ທ່ານ ນາງ ວິລະວອນ ພັນທະວົງ ຄະນະປະຈໍາພັກ ຮອງຫົວໜ້າຄະນະໂຄສະນາອົບຮົມສູນກາງພັກ ໃຫ້ກຽດສໍາພາດຕໍ່ສື່ມວນຊົນເນື່ອງໃນໂອກາດວັນສື່ມວນຊົນ ແລະ ການພິມຈຳໜ່າຍ ຄົບ ຮອບ 73 ປີທີ່ຈະມາເຖິງນີ້.
ເນື່ອງໃນໂອກາດວັນສື່ມວນຊົນ ແລະ ການພິມຈໍາໜ່າຍ ຄົບຮອບ 73 ປີ ວັນທີ 13 ສິງຫາທີ່ຈະມາເຖິງນີ້ ຊຶ່ງເປັນວັນທີ່ມີຄວາມໝາຍສຳຄັນທາງປະຫວັດສາດຂອງຊາດ ເປັນວັນທີ່ມີຄວາມເອກອ້າງທະນົງໃຈຂອງສື່ມວນຊົນລາວ ຊຶ່ງເປັນປາກກະບອກສຽງຂອງພັກ-ລັດ ເປັນນັກຮົບປະຕິວັດທີ່ມີຄວາມກ້າແກ່ນອາດຫານ ຜ່ານຜ່າທຸກອຸປະສັກນາໆປະການ ເປັນສື່ທີ່ນໍາເອົາແນວທາງ, ມະຕິ, ຄຳສັ່ງຕ່າງໆຂອງພັກ-ຂອງລັດມາຜັນຂະຫຍາຍ, ເຜີຍແຜ່ລົງສູ່ປະຊາຊົນລາວບັນດາເຜົ່າໄດ້ຮັບຮູ້-ເຂົ້າໃຈຢ່າງເລິກເຊິ່ງກວ້າງຂວາງ.
ໃນໂອກາດທີ່ມີຄວາມໝາຍສໍາຄັນ ທ່ານ ນາງ ວິລະວອນ ພັນທະວົງ ຄະນະປະຈໍາພັກ ຮອງຫົວໜ້າຄະນະໂຄ ສະນາອົບຮົມສູນກາງພັກ ໄດ້ໃຫ້ສຳພາດຕໍ່ສື່ມວນຊົນເມື່ອບໍ່ດົນມານີ້ວ່າ: ວັນສື່ມວນຊົນ ແລະ ການພິມຈຳໜ່າຍ ເປັນວັນທີ່ມີຄວາມໝາຍສຳຄັນສຸດ ຊຶ່ງພັກ-ລັດຖະບານ ໄດ້ເຫັນຄວາມສຳຄັນ ແລະ ເອົາໃຈໃສ່ຕໍ່ວຽກງານດັ່ງກ່າວ ເພາະວຽກງານສື່ມວນຊົນເປັນວຽກງານທີ່ເປັນກະ ບອກສຽງ ເປັນວຽກງານທີ່ເປັນເສນາທິການໃຫ້ແກ່ພັກ-ລັດຂອງພວກເຮົາ, ສື່ທີ່ເປັນກະບອກສຽງຂອງພັກ-ລັດນີ້ມີຄວາມເຕີບໃຫຍ່ເຂັ້ມແຂງເປັນແຕ່ລະໄລຍະ ຊຶ່ງພາຍໃຕ້ການນຳພາຂອງຄະນະພັກແຕ່ລະຂັ້ນ ໂດຍສະເພາະອົງ ການທີ່ກ່ຽວຂ້ອງພາຍໃຕ້ການຊີ້ນຳໆພາຂອງອົງການປົກຄອງຂອງພວກເຮົານີ້, ສື່ໃນປັດຈຸບັນນັບມື້ນັບໄດ້ຮັບການພັດທະນາເຕີບໃຫຍ່ຂະຫຍາຍຕົວເຂັ້ມແຂງ, ນັບມື້ທີ່ພວກເຮົາຈະຕ້ອງໄດ້ເປີດປະຕູເພື່ອຜັນຂະຫຍາຍວຽກງານສື່ຂອງພວກເຮົາໃຫ້ທັນກັບຍຸກ 4.0 ຊຶ່ງເປັນຍຸກທີ່ມີສິ່ງທ້າທາຍຫຼາຍ ເປັນຍຸກທີ່ມີການກຳເນີດເກີດຂຶ້ນຂອງສື່ສັງຄົມອອນລາຍຫຼາຍທີ່ສຸດ. ໂດຍສະເພາະສື່ຂອງພວກເຮົາ ເປັນສື່ທີ່ເປັນກະບອກສຽງຂອງສູນກາງພັກ ຈະຕ້ອງໄດ້ເອົາ ໃຈໃສ່ຕື່ມ. ທີ່ຜ່ານມາກໍເຮັດໄດ້ດີ ແຕ່ພວກເຮົາຕ້ອງໄດ້ເອົາໃຈໃສ່ບຸກບືນຫ້າວຫັນ ປັບປຸງພັດທະນາຕົນເອງໃຫ້ດີຂຶ້ນຕື່ມ, ອີງໃສ່ຄວາມຮຽກຮ້ອງຕ້ອງການໃນໄລຍະໃໝ່, ອີງໃສ່ຍຸກດີຈີຕອນໃນປັດຈຸ ບັນ ກ່ອນອື່ນໝົດບຸກຄະລາກອນພວກເຮົາ ຕ້ອງໄດ້ເອົາໃຈໃສ່ມີຄວາມກະຕືລືລົ້ນ, ມີຄວາມຫ້າວຫັນຂຶ້ນກວ່າເກົ່າ, ແຕ່ອີງໃສ່ຄວາມຮຽກຮ້ອງຕ້ອງການໜ້າທີ່ການເມືອງຂອງພັກ-ລັດ ພວກເຮົາຕ້ອງໄດ້ມີການຝຶກອົບຮົມເລື້ອຍໆ, ຕ້ອງມີການຄົ້ນຄວ້າຮໍ່າຮຽນຢູ່ເລື້ອຍໆ, ຕ້ອງໄດ້ຊອກຮູ້ສິ່ງໃໝ່ໆຢູ່ເລື້ອຍໆ ເພື່ອຝຶກຕົນເອງໃຫ້ມີຄວາມຮູ້ເລິກເຊິ່ງກວ້າງຂວາງ. ສິ່ງສຳຄັນພວກເຮົາຕ້ອງໄດ້ມີການສູ້ຊົນ, ມີການແລກປ່ຽນບົດຮຽນກັບບັນດາເພື່ອນມິດຍຸດທະສາດ, ແລກປ່ຽນບົດຮຽນກັບບັນດາຜູ້ອາວຸໂສຜູ້ເພິ່ນມີບົດຮຽນມາກ່ອນ ເພື່ອເຮັດໃຫ້ສື່ພວກເຮົານັບມື້ນັບເຕີບໃຫຍ່ເຂັ້ມແຂງ ທັນກັບຍຸກສະໄໝ.
ທ່ານກ່າວເນັ້ນໃຫ້ຮູ້ອີກວ່າ: ໃນຍຸກ 4.0 ນີ້, ສື່ມວນຊົນພວກເຮົາຕ້ອງໄດ້ພັດທະນາປັບປຸງຕົນເອງໃຫ້ທັນກັບການຂະຫຍາຍຕົວຂອງສື່ແບບໃໝ່ ພວກເຮົາຕ້ອງໄດ້ຫັນ ແລະ ເບິ່ງວ່າເຕັກນິກການຈັດພິມ, ດ້ານເນື້ອໃນບົດຄວາມ-ບົດຂ່າວຕ່າງໆຕ້ອງໃຫ້ທັນກັບເຫດການ, ທັນກັບສະພາບການ ມີຄວາມອຸດົມສົມບູນຫຼາກຫຼາຍສີສັນ, ຕອບໂຕ້ປະກົດການຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມ ເພື່ອໃຫ້ປະຊາຊົນລາວບັນດາເຜົ່າໄດ້ຮັບຮູ້ເຂົ້າໃຈຢ່າງເລິກເຊິ່ງ, ບັນຫາສຳຄັນ ສື່ຕ້ອງກຳໄດ້ແນວທາງໃຫ້ມັນໜັກແໜ້ນຂຶ້ນກວ່າເກົ່າ, ກຳເນື້ອໃນໃຫ້ມັນດີຂຶ້ນກວ່າເກົ່າ ເພື່ອໃຫ້ສື່ນັບມື້ນັບມີຄວາມອຸດົມສົມບູນທາງດ້ານເນື້ອໃນ-ຮູບການ ນັບມື້ນັບກວ້າງ ຂວາງຂຶ້ນກວ່າເກົ່າ, ມີການປະສານສົມທົບແໜ້ນລະຫວ່າງສູນກາງ-ທ້ອງຖິ່ນ ທັງພາຍໃນ-ສາກົນ, ມີຄວາມສາມັກຄີຢ່າງແໜ້ນແຟ້ນເພື່ອເຮັດແນວໃດໃຫ້ສື່ພວກເຮົານັບມື້ນັບໄດ້ຮັບການພັດທະນາກ້າວໜ້າຂຶ້ນໄປເລື້ອຍໆ.
ແຫຼ່ງຂ່າວຈາກ: ໜັງສືພິມປະຊາຊົນ
ໂດຍ: ພູວັນ