ຊຸດອົບຮົມໄດ້ຈັດຂຶ້ນທີ່ຫ້ອງປະຊຸມຂອງຄະນະໂຄສະນາອົບຮົມແຂວງອັດຕະປືໃນວັນທີ 19/07/ 2022 ຊຶ່ງໄດ້ດຳເນີນໄປ 1 ວັນ ພາຍໃຕ້ການເປັນປະທານເປີດ, ປິດ ແລະ ໃຫ້ການໂອ້ລົມຂອງສະຫາຍ ນາງ ບຸນນານ ບຸນນະແສງ ກຳມະການປະຈຳພັກແຂວງ ຫົວໜ້າຄະນະໂຄສະນາອົບຮົມແຂວງອັດຕະປື, ມີສະຫາຍ ຄຳກອງ ທຳມະເທວາ ກຳມະພັກ ຮອງຫົວໜ້າກົມອົບຮົມ ຄະນະໂຄສະນາອົບຮົມສູນກາງພັກ ແລະ ສະຫາຍ ຄຳໝັ້ນ ສີສະໝຸດ ຄະນະປະຈຳພັກເມືອງ ຮອງເລຂາພັກເມືອງສາມັກຄີໄຊ.
ຊຸດອົບຮົມຄັ້ງນີ້ ມີຜູ້ເຂົ້າຮ່ວມທັງໝົດ 42 ສະຫາຍ, ຍິງ 3 ສະຫາຍ ຊຶ່ງເປັນຜູ້ຊົງຄຸນວຸດທິບັນດາຊົນເຜົ່າ ທີ່ມາຈາກ 28 ບ້ານທົ່ວເມືອງສາມັກຄີໄຊ ແຂວງອັດຕະປື. ການຈັດຕັ້ງອົບຮົມຄັ້ງນີ້ນຳໃຊ້ເນື້ອໃນເອກະສານອົບຮົມການເມືອງ-ແນວຄິດ ໃຫ້ຜູ້ຊົງຄຸນວຸດທິບັນດາຊົນເຜົ່າ ປະກອບມີ 3 ຫົວຂໍ້ ຄື: ເສີມຂະຫຍາຍມູນເຊື້ອອັນສະຫງ່າລາສີຂອງປະຊາຊົນລາວບັນດາເຜົ່າ; ບົດບາດ ແລະ ໜ້າທີ່ຂອງຜູ້ຊົງຄຸນວຸດທິບັນ ດາຊົນເຜົ່າ; ເພີ່ມທະວີຄວາມສາມັກຄີເປັນປຶກແຜ່ນ ແລະ ຄວາມສະເໝີພາບຂອງປະຊາຊົນລາວບັນດາເຜົ່າ.
ການຈັດອົບຮົມການເມືອງ-ແນວຄິດ ໃຫ້ແກ່ຜູ້ຊົງຄຸນວຸດທິບັນດາຊົນເຜົ່າ ຢູ່ເມືອງສາມັກຄີໄຊ ແຂວງອັດຕະປື ໃນຄັ້ງນີ້ ເປັນການຍົກສູງຄວາມຮັບຮູ້-ເຂົ້າໃຈຕໍ່ແນວທາງນະໂຍບາຍຂອງພັກ, ມູນເຊື້ອອັນສະຫງ່າລາສີຂອງປະຊາຊົນລາວບັນດາເຜົ່າ, ບົດບາດໜ້າທີ່ຂອງຜູ້ຊົງຄຸນວຸດທິບັນດາຊົນເຜົ່າ, ຄວາມສາມັກຄີເປັນປຶກແຜ່ນ ແລະ ຄວາມສະເໝີພາບປະຊາຊົນບັນດາເຜົ່າ. ຜ່ານການອົບຮົມຄັ້ງນີ້ຈະເປັນພື້ນຖານຄວາມຮູ້ໃຫ້ແກ່ຜູ້ຊົງຄຸນວຸດທິບັນດາຊົນເຜົ່າ ເພື່ອນຳເອົາໄປໂຄສະນາສຶກສາອົບຮົມໃຫ້ແກ່ປະຊາຊົນບັນດາເຜົ່າ ໃນທ້ອງຖິ່ນຂອງຕົນທີ່ຢູ່ໃນຄວາມຮັບຜິດຊອບ ໄດ້ຮັບຮູ້-ເຂົ້າໃຈ ແລະ ຕື່ນຕົວເປັນເຈົ້າການຈັດຕັ້ງປະຕິບັດໃຫ້ປະກົດຜົນເປັນຈິງ ເພື່ອປະກອບອັນສຳຄັນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ກໍຄືການແກ້ໄຂຄວາມທຸກຍາກຂອງປະຊາຊົນໃຫ້ຫຼຸດລົງເທື່ອລະກ້າວ.
ຂ່າວ,ພາບ: ພູໄຊ ບຸນມີຈິດ