ກອງປະຊຸມວິທະຍາສາດ ເພື່ອພິຈາລະນາ-ຮັບຮອງເອົາເນື້ອໃນຜົນການຄົ້ນຄວ້າໂຄງການລະດັບຊາດ ຫົວຂໍ້ “ກະສິກຳກັບການພັດທະນາຊົນນະບົດ”
ຕອນເຊົ້າວັນທີ 18 ມີນາ 2024, ເວລາ 8:30 ໂມງ ທີ່ສະພາທິດສະດີສູນກາງພັກ ໄດ້ຈັດກອງປະຊຸມວິທະຍາສາດ ເພື່ອພິຈາລະນາ-ຮັບຮອງເອົາເນື້ອໃນຜົນການຄົ້ນຄວ້າໂຄງການລະດັບຊາດ ຫົວຂໍ້ “ກະສິກຳກັບການພັດທະນາຊົນນະບົດ” ເຊິ່ງພາຍໃຕ້ການເປັນປະທານ ຂອງສະຫາຍ ປອ ຄຳພັນ ເຜີຍຍະວົງ ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ. ເຂົ້າຮ່ວມມີ: ຄະນະປະຈຳສະພາທິດສະດີສູນກາງພັກ, ສະມາຊິກສະພາທິດສະດີສູນກາງພັກ ແລະ ພາກສ່ວນຕ່າງໆຈາກຂົງເຂດກະສິກຳ.
ໃນກອງປະຊຸມຄັ້ງນີ້, ສະຫາຍ ປອ ໄຊຍະມັງ ວົງສັກ ຫົວໜ້າໂຄງການ ໄດ້ຂຶ້ນສະເໜີບົດສັງລວມໂດຍຫຍໍ້ກ່ຽວກັບຜົນ ຂອງການຄົ້ນຄວ້າໂຄງການ ຫຼັງຈາກນັ້ນຄະນະກຳມະການໄດ້ຕີລາຄາ ແລະ ປະກອບຄຳເຫັນໃສ່ເນື້ອໃນຜົນການຄົ້ນຄວ້າ ໂດຍຍົກໃຫ້ເຫັນບັນຫາສຳຄັນທາງດ້ານວິທະຍາສາດໃນການປັບປຸງດ້ານເນື້ອໃນໃຫ້ມີຄວາມອຸດົມສົມບູນ, ມີຄຸນນະພາບ ແລະມີລັກສະນະວິທະສາດ. ພ້ອມດຽວກັນນັ້ນ, ສະຫາຍ ປອ ຄຳພັນ ເຜີຍຍະວົງ ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ ກໍໄດ້ເນັ້ນໜັກໃຫ້ທິດຊີ້ນຳໃນການສືບຕໍ່ນຳເອົາເນື້ອໃນຈິດໃຈການປະກອບຄຳເຫັນ ຂອງບັນດາສະຫາຍຄະນະກຳມະການ ເພື່ອໃຫ້ຄະນະຮັບຜິດຊອບໂຄງການຄົ້ນຄວ້າໄດ້ນຳໄປປັບປຸງໃຫ້ມີເນື້ອໃນອຸດົມສົມບູນຂຶ້ນ ແນໃສ່ເພື່ອຮັບປະກັນຄຸນນະພາບ ແລະສາມາດຈັດພິມເຜີຍແຜ່ອອກສູ່ສັງຄົມໃນອັນດັບຕໍ່ໄປ.
ກອງປະຊຸມໄດ້ປິດລົງໃນເວລາ 11:30 ໂມງ ຂອງວັນດຽວກັນ.
