ໃນຕອນເຊົ້າຂອງວັນທີ 12 ມັງກອນ 2024 ຄະນະໂຄສະນາອົບຮົມສູນກາງພັກ ໄດ້ຈັດພິທີປາຖະກະຖາວັນເກີດ ປະທານ ຄໍາໄຕ ສີພັນດອນ ຄົບຮອບ 100 ປີ ແລະ ວັນສ້າງຕັ້ງກອງທັບ ປະຊາຊົນລາວ ຄົບຮອບ 75 ປີ ທີ່ຫ້ອງປະຊຸມ ຄອສພ ໂດຍໃຫ້ກຽດເປັນປະທານ ຂອງ ທ່ານ ປອ ຄໍາພັນ ເຜີຍຍະວົງ ເລຂາທິການສູນ ກາງພັກ, ຫົວໜ້າຄະນະໂຄສະນາອົບຮົມສູນກາງພັກ ປະທານສະພາທິດສະດີສູນກາງພັກ; ເຂົ້າຮ່ວມມີ: ຄະນະພັກ, ຮອງຫົວຫນ້າຄະນະໂຄສະນາອົບຮົມສູນກາງພັກ, ບັນດາຫົວຫນ້າກົມ, ຮອງຫົວຫນ້າກົມ, ຫົວຫນ້າພະແນກ,ຮອງຫົວຫນ້າພະແນກ ແລະ ພະນັກງານທົ່ວ ຄອສພ ເຂົ້າຮ່ວມຢ່າງພ້ອມພຽງ.
ໃນພິທີ ທ່ານ ຄໍາມອນ ຈັນທະຈິດ ຮອງຫົວໜ້າຄະນະໂຄສະນາອົບຮົມສູນກາງພັກ, ຮອງປະທານສະພາທິດສະດີສູນກາງພັກ (ຜູ້ປະຈໍາການ) ໄດ້ໃຫ້ກຽດຂຶ້ນປາ ຖະກະຖາວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ເຊິ່ງທ່ານໄດ້ຍົກໃຫ້ເຫັນເຖິງ ປະຫວັດການກຳເນີດຂອງກອງທັບປະຊາຊົນລາວ, ສະພາບແວດລ້ອມກ່ອນການສ້າງຕັ້ງ, ຄວາມຈໍາເປັນພາວະວິໄສ, ຄວາມຫມາຍຄວາມສໍາຄັນ ຂອງການສ້າງຕັ້ງກອງທັບປະຊາຊົນລາວ ຜົນງານໄຊຊະນະ,ການເຕີບໃຫຍ່ຈະຫຍາຍຕົວ ຂອງກອງທັບປະຊາຊົນລາວ ແຕ່ລະໄລຍະ, ທາດແທ້ ແລະ ມູນເຊື້ອອັນສະຫງ່າອົງອາດ ຂອງກອງທັບປະຊາຊົນລາວ; ມູນເຊື້ອຄວາມຈົງຮັກພັກດີຕໍ່ພັກ, ຕໍ່ປະຊາ ຊົນ, ຕໍ່ອຸດົມການສັງຄົມນິຍົມ, ມູນເຊື້ອຕໍ່ສູ້ອັນພິລະອາດຫານ, ກ້າແກ່ນ,ຫນຽວແໜ້ນ ແລະ ມີໄຫວພິບ; ນໍ້າໃຈດຸຫມັ່ນຂະຫຍັນພຽນ, ຍຶດຫມັ້ນການພົວພັນ, ສາມັກຄີແບບກາຍອິນຊີອັນແໜ້ນແຟ້ນກັບປະຊາຊົນບັນດາເຜົ່າ, ການພົວພັນຮ່ວມມືພາຍໃນ ແລະ ສາກົນຢ່າງກົມກຽວບົນພຶ້ນຖານຕ່າງຝ່າຍຕ່າງມີຜົນປະໂຫຍດ ແລະ ການສືບຕໍ່ເສີມຂະຫຍາຍທາດແທ້ ແລະ ມູນເຊື້ອອັນສະຫງ່າງາມຂອງກອງທັບປະຊາຊົນລາວ.
ໃນໂອກາດທີ່ມີ ຄວາມຫມາຍສໍາຄັນນັ້ນ ທ່ານ ຄໍາພັນ ເຜີຍຍະວົງ ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ ປະທານສະພາທິດສະດີສູນກາງພັກ ໃຫ້ກຽດປາຖະກະຖາວັນເກີດຂອງປະທານ ຄໍາໄຕ ສີພັນດອນ ຄົບຮອບ 100 ປີ ທ່ານໄດ້ຍົກໃຫ້ເຫັນເຖິງຊີວິດເຍົາໄວ ແລະ ຈຸດເລີ່ມຕົ້ນ ການເຄື່ອນ ໄຫວປະຕິວັດຂອງ ປະທານ ຄໍາໄຕ ສີພັນດອນ ໃນການເຂົ້າຮ່ວມຂະບວນການຕໍ່ສູ້ຕ້ານພວກລ່າເມືອງຂຶ້ນຝຣັ່ງ ແລະ ຈັກກະພັດອາເມລິກາ, ຄວາມປີຊາສາມາດ, ຄວາມສະຫຼຽວສະຫຼາດຂອງປະທານ ຄໍາໄຕ ສີພັນດອນ ໃນການຊີ້ນໍາບັນຊາກອງທັບປະຊາຊົນລາວໃນການຕໍ່ສູ້ກູ້ຊາດບໍ່ຍອມຈໍານົນຈົນສາມາດຍາດໄດ້ໄຊຊະນະ ທີ່ສົມບູນ ແລະ ສະຖາປານາປະເທດ ສປປ ລາວ ຂື້ນໃນວັນທີ 2 ທັນວາ 1975. ຜົນງານ, ບົດບາດອັນສໍາຄັນໃນການຊີ້ນໍາ-ນໍາພາໃນໄລຍະພາລະກິດປົກປັກຮັກ ສາ ແລະ ສ້າງສາພັດປະເທດຊາດໃນແຕ່ລະໄລຍະຈົນເຖິງປັດຈຸບັນ; ວິຖີຊີວິດທີ່ດຸໝັ່ນພາກພຽນ, ແບບແຜນການເຮັດວຽກທີ່ຊັດເຈນ, ການອຸທິດຕົນເພື່ອຊາດ, ເພື່ອປະຊາຊົນ ແລະ ເປັນທີ່ເຄົາລົບຮັກຂອງປະຊາຊົນບັນດາເຜົ່າ. ນອກຈາກນັ້ນ ທ່ານໄດ້ເນັ້ນຫນັກໃຫ້ສະມາຊິກພັກ, ພະນັກງານ ທັງຫມົດພ້ອມກັນຕັ້ງຫນ້າຮໍ່າຮຽນເອົາແບບຢ່າງຂອງ ປະທານ ຄໍາໄຕ ສີພັນດອນ ດັ່ງນີ້:
1. ຕັ້ງຫນ້າຄົ້ນຄວ້າສຶກສາຮໍ່າຮຽນເອົາຄຸນສົມບັດສິນທໍາປະຕິວັດ, ຄວາມຈົງຮັກພັກດີ, ຄວາມບໍລິສຸດພຸດຜ່ອງ, ຄວາມມະນະອົດທົນ, ອຸ່ນອ່ຽນທຸ່ນທ່ຽງ, ມີໄຫວພິບໃນການຈັດຕັ້ງປະຕິບັດຫນ້າທີ່ວຽກງານທີ່ຕົນຮັບຜິດຊອບເພື່ອອຸທິດຕົນໃຫ້ພາລະກິດປະຕິວັດ, ເພື່ອຊາດ ເພື່ອປະຊາຊົນ, ມີນໍ້າໃຈເອກະລາດເປັນເຈົ້າຕົນເອງ, ເພິ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ.
2. ຕັ້ງຫນ້າເສີມຂະຫຍາຍຜົນງານ ແລະ ມູນເຊື້ອອັນດີງາມທີ່ພັກ-ລັດຍາດມາໄດ້ໃນໄລຍະຜ່ານມາໃຫ້ເຕີບໃຫຍ່ຂະຫຍາຍຕົວຂຶ້ນເລື້ອຍໆ.ພ້ອມກັນນັ້ນຕ້ອງຕັ້ງ ຫນ້າແກ້ໄຂບັນດາຈຸດອ່ອນຂໍ້ຄົງຄ້າງ ແລະ ປະກົດການຫຍໍ້ທໍ້ຕ່າງໆໃນຖັນແຖວກົງຈັກການຈັດຕັ້ງ, ສະມາຊິກພັກ-ພະນັກງານ ໃນນັບມື້ນັບຫລຸດລົງ, ສ້າງໃຫ້ພັກຂອງພວກເຮົາມີຄວາມປອດໃສ, ຫນັກແຫນ້ນ ແລະ ເຂັ້ມແຂງ ຄວາມເປັນແບບຢ່າງນໍາຫນ້າ, ຄວາມສາມັກຄີປຶກແຜ່ນ, ຈິດຫນຶ່ງໃຈດຽວອ້ອມຂ້າງພັກ.
3. ຄະນະພັກ ແລະ ອົງການປົກຄອງແຕ່ລະຂັ້ນ ຕ້ອງຍົກສູງຄວາມຮັບຜິດຊອບການເມືອງ, ຍົກສູງນໍ້າໃຈຮັກຊາດອັນດູດດື່ມ, ຈິດໃຈເອກະລາດເປັນເຈົ້າຕົນເອງເພິ່ງຕົນເອງ, ສຸມທຸກກຳລັງແຮງສັງລວມຂອງທົ່ວທັງຊາດ, ຕັ້ງຫນ້າແກ້ໄຂສະພາບຄວາມຫຍຸ້ງຍາກທາງດ້ານເສດຖະກິດການເງິນປັດຈຸບັນໃຫ້ຜ່ານພົ້ນໄປ ແລະ ສ້າງທ່ວງທ່າໃຫມ່ທີ່ຫນັກແໜ້ນ ເຂັ້ມແຂງເພື່ອກ້າວຂຶ້ນພັດທະນາປະເທດຕາມມະຕິກອງປະຊຸມໃຫຍ່ ຄັ້ງທີ XI ຂອງພັກໄດ້ກຳນົດໄວ້.
4. ສືບຕໍ່ເອົາໃຈໃສ່ ຕໍ່ວຽກງານສຶກສາອົບຮົມການເມືອງ-ແນວຄິດ ໃຫ້ພະນັກງານ-ສະມາຊິກພັກ, ທະຫານ, ຕໍາຫຼວດ ແລະ ປະຊາຊົນຊັ້ນຄົນຕ່າງໆ ໃຫ້ມີຄວາມຮັບຮູ້ເຂົ້າໃຈແນວທາງ, ນະໂຍບາຍຂອງພັກກົດຫມາຍຂອງລັດ, ມີສະຕິລະວັງຕົວຕໍ່ກົນອຸບາຍມ້າງເພທໍາລາຍຂອງພວກຄົນບໍ່ດີ ແລະ ອິດທິກຳລັງປໍລະປັກ; ຕັ້ງ ຫນ້າເປັນເຈົ້າການເຂົ້າຮ່ວມໃນຂະບວນການປົກປັກຮັກສາ ແລະ ສ້າງສາພັດທະນາປະເທດຊາດໃຫ້ມີຄວາມສີວິໄລ, ຈະເລີນຮຸ່ງເຮືອງຂຶ້ນເລື້ອຍໆ.
5. ເພີ່ມທະວີພົວພັນຮ່ວມືກັບພາຍນອກ ແລະ ອົງການຈັດຕັ້ງສາກົນຕ່າງໆ ໃຫ້ກວ້າງຂວາງ, ເປັນເຈົ້າການຍາດແຍ່ງເອົາການຊ່ວຍເຫຼືອ-ຮ່ວມມື ແລະ ດຶງດູດການລົງທຶນໃຫ້ນັບມື້ນັບເພີ່ມຂຶ້ນ.
6. ຄະນະພັກ ແຕ່ລະຂັ້ນຕ້ອງຕັ້ງຫນ້າຄົ້ນຄວ້າຮໍ່າຮຽນເຊື່ອມຊຶມມະຕິ, ຄໍາສັ່ງ, ຄໍາແນະນໍາຂອງກົມການເມືອງ ແລະ ຄະນະເລຂາທິການສູນກາງພັກວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນ ເພື່ອຕັ້ງຫນ້າກະກຽມໃຫ້ດີ ແລະ ດຳເນີນໃຫ້ຖືກຕ້ອງ.
ພ້ອມນັ້ນໃນຕອນທ້າຍຂອງພິທີໄດ້ມີການຜ່ານຂໍ້ຕົກລົງວ່າດ້ວຍການອະນຸມັດໃຫ້ພະນັກງານອອກພັກການ-ຮັບອຸດໜູນບໍານານ 2 ສະຫາຍ, ຂັ້ນຮອງຫົວໜ້າກົມ 1 ສະຫາຍ, ຂັ້ນຫົວໜ້າພະແນກ 1 ສະຫາຍ ແລະ ເຫັນດີແຕ່ງຕັ້ງຮອງຫົວໜ້າພະແນກ ຂຶ້ນເປັນຫົວໜ້າພະແນກ 1 ສະຫາຍ.
