ໃນຕອນບ່າຍຂອງ ວັນທີ 7 ພະຈິກ 2024 ກົມຂໍ້່ມູນຂ່າວສານ ແລະ ຝຶກອົບຮົມ ໄດ້ຈັດພິທີປີດຊຸດຝຶກອົບຮົມວິທີການຂຽນຂ່າວ, ບົດຄວາມລົງເຜິຍແຜ່ໃນສື່ເອເລັກໂຕຣນິກໃຫ້ແກ່ພະນັກງານ ຄະນະໂຄສະນາອົບຮົມແຂວງ ທົ່ວປະເທດ ຂຶ້ນທີ່ຫ້ອງປະຊຸມທາງໄກ (ຊັ້ນ4) ໃຫ້ກຽດເຂົ້າຮ່ວມ ແລະ ເປັນປະທານໂດຍ ທ່ານ ນ. ວິລະວອນ ພັນທະວົງ ຄະນະປະຈໍາພັກ ຮອງຫົວໜ້າຄະນະໂຄສະນາອົບຮົມສູນກາງພັກ, ຜູ້ຊີ້ນໍາວຽກງານກົມຂໍ້ມູນຂ່າວສານ ແລະ ຝຶກອົບຮົມ, ເຂົ້າຮ່ວມມີ: ທ່ານ ວັນຕຸລາ ຮັກນຸດ ກໍາມະການຄະນະພັກ ຫົວໜ້າກົມຂໍ້ມູນຂ່າວສານ ແລະ ຝຶກອົບຮົມ, ທ່ານ ພູວັນ ສຸວັນ ຮອງຫົວໜ້າກົມຂໍ້ມູນຂ່າວສານ ແລະ ຝຶກອົບຮົມ, ຄະນະຮັບຜິດຊອບຊຸດຝຶກອົບຮົມ ແລະ ບັນດານັກສໍາມະກອນ ຈາກໂຄສະນາອົບຮົມແຂວງ ທົ່ວປະເທດ ຈໍານວນ 134 ສະຫາຍ, ຍິງ 55 ສະຫາຍ.
ໃນພິທີ ທ່ານ ພູວັນ ສຸວັນ ຮອງຫົວໜ້າກົມຂໍ້ມູນຂ່າວສານ ແລະ ຝຶກອົບຮົມ ໄດ້ສະຫຼຸບລາຍງານຜົນສໍາເລັດຂອງຊຸດຝຶກອົບຮົມຄັ້ງນີ້ຕໍ່ທີ່ປະຊຸມ ເຊິ່ງທ່ານໄດ້ກ່າວວ່າການຂື້ນຫ້ອງສອນໄດ້ຖືເອົາການບັນຍາຍຜ່ານລະບົບອອນລາຍ ແລະ ນໍາພານັກຝຶກອົບຮົມເຮັດຕົວຈິງ ມີການສົມທຽບລະຫ່ວາງທິດສະດີ ແລະ ພຶດຕິກຳມີການອະທິບາຍຊີ້ແຈງແຕ່ລະບັນຫາ, ແຕ່ລະຂັ້ນຕອນພ້ອມທັງເນັ້ນໜັກບັນດາຫຼັກການພື້ນຖານຂອງການຂຽນຂ່າວ, ເຕັກນິກການສຳພາດຂາວ, ຂັ້ນຕອນການລົງເກັບກຳຂ່າວ, ວິທີໃສ່ຫົວຂໍ້ຂ່າວ, ການໃຊ້ສໍານວນພາສາຂ່າວ, ການເຊື່ອມຕໍ່ປະໂຫຍກ, ວິທີການຂຽນຂ່າວບົດຕອບໂຕ້ທາງສື່ອອນລາຍ, ທີ່ສອດຄ່ອງກັບສະພາບການຕົວຈິ່ງໃນປັດຈຸບັນ, ພ້ອມທັງຍົກໃຫ້ເຫັນ ດ້ານດີ, ຈຸດອ່ອນຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້.
ໃນໂອກາດທີ່ມີຄວາມໝາຍສໍາຄັນດັ່ງກ່າວທ່ານ ນ. ວິລະວອນ ພັນທະວົງ ຄະນະປະຈໍາພັກ ຮອງຫົວໜ້າຄະນະໂຄສະນາອົບຮົມສູນກາງພັກ, ຜູ້ຊີ້ນໍາວຽກງານກົມຂໍ້ມູນຂ່າວສານ ແລະ ຝຶກອົບຮົມ ໄດ້ໃຫ້ກຽດໂອ້ລົມ ແລະ ກ່າວປິດຊຸດຝຶກອົບຮົມ ເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດຂອງນັກສໍາມະກອນທັງໝົດທີ່ເຂົ້າຮ່ວມຊຸດຝຶກອົບຮົມຄັ້ງນີ້ ແລະ ຊົມເຊີຍຄະນະຮັບຜິດຊອບຊຸດຝຶກອົບຮົມໃນການກະກຽມບັນດາເນື້ອໃນ ຮູບການຈັດຕັ້ງພິທີເປີດຊຸດຝຶກອົບຮົມແບບທາງໄກໃຫ້ແກ່ພະນັກງານ ຄະນະໂຄສະນາອົບຮົມແຂວງ ທົ່ວປະເທດ ດ້ວຍຄວາມຮັບຜິດຊອບສູງ ແລະ ໄດ້ຮັບຜົນສໍາເລັດຕາມຄາດໝາຍ; ຜ່ານການຝຶກອົບຮົມເຫັນວ່ານັກສໍາມະນາກອນທີ່ເຂົ້າຮ່ວມຝຶກອົບຮົມມີຄວາມຕັ້ງໃຈ, ເອົາໃຈໃສ່ໃນການຕິດຕາມການບັນຍາຍຂອງອາຈານ, ມີການຄົ້ນຄ້ວາ, ສອບຖາມແລກປ່ຽນປະກອບຄໍາຄິດ, ຄໍາເຫັນໃນແຕ່ລະຫົວຂໍ້ດ້ວຍບັນຍາກາດທີ່ເປັນກັນເອງ, ນອກຈາກນັ້ນ ຄະນະຮັບຜິດຊອບ, ອາຈານທີ່ຂື້ນຫ້ອງສອນ ໄດ້ມີຄວາມພະຍາຍາມເອົາໃຈໃສ່ ໃນການສົ່ງຄວາມຮູ້, ແນະນໍາອະທິບາຍຊີ້ແຈງເຮັດໃຫ້ນັກຝຶກອົບຮົມສາມາດກໍາໄດ້ເນື້ອໃນບົດຮຽນໃນດ້ານຕ່າງໆ ເພື່ອໝູນໃຊ້ເຂົ້້າໃນການປະຕິບັດວຽກງານວິຊາສະເພາະໃຫ້ມີຄຸນນະພາບສູງ ຕໍ່ຜົນສໍາເລັດຂອງການຝຶກອົບຮົມຄັ້ງນີ້ເຖິງວ່າຈະໃຊ້ເວລາສັ້ນ ແຕ່ດ້ວຍຄວາມເອົາໃຈໃສ່ ຂອງນັກຝຶກອົບຮົມ ເຫັນໄດ້ບົດບາດຄວາມສໍາຄັນຂອງວຽກງານສື່ເອເລັກໂຕຮນິກ ທັງພາກທິດສະດີ ແລະ ພາກປະຕິບັດຕົວຈິງ ຕາມຄວາມຮຽກຮ້ອງຕ້ອງການຂອງໜ້າທີ່ວຽກງານໃນໄລຍະໃໝ່ ພວກເຮົາຈະຕ້ອງໄດ້ເອົາໃຈໃສ່ສືບຕໍ່ຄົ້ນຄວ້າ, ຖອດຖອນບົດຮຽນທີ່ໄດ້ຮໍ່າຮຽນມາແລ້ວນັ້ນນໍາໄປຈັດຕັ້ງປະຕິບັດຕົວຈິງ ນອກຈາກນັ້ນທ່ານຍັງໄດ້ມີຄວາມເຫັນເນັ້ນຕື່ມບາງບັນຫາດັ່ງນີ້:
1. ຍົກສູງຄວາມຮັບຜິດຊອບ ແລະ ຄວາມເປັນເຈົ້າການ ໂດຍຖືເອົາຜົນສໍາເລັດໃນການຝຶກອົບຮົມນໍາເອົາບົດຮຽນຄວາມຮູ້ໃນດ້ານຕ່າງໆ ເປັນບ່ອນອີງໃນການປະກອບສ່ວນເຂົ້້າໃນການຈັດຕັ້ງປະຕິບັດວຽກງານການເມືອງແນວຄິດ, ວຽກງານໂຄສະນາອົບຮົມຂອງແຂວງຢ່າງມີປະສິດຕິພາບ ແລະ ປະສິດທິຜົນສູງເພື່ອຕອບສະຫນອງຄວາມຮຽກຮ້ອງຕ້ອງການຂອງຫນ້າທີ່ການເມືອງຕາມເປົ້າໝາຍທີ່ກໍານົດໄວ້.
2. ຄະນະພັກ ຄະນະນໍາຂອງບັນດາຄະນະໂຄສະນາອົບຮົມແຂວງ ຕ້ອງໄດ້ຊຸກຍູ້ ສົ່ງເສີມໃນການຈັດຕັ້ງປະຕິບັດຕົວຈິງໃນການຕິດຕາມກວດກາບັນດາເນື້ອໃນ, ວິທີການ, ຮູບການໃນການເຜີຍແຜ່ບັນດາເນື້ອໃນຂ່າວສານ, ບົດຄວາມຕ່າງໆລົງໃນສື່ເອເລັກໂຕຣນິກ ໃຫ້ມີຂໍ້ມູນຂ່າວສານທີ່ຫຼາກຫຼາຍລົງໂຄສະນາເຜີຍແຜ່ໃນບັນດາສື່ທີ່ຕົນຄຸ້ມຄອງ ເຊິ່ງໃນປີນີ້ດ້ານເຕັກນິກການບໍລິຫານຈັດການເຮົາກໍ່ໄດ້ຝຶກສຳເລັດແລ້ວ, ດ້ານເນື້ອໃນ ການຂຽນບົດ, ບັນດາບັນຫາທີ່ຕ້ອງເອົາໃຈໃສ່ກໍ່ໄດ້ຝຶກ ແລະ ຮັບຮູ້ແລ້ວ ຫວັງຢ່າງຍີ່ງວ່າ ພາຍຫຼັງປິດພິທີໃນຄັ້ງນີ້ພວກເຮົາຈະໄດ້ເຫັນການໂຄສະນາເຜີຍແຜ່ຂໍ້ມູນຂ່າວສານຂອງຄະນະໂຄສະນາອົບຮົມບັນດາແຂວງຈະມີການຫັນປ່ຽນໄປສູ່ອັນໃໝ່ຢ່າງຕັ້ງໜ້າ.
3. ເພີ່ມກົນໄກການປະສານງານລະຫວ່າງແຂວງຫາເມືອງໃນການຖອດຖອນບົດຮຽນ, ປະສົບການໃນການຈັດຕັ້ງປະຕິບັດວຽກງານສື່ເອເລັກໂຕຣນິກ ແລະ ເພີ່ມຄວາມເອົາໃຈໃສ່ໃນການປະສານງານຮ່ວມກັບຄະນະຮັບຜິດຊອບຂັ້ນສູນກາງ.
4. ພະຍາຍາມຄົ້ນຄວ້າ ແລະ ສ້າງພະນັກງານ, ພາຍໃນແຂວງ, ບັນດາເມືອງຂອງຕົນ ໃຫ້ກາຍເປັນຜູ້ຊ່ຽວຊານ ກາຍເປັນນັກຄົ້ນຄວ້າ, ນັກຂີດຂຽນ, ນັກປາຖະກະຖາ ເພື່ອເຮັດໃຫ້ການປະຕິບັດໜ້າທີ່ວຽກງານມີປະສິດທິພາບ ແລະ ສອດຄ່ອງກັບໜ້າທີ່ວຽກງານໃນແຕ່ລະໄລຍະ.
