເຊິ່ງກັນ ແລະ ກັນ ເປັນບ່ອນອີງສໍາຄັນໃຫ້ແກ່ຄະນະກົມອົບຮົມໃນການປັບປຸງ ແລະ ຍົກສູງຄຸນະພາບຂອງວຽກງານອົບຮົມໃຫ້ດີຂຶ້ນກວ່າເກົ່າ.
ຂ່າວ: ໃຈແກ້ວ ສີບຸນເຮືອງ
