ຄະນະຜູ້ແທນຄະນະໂຄສະນາອົບຮົມສູນກາງພັກປະຊາຊົນປະຕິວັດລາວ ປຶກສາຫາລືແລກປ່ຽນບົດຮຽນວຽກງານການຄຸ້ມຄອງສື່ ກັບຄະນະໂຄສະນາສຶກສາສູນກາງພັກກອມມູນິດຫວຽດນາມ
ໃນວັນທີ 16 ກໍລະກົດ 2024 ນີ້, ຄະນະໂຄສະນາອົບຮົມສູນກາງພັກປະຊາຊົນປະຕິວັດລາວ ແລະ ຄະນະໂຄສະນາສຶກສາສູນກາງພັກກອມມູນິດຫວຽດນາມ ໄດ້ມີການແລກປ່ຽນບົດຮຽນ ແລະ ປຶກສາຫາລືກ່ຽວກັບແຜນການ ແລະ ຄຸ້ມຄອງວຽກງານສື່ມວນຊົນຂອງ 2 ປະເທດ.
ໃນການຢ້ຽມຢາມແລກປ່ຽນບົດຮຽນຄັ້ງນີ້ ສະຫາຍ ຟານ ຊວນ ທູຍ ຮອງຫົວໜ້າຄະນະໂຄສະນາສຶກສາສູນກາງພັກກອມມູນິດຫວຽດນາມ ໄດ້ກ່າວຕ້ອນຮັບສະຫາຍ ສາຄອນ ພົມມະລາດ ຮອງຫົວໜ້າຄະນະໂຄສະນາອົບຮົມສູນກາງພັກປະຊາຊົນປະຕິວັດລາວ ແລະ ຄະນະຜູ້ແທນສູນກາງພັກປະຊາຊົນປະຕິວັດລາວ ໃນໂອກາດທີ່ມາຢ້ຽມຢາມ ແລະ ເຮັດວຽກກັບຄະນະໂຄສະນາສຶກສາສູນກາງພັກກອມມູນິດຫວຽດນາມ, ການຢ້ຽມຢາມຂອງຄະນະຜູ້ແທນຄັ້ງນີ້ໄດ້ດຳເນີນຢູ່ໃນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານຫວຽດນາມ – ລາວ ພັດທະນາຢ່າງຕັ້ງໜ້າ. ໃນສະພາບການທີ່ ຄະນະໂຄສະນາອົບຮົມສູນກາງພັກປະຊາຊົນປະຕິວັດລາວ ແລະ ຄະນະໂຄສະນາສຶກສາສູນກາງພັກກອມມູນິດຫວຽດນາມ ພວມຍູ້ແຮງການເພີ່ມທະວີການເຄື່ອນໄຫວພົວພັນແລກປ່ຽນ, ແລກປ່ຽນບົດຮຽນດ້ານວິຊາການ, ເຮັດໃຫ້ການຮ່ວມມືນັບມື້ນັບມີປະສິດທິຜົນ.
ສະຫາຍ ສາຄອນ ພົມມະລາດ ໄດ້ສະແດງຄວາມຂອບໃຈ ສະຫາຍ ຟານ ຊວນ ທູຍ ແລະ ຄະນະໂຄສະນາສຶກສາສູນກາງພັກກອມມູນິດຫວຽດນາມທີ່ໄດ້ໃຫ້ການຕ້ອນຮັບຢ່າງອົບອຸ່ນດ້ວຍຄວາມຮັກແພງ. ໃນການມາຢ້ຽມຢາມ ແລະ ເຮັດວຽກຢູ່ ສສ ຫວຽດນາມຄັ້ງນີ້ຈຸດປະສົງເພື່ອໃຫ້ຄະນະຜູ້ແທນໄດ້ແລກປ່ຽນ ແລະ ນຳເອົາບົດຮຽນໃນການປະຕິບັດວຽກງານຂ່າວຂອງຫວຽດນາມ ໃນສະພາບທີ່ພັກປະຊາຊົນປະຕິວັດລາວ ພວມປະຕິບັດແນວທາງປ່ຽນແປງໃໝ່ ແລະ ປັບປຸງວຽກງານໂຄສະນາອົບຮົມຂອງພັກໄປສູ່ການຫັນປ່ຽນໃໝ່.
ໃນຕອນທ້າຍພິທີ ສະຫາຍ ຟານ ຊວນ ທູຍ ຮອງຫົວໜ້າຄະນະໂຄສະນາສຶກສາສູນກາງພັກກອມມູນິດຫວຽດນາມ ສະເໜີໃຫ້ສອງປະເທດສືບຕໍ່ສົມທົບກັນຢ່າງແໜ້ນແຟ້ນ, ເພີ່ມທະວີການເຄື່ອນໄຫວແລກປ່ຽນ ແລະ ການຮ່ວມມື ພິເສດແມ່ນເພີ່ມທະວີການແລກປ່ຽນບົດຮຽນໃນການປົກຄອງປະເທດຊາດ ແລະ ບັນດາຜົນງານທີ່ບັນລຸໄດ້ດ້ານທິດສະດີ ແລະ ພາກປະຕິບັດຕໍ່ສັງຄົມນິຍົມ; ບັນດາຂໍ້ມູນຂ່າວສານ, ໂຄສະນາເຜີຍແຜ່ ແລະ ເພີ່ມທະວີສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລາວ – ຫວຽດນາມ.