ຮັບຮອງເນື້ອໃນຜົນການຄົ້ນຄວ້າ
ໂຄງການຄົ້ນຄວ້າ ລະດັບຊາດ ພາຍໃນຫົວຂໍ້:
“ການກໍ່ສ້າງພັກໃນເງື່ອນໄຂພັກດຽວກຳອຳນາດ ຢູ່ ສປປ ລາວ”
ສະພາທິດສະດີສູນກາງພັກ ໄດ້ເປີດກອງປະຊຸມວິທະຍາສາດ ເພື່ອພິຈາລະນາ-ຮັບຮອງເອົາເນື້ອໃນຜົນການຄົ້ນຄວ້າໂຄງການລະດັບຊາດໃນຫົວຂໍ້ “ການກໍ່ສ້າງພັກໃນເງື່ອນໄຂພັກດຽວກຳອຳນາດ ຢູ່ ສປປ ລາວ” ໃນວັນທີ 03 ມິຖຸນາ 2024 ທີ່ຫ້ອງປະຊຸມໃຫຍ່ຊັ້ນ 2 ສໍານັກງານສະພາທິດສະດີສູນກາງພັກ (ຫຼັກ 06), ໂດຍການເປັນປະທານ ຂອງ ທ່ານ ປອ. ຄຳພັນ ເຜີຍຍະວົງ ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ, ໃນກອງປະຊຸມມີທ່ານ ສົມສະຫວາດ ເລັ່ງສະຫວັດ ທີ່ປຶກສາສະພາທິດສະດີສູນກາງພັກ, ທີ່ປຶກສາຄະນະຮັບຜິດຊອບການຄົ້ນຄວ້າແນວຄິດ ໄກສອນ ພົມວິຫານ, ທີ່ປຶກສາໃນການພິຈາລະນາ-ຮັບຮອງເນື້ອໃນໂຄງການຄົ້ນຄວ້າລະດັບຊາດ; ທ່ານ ຮສ. ປທ ພູວົງ ອຸ່ນຄຳແສນ ກໍາມະການສູນກາງພັກ, ຫົວໜ້າສະຖາບັນການເມືອງ ແລະ ການປົດຄອງແຫ່ງຊາດ, ຮອງປະທານສະພາທິດສະດີສູນກາງພັກ; ທ່ານ ປອ. ຄຳມອນ ຈັນທະຈິດ ຮອງຫົວໜ້າຄະນະໂຄສະນາອົບຮົມສູນກາງພັກ, ຮອງປະທານຜູ້ປະຈຳການສະພາທິດສະດີສູນກາງພັກ; ຄະນະປະຈໍາສະພາທິດສະດີສູນກາງພັກ; ຄະນະເລຂາວິທະຍາສາດສະພາທິດສະດີສູນກາງພັກ ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ.
ໂຄງການດັ່ງກ່າວ ເປັນໜຶ່ງໃນບັນດາໂຄງການຄົ້ນຄວ້າທາງດ້ານທິດສະດີ-ພຶດຕິກຳ ທີ່ຄະນະເລຂາທິການສູນກາງພັກໄດ້ອະນຸມັດ ຕາມມະຕິຕົກລົງ ສະບັບເລກທີ 108/ຄລສພ, ລົງວັນທີ 5 ກັນຍາ 2012 ແລະ ໄດ້ເລີ່ມຈັດຕັ້ງປະຕິບັດຕົວຈິງ ໂດຍໄດ້ຮັບການສະໜອງງົບປະມານຮັບໃຊ້ໂຄງການໃນປີ 2019 ເປັນຕົ້ນມາ, ພ້ອມກັນນັ້ນ ກໍ່ໄດ້ຜ່ານການຈັດຕັ້ງດຳເນີນກອງປະຊຸມສຳມະນາລະດົມຄວາມຄິດເຫັນ ຢູ່ຂັ້ນທ້ອງຖິ່ນ ແລະໄດ້ຜ່ານການປັບປຸງປະກອບຄຳເຫັນພາຍໃນຄະນະຮັບຜິດຊອບໂຄງການ. ການຈັດຕັ້ງປະຕິບັດໂຄງການຄົ້ນຄວ້າຫົວຂໍ້ຕ່າງໆ ເຊິ່ງມາຮອດປັດຈຸບັນນີ້ ສາມາດຮັບຮອງເອົາເນື້ອໃນຜົນການຄົ້ນຄວ້າໂຄງການລະດັບຊາດໄດ້ 4 ໂຄງການແລ້ວ. ບັນດາຜົນງານການຄົ້ນຄວ້າ ຂອງສະພາທິດສະດີສູນກາງພັກ ກໍຄືບັນດາສະມາຊິກໃນຄະນະຮັບຜິດຊອບໂຄງການຄົ້ນຄວ້າໃນຫົວຂໍ້ຕ່າງໆ ທີ່ໄດ້ສຸມທຸກກຳລັງສະຕິປັນຍາເຂົ້າໃນການການຄົ້ນຄວ້າຈົນສາມາດນຳສະເໜີ ຕໍ່ສະພາທິດສະດີສູນກາງພັກພິຈາລະນາຮັບຮອງເອົາບັນດາຫົວຂໍ້ເຫຼົ່ານີ້.
ສຳລັບໂຄງການຄົ້ນຄວ້າ ຫົວຂໍ້ “ການກໍ່ສ້າງພັກໃນເງື່ອນໄຂພັກດຽວກຳອຳນາດ ຢູ່ ສປປ ລາວ” ຜ່ານການຄົ້ນຄວ້າຕົວຈິງໃນໄລຍະຜ່ານມາເຫັນໄດ້ວ່າ ຄະນະຮັບຜິດຊອບໂຄງການໄດ້ມີຄວາມເອົາໃຈໃສ່ຢ່າງຈົດຈໍ່ ເຊິ່ງເນື້ອໃນຜົນການຄົ້ນຄວ້າໄດ້ສ່ອງແສງໃຫ້ເຫັນເຖິງທິດສະດີ-ພຶດຕິກຳແຫ່ງການຈັດຕັ້ງນຳພາ ຂອງພັກເຮົາ ຕະຫຼອດໄລຍະຜ່ານມາ ແລະບັນດາເນື້ອໃນດັ່ງກ່າວໄດ້ຢັ້ງຢືນໃຫ້ເຫັນເຖິງບົດບາດການນຳພາ ຂອງພັກເຮົາ ໂດຍຍຶດໝັ້ນລັດທິມາກ-ເລນິນ, ແນວຄິດໄກສອນ ພົມວິຫານ ຢ່າງຈະແຈ້ງກ່ຽວກັບການສ້າງພັກໃຫ້ມີຄວາມໜັກແໜ້ນ ແລະມີຄວາມເຂັ້ມແຂງຢ່າງຮອບດ້ານ; ພັກເຮົາຖືວ່າ ການນຳພາເປັນຫຼັກການໜຶ່ງທີ່ສຳຄັນໃນຂະບວນວິວັດແຫ່ງການເຕີບໃຫຍ່ຂະຫຍາຍຕົວຂອງພັກເຮົາ ແລະການນຳພາຕ້ອງຕິດພັນກັບການຈັດຕັ້ງປະຕິບັດຕົວຈິງຢ່າງສອດຄ່ອງ. ດັ່ງນັ້ນ, ການກໍ່ສ້າງພັກໃນເງື່ອນໄຂພັກດຽວກຳອຳນາດ ຢູ່ ສປປ ລາວ ແມ່ນເນື້ອໃນອັນສຳຄັນ ແລະສ່ອງແສງໃຫ້ເຫັນລັກສະນະ ຂອງຍຸກສະໄໝແຫ່ງການຈັດຕັ້ງນຳພາຂອງພັກເຮົາ ເພື່ອນຳພາປະເທດຊາດກ້າວສູ່ຈຸດໝາຍສັງຄົມນິຍົມ.
ພ້ອມນັ້ນ ຍັງໄດ້ສ່ອງແສງໃຫ້ເຫັນເນື້ອໃນພື້ນຖານສຳຄັນຫຼາຍປະການກ່ຽວກັບການກໍ່ສ້າງພັກໃນເງື່ອນໄຂພັກດຽວກຳອຳນາດ ເປັນຕົ້ນຄວາມຮັບຮູ້ກ່ຽວກັບພັກການເມືອງ ແລະພັກການເມືອງກຳອຳນາດ; ບັນດາຫຼັກການພື້ນຖານ ຂອງການກໍ່ສ້າງພັກແບບໃໝ່ ຂອງຊົນຊັ້ນກຳມະກອນ; ບົດຮຽນ ຂອງບັນດາພັກການເມືອງກຳນາດ ຂອງບັນດາພັກກອມມູນິດ ພ້ອມດຽວກັນນັ້ນ ກໍ່ໄດ້ຕີລາຄາຢ່າງພາວະວິໄສ ແລະຍົກໃຫ້ເຫັນຂໍ້ຈຳກັດດ້ານຕ່າງໆ; ການວາງວິໄສທັດ, ວິທີການໃນການແກ້ໄຂຕໍ່ໜ້າຢ່າງມີວິທະຍາສາດ.
ໃນຕອນທ້າຍ, ທ່ານ ປອ. ຄຳພັນ ເຜີຍຍະວົງ ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກປະທານກອງປະຊຸມໄດ້ມີຄຳເຫັນເພີ່ມເຕີມ ໂດຍເນັ້ນໜັກບາງປະການ ດັ່ງນີ້:
1). ຄະນະຮັບຜິດຊອບໂຄງການດັ່ງກ່າວ ຈົ່ງໄດ້ເຊີດຊູຄວາມຮັບຜິດຊອບ ແລະສຸມໃສ່ໃນການນຳເອົາເນື້ອໃນຄຳເຫັນ ຂອງຄະນະກຳມະການວິທະຍາສາດທີ່ໄດ້ມີຄຳເຫັນໃນການຕີລາຄາເນື້ອໃນບົດຄົ້ນຄວ້າໄປປັບປຸງ ແລະລາຍງານມາຍັງສະພາທິດສະດີສູນກາງພັກ ເປັນລາຍລັກອັກສອນ ເພື່ອສະເໜີຄະນະປະຈຳສະພາທິດສະດີສູນກາງພັກມີຄຳເຫັນ ແລະຈັດພິມເປັນສະບັບສົມບູນ.
2). ຄະນະຮັບຜິດຊອບໂຄງການປະສານກັບຫ້ອງການສະພາທິດສະດີສູນກາງພັກສຸມໃສ່ໃນການກວດກາດ້ານເຕັກນິກ-ໄວຍະກອນ, ການສ້າງມາແກັດປື້ມແລ້ວສົ່ງໃຫ້ຫ້ອງການສະພາທິດສະດີສູນກາງພັກ.
3). ຫ້ອງການສະພາທິດສະດີສູນກາງພັກຕ້ອງເປັນໃຈກາງໃນການຕິດຕາມ ແລະຊຸກຍູ້ການ ຈັດຕັ້ງປະຕິບັດບັນດາໜ້າວຽກຕ່າງໆ ເພື່ອເຮັດໃຫ້ການດຳເນີນໂຄງການໄດ້ສຳເລັດຕາມລະດັບຄາດໝາຍ ພ້ອມນັ້ນ ກໍຮ່າງຂໍ້ຕົກລົງວ່າດ້ວຍການຮັບຮອງເນື້ອໃນຜົນການຄົ້ນຄວ້າໂຄງການ ເພື່ອສະເໜີສະພາທິດສະດີສູນກາງພັກລົງລາຍເຊັນຢ່າງເປັນທາງການ.
ກອງປະຊຸມໄດ້ດຳເນີນເປັນເວລາເຄິ່ງວັນ ແລະ ປິດລົງໃນເວລາ 11:30 ຂອງວັນດຽວກັນດ້ວຍຜົນສຳເລັດຢ່າງຈົບງາມ.
ແຫຼ່ງຂາວ: ສະພາທິດສະດີສູນກາງພັກ
