ກອງປະຊຸມໃຫຍ່ສະມາຊິກພັກ ຄັ້ງທີ V ຂອງອົງຄະນະພັກ ຄະນະໂຄສະນາອົບຮົມສູນກາງພັກ.
ໃນຕອນເຊົ້າຂອງວັນທີ 24 ສິງຫາ 2021 ຄະນະໂຄສະນາອົບຮົມສູນກາງພັກ ໄດ້ເປີດກອງປະຊຸມໃຫຍ່ສະມາຊິກພັກ ຄັ້ງທີ V ຂອງອົງຄະນະພັກ ຄະນະໂຄສະນາອົບຮົມສູນກາງພັກ ຂຶ້ນຢ່າງເປັນທາງການ ທີ່ ຫ້ອງປະຊຸມໃຫຍ່ ຄະນະໂຄສະນາອົບຮົມສູນກາງພັກ (ຫຼັກ6), ພາຍໃຕ້ການເປັນປະທານຂອງ ສະຫາຍ ຄຳພັນ ເຜີຍຍະວົງ ເລຂາທິການສູນກາງພັກ, ເລຂາຄະນະພັກ, ຫົວໜ້າຄະນະໂຄສະນາອົບຮົມສູນກາງພັກ, ໃຫ້ກຽດເປັນປະທານຮ່ວມໂດຍ ສະຫາຍ ຄໍາພັນ ພົມມະທັດ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ປະທານຄະນະກວດກາສູນກາງພັກ, ປະທານອົງການກວດກາ ແຫ່ງລັດ, ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ, ຜູ້ຊີ້ນຳກະກຽມກອງປະຊຸມໃຫຍ່ຂອງອົງຄະນະພັກ ຄະນະໂຄສະນາອົບຮົມສູນກາງພັກ ເຂົ້າຮ່ວມມີຕາງໜ້າຄະນະກວດກາສູນກາງພັກ, ຫ້ອງວ່າການສູນກາງພັກ, ຄະນະຈັດຕັ້ງສູນກາງພັກ, ຄະນະພົວພັນຕ່າງປະເທດສູນກາງພັກ, ສະຖາບັນການເມືອງການປົກຄອງແຫ່ງຊາດ, ສະຖາບັນເສດຖະກິດສັງຄົມແຫ່ງຊາດ, ກະຊວງຖະແຫຼ່ງຂ່າວວັດທະນະທໍາ ແລະ ທ່ອງທ່ຽວ, ສະມາຊິກພັກອາວຸໂສບຳນານ, ສະມາຊິກພັກສົມບູນ, ສະມາຊິກພັກສໍາຮອງ ທົ່ວຄອສພ ເຂົ້າຮ່ວມຢ່າງພ້ອມພຽງ.
ໃນພິທີ ສະຫາຍ ອານົງສັກ ອິນທະວົງ ຄະນະພັກ ຄະນະໂຄສະນາອົບຮົມສູນກາງພັກ ໄດ້ຂຶ້ນກ່າວຈຸດປະສົງ ແລະ ສະເໜີແຂກເຂົ້າຮ່ວມໃນກອງປະຊຸມຄັ້ງນີ້.
ຫຼັງຈາກນັ້ນ ສະຫາຍ ຄໍາພັນ ເຜີຍຍະວົງ ເລຂາທິການສູນກາງພັກ, ເລຂາຄະນະພັກ, ຫົວໜ້າຄະນະໂຄສະນາອົບຮົມສູນກາງພັກ ໄດ້ຂຶ້ນກ່າວໄຂກອງປະຊຸມໃຫຍ່ສະມາຊິກພັກ ຄັ້ງທີ V ຂອງອົງຄະນະພັກ ຄະນະໂຄສະນາອົບຮົມສູນກາງພັກ ຢ່າງເປັນທາງການພ້ອມທັງຜ່ານຮ່າງລາຍງານການເມືອງຂອງກອງປະຊຸມໃຫຍ່ຄັ້ງທີ V ຕໍ່ກອງປະຊຸມເຊິ່ງເປັນການສະຫຼຸບຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ IV ຂອງອົງຄະນະພັກຄະນະໂຄສະນາອົບຮົມສູນກາງພັກ(2016-2020) ແລະ ວາງທິດທາງລວມ ແລະ ໜ້າທີ່ຕົ້ນຕໍໃນການນຳພາຂອງ ຄະນະພັກຄອສພ ໃນ 5 ປີຕໍ່ໜ້າ.
ໃນກອງປະຊຸມ ສະຫາຍ ນາງ ວິລະວອນ ພັນທະວົງ ຄະນະພັກ ຮອງຫົວໜ້າຄະນະໂຄສະນາອົບຮົມສູນກາງພັກໄດ້ ຂຶ້ນຜ່ານແຜນພັດທະນາວຽກງານໂຄສະນາອົບຮົມ ໄລຍະ 5 ປີ (2021-2025) ເຊິ່ງໄດ້ສະຫຼຸບຕີລາຄາ ການຈັດຕັ້ງປະຕິບັດແຜນຍຸດທະສາດພັດທະນາວຽກງານໂຄສະນາອົບຮົມ ຂອງອົງຄະນະພັກ ຄອສພ ໄລຍະ 5 ປີຜ່ານມາ (2016-2020), ສາເຫດທີ່ພາໃຫ້ມີດ້ານດີ, ດ້ານອ່ອນ, ຂໍ້ຄົງຄ້າງ, ກຳນົດແຜນພັດທະນາວຽກງານໂຄສະນາອົບຮົມ 5 ປີ (2021-2025) ແລະ ຍຸດທະສາດຮອດປີ 2030.
ຫຼັງຈາກນັ້ນ ສະຫາຍ ລາວປາວຊົ່ງ ນະວົງໄຊ ຮອງເລຂາຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ໄດ້ຜ່ານຮ່າງບົດສຳຫຼວດການນຳພາຂອງອົງຄະນະພັກ ຄະນະໂຄສະນາອົບຮົມສູນກາງພັກ ໄລຍະ 5 ປີຜ່ານມາ.
ກອງປະຊຸມໄດ້ຄົ້ນຄວ້າປະກອບຄຳເຫັນ ແລະ ຮັບຮອງເອົາຮ່າງລາຍງານການເມືອງ, ແຜນພັດທະນາວຽກງານໂຄສະນາອົບຮົມ, ຮ່າງບົດສໍາຫຼວດການນໍາພາລວມຂອງຄະນະພັກ ສະໄໝທີ IV ໃນໄລຍະ 5 ປີຜ່ານມາ ແລະ ປ່ອນບັດຄັດເລືອກເອົາຄະນະບໍລິຫານງານພັກຊຸດໃໝ່ ເພື່ອສືບຕໍ່ຊີ້ນໍາ-ນໍາພາວຽກງານໂຄສະນາອົບຮົມໃນຕໍ່ໜ້າ.
ຄະນະພັກຊຸດເກົ່າ
ຄະນະພັກຊຸດໃໝ່
ເຊິ່ງມີຜູ້ສະໝັກເລືອກຕັ້ງທັງໝົດ 11 ສະຫາຍ ຍິງ 4 ສະຫາຍ, ເລືອກເອົາ 9 ສະຫາຍເຊິ່ງມີລາຍຊື່ດັ່ງລຸ່ມນີ້:
- ສະຫາຍ ຄໍາພັນ ເຜີຍຍະວົງ
- ສະຫາຍ ລາວປາວຊົ່ງ ນະວົງໄຊ
- ສະຫາຍ ນາງ ສົມພອຍ ພົມມະຈັກ
- ສະຫາຍ ນາງ ວິລະວອນ ພັນທະວົງ
- ສະຫາຍ ອານົງສັກ ອິນທະວົງ
- ສະຫາຍ ວັນຕຸລາ ຣັກນຸດ
- ສະຫາຍ ສາຄອນ ພົມມະລາດ
- ສະຫາຍ ນາງ ພວງມະລີ ອັກຄະມຸນຕີ
- ສະຫາຍ ຄໍາກອງ ພົມມະເທວາ
- ສະຫາຍ ວັນລາຕີ ຄໍາວານວົງສາ
- ສະຫາຍ ນາງ ບຸນມາລີ ສີດາວົງ
ຜ່ານການປ່ອນບັດຄັດເລືອກໄດ້ 9 ສະຫາຍ ຍິງ 2 ສະຫາຍຄື:
- ສະຫາຍ ຄໍາພັນ ເຜີຍຍະວົງ
- ສະຫາຍ ລາວປາວຊົ່ງ ນະວົງໄຊ
- ສະຫາຍ ນາງ ວິລະວອນ ພັນທະວົງ
- ສະຫາຍ ນາງ ສົມພອຍ ພົມມະຈັກ
- ສະຫາຍ ອານົງສັກ ອິນທະວົງ
- ສະຫາຍ ວັນຕຸລາ ຣັກນຸດ
- ສະຫາຍ ສາຄອນ ພົມມະລາດ
- ສະຫາຍ ຄໍາກອງ ພົມມະເທວາ
- ສະຫາຍ ວັນລາຕີ ຄໍາວານວົງສາ
ໃນກອງປະຊຸມຄັ້ງປະຖົມມະລຶກ ໄດ້ຕົກລົງເຫັນດີເປັນເອກະພາບ ເລືອກເອົາຄະນະປະຈໍາພັກ 3 ສະຫາຍ ຄື:
- ສະຫາຍ ຄໍາພັນ ເຜີຍຍະວົງ
- ສະຫາຍ ລາວປາວຊົ່ງ ນະວົງໄຊ
- ສະຫາຍ ນາງ ວິລະວອນ ພັນທະວົງ
- ເລືອກເອົາເລຂາ ແລະ ຮອງເລຂາ ຄະນະພັກ ຄະນະໂຄສະນາອົບຮົມສູນກາງພັກ ສະໄໝທີ V ຄື:
- ສະຫາຍ ຄໍາພັນ ເຜີຍຍະວົງ ເປັນເລຂາຄະນະພັກ ຄະນະໂຄສະນາອົບຮົມສູນກາງພັກ
- ສະຫາຍ ລາວປາວຊົ່ງ ນະວົງໄຊ ເປັນຮອງເລຂາຄະນະພັກ
- ເລືອກເອົາປະທານກວດກາ ແລະ ຮອງປະທານ 3 ສະຫາຍ ຄື:
- ສະຫາຍ ນາງ ວິລະວອນ ພັນທະວົງ ເປັນປະທານກວດກາ
- ສະຫາຍ ອານົງສັກ ອິນທະວົງ ເປັນຮອງປະທານກວດກາ
- ສະຫາຍ ສະຫວ່າງ ດາລາແສນ ເປັນຮອງປະທານກວດກາ
ຕອນທ້າຍຂອງກອງປະຊຸມໄດ້ຮັບຟັງການໂອ້ລົມຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດແຫ່ງ ສປປ ລາວ. ກ່ອນອື່ນ ທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານຂອງອົງຄະນະພັກ ຄະນະໂຄສະນາອົບຮົມສູນກາງພັກ ທີ່ຍາດມາໄດ້ຕະຫລອດໄລຍະ 5 ປີຜ່ານມາ, ພ້ອມກັນນັ້ນ ທ່ານຍັງໄດ້ສະແດງຄວາມເປັນຫ່ວງເປັນໃຍຕໍ່ບັນດາຂໍ້ຄົງຄ້າງ ແລະ ໃຫ້ມີຄຳເຫັນເນັ້ນໜັກໃຫ້ຄະນະໂຄສະນາອົບຮົມສູນກາງພັກເວົ້າລວມ, ເວົ້າສະເພາະແມ່ນພະນັກງານໂຄສະນາອົບຮົມຕ້ອງໄດ້ເອົາໃຈໃສ່ 7 ບັນຫາສຳຄັນຄື:
- ສ້າງການຫັນປ່ຽນຢ່າງແຂງແຮງ ທາງດ້ານເນື້ອໃນ ແລະ ຮູບການ ໃນການເຄື່ອນໄຫວວຽກງານໂຄສະນາອົບຮົມ ເພື່ອສາມາດຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ ເປັນຕົ້ນແມ່ນການເຜີຍແຜ່ເນື້ອໃນ ຂອງມະຕິ ກອງປະຊຸມໃຫຍ່ຄັ້ງທີ XI ຂອງພັກ ຊຶ່ງເລີ່ມມີໜໍ່ແໜງການຫັນປ່ຽນໃນແບບວິທີການເຜີຍແຜ່ມາແລ້ວ ແລະ ເອກະສານ ທີ່ກົມການເມືອງສູນກາງພັກ ມອບໃຫ້ບັນດາສະຫາຍກະກຽມເຜີຍແຜ່ອົບຮົມໃນຮູບແບບໃໝ່ ໄດ້ເກີດຂຶ້ນແລ້ວ, ຂໍໃຫ້ສືບຕໍ່ປັບປຸງປ່ຽນແປງ ໄປຕາມແຕ່ລະເປົ້າໝາຍ ແລະ ສົມບູນແທດຕົວຈິງກັບສະພາບຕົວຈິງ;
- ຢາກເຮັດວຽກງານສຶກສາອົບຮົມໃຫ້ມີຄຸນນະພາບສູງ, ບັນດາສະຫາຍຕ້ອງກຳໄດ້ແນວຄິດຈິດໃຈ, ຈິດຕະສາດ, ຄວາມຂັດຂ້ອງໝອງໃຈ, ຄວາມມຸ່ງມາດປາຖະໜາ ຂອງປະຊາຊົນ ແລະ ຊັ້ນຄົນຕ່າງໆ ໃນສັງຄົມໃຫ້ເລິກເຊິ່ງ. ຈາກນັ້ນ, ກໍຮີບຮ້ອນຈັດສັນເນື້ອໃນແນວທາງ ແລະ ແບບແຜນສຶກສາອົບຮົມ ແລະ ເປົ້າໝາຍຕ່າງໆໃຫ້ຖືກຕ້ອງສອດຄ່ອງກັບຈຸດພິເສດນັ້ນໆ;
- ເພື່ອຕອບຕ້ານບັນດາກົນອຸບາຍ, ເລລ່ຽມ ຂອງກຸ່ມຄົນທີ່ບໍ່ຫວັງດີ, ຜູ້ທີ່ເຮັດວຽກໃນແນວຮົບ ແນວຄິດ ຕ້ອງກຳໄດ້ຈຸດພິເສດ, ຈຸດອ່ອນ, ຈຸດແຂງ ຂອງພວກເຂົາເຫຼົ່ານັ້ນ ເມື່ອມີແຜນຮັບມືຢ່າງເດັດດ່ຽວ, ຖືກຕ້ອງ, ເໝາະສົມຕາມສະຖານະການ, ໃນນັ້ນ, ຕ້ອງທັນການ, ແຕ່ຕ້ອງ ເຕັມໄປດ້ວຍຄວາມຮອບຄອບ, ແນບນຽນ, ແຫຼມຄົມ, ຖືກເປົ້າໝາຍ ແລະ ກ້າວໄປເຖິງ ໃຫ້ຮັກສາໄດ້ສະຖຽນລະພາບທາງດ້ານການເມືອງ, ຄວາມສະຫງົບ, ຄວາມເປັນລະບຽບຮຽບຮ້ອຍໃນສັງຄົມ;
- ຕໍ່ວຽກງານໂຄສະນາ ການອອກແບບໂຄສະນາດ້ວຍ ຫຼາຍຮູບຫຼາຍສີ, ແຕ່ໃຫ້ຮັບປະກັນຄວາມເລິກເຊິ່ງ, ກວ້າງຂວາງແມ່ນມີຄວາມຈໍາເປັນໃນສັງຄົມ ປັດຈຸບັນ. ພວກເຮົາສາມາດນໍາໃຊ້ສື່ມວນຊົນ ຢ່າງກວ້າງຂວາງ ແລະ ຫຼາກຫຼາຍທີ່ເປັນພາຫະນະສໍາຄັນ ທີ່ສັງຄົມຕ້ອງການທີ່ເປັນຊີວິດປະຈໍາວັນໃນການຕິດຕໍ່ພົວພັນຂອງເຂົາເຈົ້າຢູ່ນັ້ນໃຫ້ມີຫຼາຍຮູບຫຼາຍສີກວ່າເກົ່າ. ນອກນັ້ນ, ຕ້ອງໄດ້ຈັດປາຖະກະຖາ, ສໍາມະນາຜ່ານອົງການຈັດຕັ້ງຕ່າງໆ, ສ້າງເປັນເອກະສານໂຄສະນາອົບຮົມທີ່ມີເນື້ອໃນເລິກເຊິ່ງ, ມີຊີວິດຊີວາສາມາດດຶງດູດຄວາມສົນໃຈ ຂອງແຕ່ລະເປົ້າໝາຍ. ຖ້າເປັນໄປໄດ້ ຂ້າພະເຈົ້າສະເໜີໃຫ້ຄະນະໂຄສະນາອົບຮົມມີພາຫະນະເປັນສື່ເປັນຂອງຕົນເອງເຊັ່ນ: ໜັງສືພິມ, ວິທະຍຸກະຈາຍສຽງ, ໂທລະພາບ… ລວມທັງນໍາໃຊ້ສື່ອອນລາຍ ໃຫ້ເປັນຂອງຕົນເອງເຊິ່ງແມ່ນຄວາມຈຳເປັນໃນການເຮັດໜ້າທີ່ເປັນພາຫະນະໃນການໂຄສະນາສຶກສາອົບຮົມເປົ້າໝາຍຕ່າງໆໄດ້ຢ່າງເລິກເຊິ່ງ;
- ຄະນະໂຄສະນາອົບຮົມສູນກາງພັກ ຕ້ອງເປັນເຈົ້າການປະສານ ສົມທົບກັບຄະນະສະພາທິດສະດີສູນກາງພັກ, ສະຖາບັນຕ່າງໆ ສືບຕໍ່ ຄົ້ນຄວ້າທາງດ້ານທິດສະດີ ແລະ ສະຫຼຸບພຶດຕິກໍາ ຂອງພັກ; ພົວພັນ ໃກ້ຊິດ, ແລກປ່ຽນບົດຮຽນທາງດ້ານທິດສະດີ ແລະ ພຶດຕິກໍາ ກັບບັນດາພັກອ້າຍນ້ອງ ເພື່ອຊ່ວຍກົມການເມືອງ, ຄະນະບໍລິຫານງານສູນກາງພັກ ວາງແນວທາງນະໂຍບາຍຂອງພັກ ໃນຊຸມປີຕໍ່ໜ້ານີ້ ໃຫ້ຖືກຕ້ອງສອດຄ່ອງກັບສະພາບການແຫ່ງຄວາມຮຽກຮ້ອງຕ້ອງການ ທີ່ແທ້ຈິງ;
- ປັບປຸງພາລະບົດບາດ ແລະ ກົງຈັກການຈັດຕັ້ງ ຂອງຄະນະໂຄສະນາອົບຮົມສູນກາງພັກຄືນໃໝ່ໃຫ້ກະທັດຮັດ, ໜັກແໜ້ນ, ເຂັ້ມແຂງ, ສົມຄູ່ກັບ ບົດບາດ ແລະ ຄວາມສໍາຄັນຂອງວຽກງານໃນໄລຍະໃໝ່;
- ເພີ່ມທະວີການຄຸ້ມຄອງດ້ານລະບຽບວິໄນ ຢູ່ພາຍໃນການຈັດຕັ້ງ ຂອງອົງຄະນະພັກ ຕິດພັນກັບການສະກັດກັ້ນ ຕີຖອຍບັນດາປະກົດການຫຍໍ້ທໍ້ ໄປຄຽງຄູ່ກັບຍົກລະດັບຄວາມຮູ້, ຄວາມສາມາດ ໃຫ້ແກ່ຖັນແຖວພະນັກງານ-ສະມາຊິກພັກເຊິ່ງເປັນກຸນແຈສຳຄັນໃນການປະຕິບັດໜ້າທີ່ວຽກງານຢ່າງເປັນລະບົບ, ຕໍ່ເນື່ອງ ແລະ ແຂງແຮງ. ອີກເປົ້າໝາຍໜຶ່ງ ທີ່ສໍາຄັນຜູ້ທີ່ເຮັດວຽກໂຄສະນາອົບຮົມ, ເຮັດວຽກຄົ້ນຄວ້າທິດສະດີ ແລະ ພຶດຕິກໍານັ້ນ ແມ່ນການຫັນປ່ຽນຄວາມຄິດ, ຫັນປ່ຽນຄ່ານິຍົມ ແລະ ຫັນປ່ຽນວິຖີຊີວິດຂອງຄົນ, ຂອງສັງຄົມ ໃນຍຸກແຫ່ງການປ່ຽນແປງໃໝ່ ຫຼື ຍຸກໂຄວິດ-19 ຫຼັງຈາກນີ້ຕໍ່ໄປສິ່ງສໍາຄັນທີ່ສຸດແມ່ນຄ່ານິຍົມຂອງສັງຄົມ-ຂອງຊາວໜຸ່ມ ວຽກງານໂຄສະນາອົບຮົມເຮົາຈະຮັບມື ແລະ ກະທົບໃສ່ແນວໃດ.
