ກອງປະຊຸມໃຫຍ່ ຄັ້ງທີ II ໜ່ວຍຮາກຖານຊາວໜຸ່ມກົມຂໍ້ມູນຂ່າວສານ ແລະ ຝຶກອົບຮົມ ແລະ ຫ້ອງການສະພາທິດສະດີສູນກາງພັກ ຄະນະໂຄສະນາອົບຮົມສູນກາງພັກ.
ໃນຕອນເຊົ້າຂອງວັນທີ 6 ສິງຫາ 2024 ໜ່ວຍຮາກຖານຊາວໜຸ່ມກົມຂໍ້ມູນຂ່າວສານ ແລະ ຝຶກອົບຮົມ ແລະ ຫ້ອງການສະພາທິດສະດີສູນກາງພັກ ຄະນະໂຄສະນາອົບຮົມສູນກາງພັກ ໄດ້ຈັດ ກອງປະຊຸມໃຫຍ່ ຄັ້ງທີ II ຂອງຕົນຂຶ້ນທີ່ ຫ້ອງປະຊຸມ ຊັ້ນ5 ຂອງ ຄະນະໂຄສະນາອົບຮົມສູນກາງພັກ; ໃຫ້ກຽດເຂົ້າຮ່ວມ ແລະ ເປັນປະທານກອງປະຊຸມໂດຍ ສະຫາຍ ວັນຕຸລາ ຣັກນຸດ ກໍາມະການຄະນະພັກ ຫົວໜ້າກົມຂໍ້ມູນຂ່າວສານ ແລະ ຝຶກອົບຮົມ, ປະທານຄະນະຫະພັນກໍາມະບານ ຄອສພ, ສະຫາຍ ນາງ ສຸກສະຫວັນ ອິນຄະວິໄລ ກໍາມະການຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ, ເລຂາຄະນະບໍລິຫານງານຊາວໜຸ່ມ ຄອສພ, ຕາງໜ້າໜ່ວຍຮາກຖານກໍາມະບານ ແລະ ໜ່ວຍສະຫະພັນແມ່ຍິງ ຂອງ ກົມຂໍ້ມູນຂ່າວສານ ແລະ ຝຶກອົບຮົມ, ບັນດາແຂກຖືກເຊີນຈາກໜ່ວຍຮາກຖານຊາວໜຸ່ມບັນດາກົມອ້ອມຂ້າງ ຄອສພ ພ້ອມດ້ວຍສະມາຊິກຊາວໜຸ່ມຂອງ ກົມຂໍ້ມູນຂ່າວສານ ແລະ ຝຶກອົບຮົມ ແລະ ຫ້ອງການສະພາທິດສະດີສູນກາງພັກ ເຂົ້າຮ່ວມຢ່າງພ້ອມພຽງ.
ກອງປະຊຸມໃຫຍ່ຄັ້ງນີ້ ສະຫາຍ ສຸລິຍາ ອິນທະວົງ ເລຂາໜ່ວຍຊາວໜຸຸ່ມກົມຂໍ້ມູນຂ່າວສານ ແລະ ຝຶກອົບຮົມ ແລະ ຫ້ອງການສະພາທິດສະດີສູນກາງພັກ ໄດ້ຂຶ້ນກ່າວ ເປີດກອງປະຊຸມຢ່າງເປັນທາງການ ພ້ອມທັງຜ່ານບົດລາຍງານການເມືອງຕໍ່ ກອງປະຊຸມໃຫຍ່ຄັ້ງທີ II ຂອງໜ່ວຍຊາວໜຸ່ມກົມຂໍ້ມູນຂ່າວສານ ແລະ ຝຶກອົບຮົມ ແລະ ຫ້ອງການສະພາທິດສະດີສູນກາງພັກອັນເປັນຂີດ ໝາຍສໍາຄັນຍິ່ງຕໍ່ຊີວິດການເມືອງຂອງໜ່ວຍຊາວໜຸ່ມຕະຫຼອດໄລຍະ 5 ປີຜ່ານມາເຊິ່ງສາມາດຍາດໄດ້ຜົນສຳເລັດໃນຫຼາຍດ້ານເປັນກ້າວໆມາ.
ກອງປະຊຸມໃຫຍ່ຄັ້ງທີ II ຄັ້ງນີ້ ຈະໄດ້ສຸມໃສ່ບາງບັນຫາທີ່ສໍາຄັນດັ່ງນີ້:
- ກອງປະຊຸມໄດ້ຄົ້ນຄ້ວາ ແລະ ຮັບຮອງເອົາບົດລາຍງານການເມືອງຂອງໜ່ວຍຊາວໜຸ່ມກົມຂໍ້ມູນຂ່າວສານ ແລະ ຝຶກອົບຮົມ ແລະ ຫ້ອງການສະພາທິດສະດີສູນກາງພັກ ຄະນະໂຄສະນາອົບຮົມສູນກາງພັກ ເຊິ່ງໄດ້ສະຫລູບຕີລາຄາດ້ານການຈັດຕັ້ງປະຕິບັດວຽກງານການເຄື່ອນໄຫວວິຊາສະເພາະ ຕິດພັນກັບການປະຕິບັດຂໍ້ແຂ່ງຂັນ 4 ບຸກຂອງຊາວໜຸ່ມໃນໄລຍະຜ່ານມາ; ພ້ອມກັນນັ້ນ ກໍໄດ້ກໍານົດທິດທາງ, ໜ້າທີ່ຈຸດສຸມວຽກງານໃນໄລຍະ 5 ປີ ຕໍ່ໜ້າ.
- ກອງປະຊຸມກໍໄດ້ສະຫຼຸບຕີລາຄາຄືນບົດສໍາຫຼວດການນໍາພາຂອງຄະນະໜ່ວຍຊາວໜຸ່ມຊຸດເກົ່າກົມຂໍ້ມູນຂ່າວສານ ແລະ ຝຶກອົບຮົມ ແລະ ຫ້ອງການສະພາທິດສະດີສູນກາງພັກ ໃນໄລຍະ 5 ປີຜ່ານມາ. ພ້ອມກັນນີ້ ຄະນະໜ່ວຍຊາວໜຸ່ມຊຸດເກົ່າກໍໄດ້ອຳລາໜ້າທີ່; ກອງປະຊຸມໄດ້ສະເໜີເປົ້າໝາຍໃໝ່ໃນນັ້ນບັນດາສະມາຊິກຊາວໜຸ່ມໄດ້ໃຊ້ສິດປະຊາທິປະໄຕຂອງຕົນເພື່ອເລືອກເອົາຄະນະໜ່ວຍຊາວໜຸ່ມຊຸດໃໝ່ສືບຕໍ່ຊີ້ນຳ-ນຳພາວຽກງານຊາວໜຸ່ມໃຫ້ບັນລຸຄາດໝາຍທີ່ວາງໄວ້.
ຈາກນັ້ນ ສະຫາຍ ນາງ ສຸກສະຫວັນ ອິນຄະວິໄລ ກໍາມະການຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ, ເລຂາຄະນະບໍລິຫານງານຊາວໜຸ່ມ ຄອສພ ໄດ້ມີຄໍາເຫັນໂອ້ລົມຕໍ່ກອງປະຊຸມ ເຊິ່ງກ່ອນອື່ນສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການເຄື່ອນໄຫວຂອງຄະນະໜ່ວຍຊາວໜຸ່ມກົມຂໍ້ມູນຂ່າວສານ ແລະ ຝຶກອົບຮົມ ແລະ ຫ້ອງການສະພາທິດສະດີສູນກາງພັກ ທີ່ຍາດໄດ້ໃນໄລຍະຜ່ານມາເຊິ່ງສະແດງໃຫ້ເຫັນເຖິງຜົນງານໃນການຊີ້ນໍາ-ນໍາພາ ສະມາຊິກພາຍໃນໜ່ວຍໃນການເຄື່ອນໄຫວຈັດຕັ້ງປະຕິບັດວຽກງານອົງການຈັດຕັ້ງມະຫາຊົນ ຄຽງຄູ່ກັບການຈັດຕັ້ງປະຕິບັດໜ້າທີ່ວຽກງານວິຊາສະເພາະຂອງຕົນ ພ້ອມນັ້ນທ່ານຍັງໄດ້ມີຄໍາເຫັນເນັ້ນໜັກບາງຈຸດສໍາຄັນຕໍ່ບັນດາສະມາຊິກຊາວໜຸ່ມໃນການເລືອກເອົາຄະນະໜ່ວຍຊຸດໃໝ່.
ກອງປະຊຸມໄດ້ປ່ອນບັດເລືອກເອົາຄະນະໜ່ວຍຊາວໜຸ່ມຊຸດໃໝ່ ເຊິ່ງເລືອກໄດ້ 3 ສະຫາຍຄື:
- ສະຫາຍ ກົງເພັດ ສີອຸດົມ ເປັນເລຂາໜ່ວຍ
- ສະຫາຍ ນ. ສອນນາລີ ຫາວັນນະລາດ ເປັນຮອງເລຂາໜ່ວຍ
- ສະຫາຍ ຄອນສະຫວັນ ເນົາວະລັງສີ ເປັນຄະນະ
ໃນຕອນທ້າຍຂອງພິທີ ກອງປະຊຸມຍັງໄດ້ຮັບຟັງການໂອ້ລົມຂອງ ສະຫາຍ ວັນຕຸລາ ຣັກນຸດ ກໍາມະການຄະນະພັກ ຫົວໜ້າກົມຂໍ້ມູນຂ່າວສານ ແລະ ຝຶກອົບຮົມ, ປະທານຄະນະຫະພັນກໍາມະບານ ຄອສພ ເຊິ່ງທ່ານກ່າວວ່າ ກອງປະຊຸມໃຫຍ່ໜ່ວຍຊາວໜຸ່ມກົມກົມຂໍ້ມູນຂ່າວສານ ແລະ ຝຶກອົບຮົມ ຄະນະໂຄສະນາອົບຮົມສູນກາງພັກ ຄັ້ງທີ່ II ນີ້ ເປັນຂີດໝາຍທີ່ສຳຄັນໃນຊີວິດການເມືອງຂອງໜ່ວຍຊາວໜຸ່ມພວກເຮົາ ເພາະກອງປະຊຸມໃຫຍ່ໄດ້ສັງເກດຕີລາຄາຢ່າງຮອບດ້ານ, ພາວະວິໄສ, ກົງໄປກົງມາຕໍ່ການເຄື່ອນໄຫວຈັດຕັ້ງປະຕິບັດທິດທາງໜ້າທີ່ໃນໄລຍະຜ່ານມາ ໂດຍຊີ້ໃຫ້ເຫັນຜົນງານ ແລະ ຜົນສຳເລັດທີ່ຍາດມາໄດ້ ໃນຕະຫຼອດໄລຍະທີ່ຜ່ານມາເສີມຂະຫຍາຍດ້ານດີທີ່ຕັ້ງໜ້າ ແລະ ດ້ານອ່ອນທີ່ຄົງຄ້າງ ໃຫ້ສອດຄ່ອງກັບເງື່ອນໄຂສະພາບຕົວຈິງ, ກອງປະຊຸມໃຫຍ່ຄັ້ງນີ້ຍັງໄດ້ກຳນົດທິດທາງໜ້າທີ່ຕົ້ນຕໍໄລຍະ 5 ປີຕໍ່ໜ້າ. ໃນໂອກາດນີ້ ປະທານໄດ້ເນັ້ນໃຫ້ຄະນະໜ່ວຍຊາວໜຸ່ມກົມຂໍ້ມູນຂ່າວສານ ແລະ ຝຶກອົບຮົມ ແລະ ຫ້ອງການສະພາທິດສະດີສູນກາງພັກ ຄະນະໂຄະນາອົບຮົມສູນກາງພັກເຮົາ ຕ້ອງໄດ້ເອົາໃຈໃສ່ຍົກສູງຄວາມຮັບຜິດຊອບຈຳນວນໜຶ່ງດັ່ງນີ້:
- ຕັ້ງໜ້າຝຶກຝົນຫຼໍ່ຫຼອມຮ່ຳຮຽນໃຫ້ມີຄວາມຮູ້, ຄວາມສາມາດ, ມີຫຼັກໝັ້ນການເມືອງ, ມີຄຸນສົມບັດສິນທຳປະຕິວັດ, ມີຄວາມສາມັກຄີເປັນປຶກແຜ່ນ, ມີຄວາມດຸໝັ່ນພາກພຽນ, ມີນຳໃຈສາມັກຄີເອື້ອເຝື້ອເພື່ອແຜ່, ມີຄວາມບໍລິສຸດສັດຊື່, ມີຄວາມແຂງແຮງທາງດ້ານຮ່າງກາຍ ແລະ ຈິດໃຈ,ຮູ້ປະຕິບັດສິດ ແລະ ພັນທະໜ້າທີ່ ຂອງຕົນເປັນຢ່າງດີ.
- ຄົ້ນຄວ້າຮໍ່າຮຽນທິດສະດີມາກ-ເລນິນ, ແນວທາງນະໂຍບາຍ, ມະຕິ, ຄຳສັ່ງຂອງພັກ, ກົດໝາຍຂອງລັດ, ມູນເຊື້ອຂອງພັກ, ຂອງຊາດ, ຂອງບັນດາທ່ານຜູ້ນຳ ແລະ ຊາວໝຸ່ມຮຸ່ນກ່ອນໃຫ້ເລິກເຊິງ ເພື່ອນຳໄປປຸກລະດົມປວງຊົນລາວໃຫ້ຕື່ນຕົວເປັນເຈົ້າການປະກອບສ່ວນຢ່າງຕັ້ງໜ້າ ໃນການປະຕິບັດຕາມແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດໃຫ້ປະກົດຜົນເປັນຈິງ.
- ຊາວໜຸ່ມຕ້ອງບຸກໜ້າບື່ນຕົວພັດທະນາຕົນເອງໃຫ້ມີຄວາມຮູ້, ຄວາມສາມາດໃນວິຊາສະເພາະຂອງຕົນທີ່ແນ່ນອນ, ຕັ້ງໜ້າຊອກຮູ້ຮ່ຳຮຽນຈາກຜູ້ມີປະສົບການ, ນໍາເອກະສານຕ່າງໆ ເພື່ອພັດທະນາຕົນເອງຢ່າງບໍ່ຢຸດຢັ້ງ. ສຳຄັນກ່ວາໝູ່ ສຳລັບຊາວໝຸ່ມຄະນະໂຄສະນາອົບຮົມສູນກາງພັກ ຕ້ອງຮູ້ຂຽນ, ຮູ້ສັງລວມບັນຫາ, ຮູ້ໂຄສະນາ-ປາຖະກະຖາ, ເວົ້າໃຫ້ຄົນເຂົ້າໃຈ, ມີເຫດຜົນຊວນເຊື້ອສູງ.
- ສະມາຊິກຊາວໜຸ່ມຕ້ອງມີຫຼັກໝັ້ນການເມືອງໜັກແໜ້ນ ໃນການຮັບຮູ້ຂໍ້ມູນຂ່າວສານທີ່ຖືກ ຕ້ອງ ເພາະວ່າປັດຈຸບັນໄດ້ມີພວກຄົນບໍ່ດີພະຍາຍາມຊັກຈູງຊາວໝຸ່ມ-ໄວໜຸ່ມ ເພື່ອຕ້ານພັກ-ລັດເຮົາ ໂດຍນໍາໃຊ້ສື່ສັງຄົມອອນລາຍ ເປັນຕົ້ນແມ່ນ: ຜ່ານທາງ Facebook, ເວັບໄຊຕ່າງໆ…ຕໍານິວິຈານ, ໂຈມຕີໃສ່ຮ້າຍປ້ານສີຕໍ່ແນວທາງນະໂຍບາຍຂອງພັກ. ດັ່ງນັ້ນ, ສະມາຊິກຊາວໝຸ່ມຕ້ອງມີສະຕິລະວັງຕົວ, ໃຊ້ເຫດໃຊ້ຜົນ ແລະ ເປັນເຈົ້າການຕອບຕ້ານຕໍ່ຖ້ອຍທຳນອງບິດເບື່ອນໃສ່ຮ້າຍປ້າຍສີເຫຼົ່ານັ້ນ ຢ່າງທັນການ.
- ຄະນະຊາວໜຸ່ມກົມຂໍ້ມູນຂ່າວສານ ແລະ ຝຶກອົບຮົມຕ້ອງໄດ້ເອົາໃຈໃສ່ປັບປຸງການຈັດຕັ້ງ, ປັບປຸງແບບແຜນການນຳພາ ແລະ ການເຄື່ອນໄຫວ ເປັນຕົ້ນແມ່ນ: ປະຕິບັດລະບອບດຳເນີນຊີວິດຕ້ອງ ເຮັດເປັນປົກກະຕິ ໂດຍຖືເອົາເນື້ອໃນຂໍ້ແຂ່ງຂັນ 4 ບຸກ ເປັນບ່ອນອີງໃນການສຳຫຼວດກວດກາຕີລາຄາເຄື່ອນໄຫວຂອງຊາວໜຸ່ມໃຫ້ຟົດຟື້ນ ແລະ ພົ້ນເດັ່ນວຽກງານວິຊາສະເພາະ, ຂະບວນການກິລາ, ຂະບວນການສິລະປະ ແລະ ອື່ນໆ.
- ໃນເງື່ອນໄຂທີ່ປະເທດຂອງພວກເຮົາ ພວມຫັນໄປສູ່ຍຸກແຫ່ງການເຊື່ອມໂຍງສາກົນ ຊຶ່ງກໍ່ແມ່ນຍຸກການປະຕິວັດອຸດສາຫະກໍາຄັ້ງທີ 4 ( ຍຸກ 4.0 ), ສະມາຊິກຊາວໜຸ່ມພວກເຮົາ ຕ້ອງໄດ້ຕັ້ງໜ້າຮຽນຮູ້ ແລະ ພັດທະນາຕົນເອງ ເພື່ອປັບຕົວເຂົ້າກັບການພັດທະນາດ້ານວິທະຍາສາດເຕັກໂນໂລຊີ, ສາມາດຊົມໃຊ້ທ່າແຮງຂອງນະວັດຕະກໍາແບບໃໝ່ຢ່າງປະດິດສ້າງ ເຂົ້າໃນວຽກໂຄສະນາອົບຮົມໄປສູ່ຄວາມທັນສະໄໝ ແລະ ນຳໃຊ້ເຕັກໂນໂລຊີໃຫ້ເກີດຜົນປະໂຫຍດສູງສຸດໃນການປະຕິບັດວຽກງານ ຄຽງຄູ່ກັບການປົກປັກຮັກສາ ແລະ ເສີມຂະຫຍາຍວັດທະນະທໍາອັນດີງາມທີ່ເປັນເອກະລັກຂອງຊາດໄວ້ ໃຫ້ຢືນຍົງຄູ່ກັບຄົນລາວ, ຊາດລາວເຮົາຕະຫຼອດໄປ.
ຂ່າວ: ນ.ສົມພິນິດ
