ຄະນະໂຄສະນາອົບຮົມສູນກາງພັກ
ມອບປຶ້ມເອກະສານກອງປະຊຸມໃຫຍ່ຄັ້ງທີ XI ຂອງພັກໃຫ້ແກ່ກະຊວງປ້ອງກັນປະເທດ
ໃນວັນທີ 01 ກັນຍາ 2021 ທ່ານ ລາວປາວຊົ່ງ ນະວົງໄຊ ກຳມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ພ້ອມດ້ວຍຄະນະ ໄດ້ມອບປຶ້ມເອກະສານກອງປະຊຸມໃຫຍ່ຄັ້ງທີ XI ຂອງພັກ ຈຳນວນ 1.030 ຫົວໃຫ້ແກ່ກະຊວງປ້ອງກັນປະເທດໃຫ້ກຽດຮັບໂດຍ ທ່ານ ພົນຕີ ວົງຄຳ ພົມມະກອນ ກຳມະການສູນກາງພັກ, ຄະນະປະຈຳພັກ, ຮອງລັດຖະມົນຕີກະຊວງປ້ອງກັນປະເທດເຂົ້າຮ່ວມເປັນສັກຂີພະຍານມີບັນດາຫົວໜ້າກົມທັງສອງຝ່າຍທີ່ກ່ຽວຂ້ອງ.
ໃນພິທີ ທ່ານ ລາວປາວຊົ່ງ ນະວົງໄຊ ກຳມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ໄດ້ໃຫ້ຮູ້ວ່າປຶ້ມເອກະສານກອງປະຊຸມໃຫຍ່ຄັ້ງທີ XI ຂອງພັກນີ້ແມ່ນມີຄວາມສຳຄັນຫຼາຍເພາະໄດ້ໂຮມເອົາບັນດາເນື້ອໃນສຳຄັນທັງໝົດ ກໍຄືທິດຊີ້ນຳຂອງກອງປະຊຸມໃຫຍ່ຖືເປັນປຶ້ມຄູ່ມືສຳຄັນອັນໜຶ່ງສຳລັບພະນັກງານພັກຫຼັກແຫຼ່ງເພື່ອສຶບຕໍ່ຄົ້ນຄວ້າເຊື່ອມຊຶມກຳແໜ້ນ ແລະ ຜັນຂະຫຍາຍສູ່ວຽກງານຕົວຈິງ, ເພື່ອເປັນບ່ອນອີງໃນການໂຄສະນາສຶກສາອົບຮົມໃຫ້ເປົ້າໝາຍຕ່າງໆໄດ້ຮັບຮູ້ ແລະ ເຂົ້າໃຈກໍຄືປຸກລະດົມໃຫ້ທົ່ວສັງຄົມເຂົ້າຮ່ວມຈັດຕັ້ງປະຕິບັດບັນດາເນື້ອໃນຄາດໝາຍຕ່າງໆ ຂອງມະຕິກອງປະຊຸມໃຫຍ່ຄັ້ງທີ XI ໃຫ້ເປັນຂະບວນການກວ້າງຂວາງ ແລະ ປະກົດຜົນເປັນຈິງ.
ໂອກາດນີ້, ທ່ານ ພົນຕີ ວົງຄຳ ພົມມະກອນ ກຳມະການສູນກາງພັກ, ຄະນະປະຈຳພັກ, ຮອງລັດຖະມົນຕີກະຊວງປ້ອງກັນປະເທດ ໄດ້ກ່າວສະແດງຄວາມຂອບໃຈເປັນຢ່າງສູງມາຍັງຄະນະນຳຄະນະໂຄສະນາອົບຮົມສູນກາງພັກທີ່ເຫັນໄດ້ຄວາມສຳຄັນ ແລະ ໄດ້ມອບເອກະສານກອງປະຊຸມໃຫຍ່ ຄັ້ງທີ XI ຂອງພັກ ເປັນຄູ່ມືໃນການໂຄສະນາປາຖະກະຖາເຜີຍແຜ່ແນວທາງນະໂຍບາຍຂອງພັກ ແລະ ແຜນພັດທະນາເສດຖະກິດສັງຄົມຂອງລັດໃຫ້ແກ່ບັນດາສະມາຊິກພັກຂອງກຳລັງປ້ອງກັນປະເທດ, ນັກຮົບແຖວໜ້າທີ່ຢູ່ຊາຍແດນໃນທົ່ວປະເທດເພື່ອກຳແໜ້ນແນວທາງຂອງພັກ ແລະ ສະພາບວຽກງານການເມືອງ-ແນວຄິດ ໃນແຕ່ລະໄລຍະໃໝ່.
ຂ່າວ ແລະ ຮູບພາບ: ຄອນສະຫວັນ ເນົາວະລັງສີ