ໃນຕອນເຊົ້າຂອງ ວັນທີ 4 ພະຈິກ 2024 ກົມຂໍ້່ມູນຂ່າວສານ ແລະ ຝຶກອົບຮົມ ໄດ້ຈັດພິທີເປີດຊຸດຝຶກອົບຮົມວິທີການຂຽນຂ່າວ, ບົດຄວາມລົງເຜິຍແຜ່ໃນສື່ເອເລັກໂຕຣນິກ ໃຫ້ແກ່ພະນັກງານ ຄະນະໂຄສະນາອົບຮົມແຂວງ ທົ່ວປະເທດ ຂຶ້ນທີ່ຫ້ອງປະຊຸມທາງໄກ (ຊັ້ນ4) ໃຫ້ກຽດເຂົ້າຮ່ວມ ແລະ ເປັນປະທານໂດຍ ທ່ານ ນ. ວິລະວອນ ພັນທະວົງ ຄະນະປະຈໍາພັກ ຮອງຫົວໜ້າຄະນະໂຄສະນາອົບຮົມສູນກາງພັກ, ຜູ້ຊີ້ນໍາວຽກງານກົມຂໍ້ມູນຂ່າວສານ ແລະ ຝຶກອົບຮົມ. ເຂົ້າຮ່ວມມີ: ທ່ານ ວັນຕຸລາ ຮັກນຸດ ກໍາມະການຄະນະພັກ ຫົວໜ້າກົມຂໍ້ມູນຂ່າວສານ ແລະ ຝຶກອົບຮົມ, ທ່ານ ພູວັນ ສຸວັນ ຮອງຫົວໜ້າກົມຂໍ້ມູນຂ່າວສານ ແລະ ຝຶກອົບຮົມ, ທ່ານ ຄໍາວິສັນ ແກ້ວສຸວັນ ອະດີດຜູ້ຊ່ວຍຫົວໜ້າຄະນະໂຄສະນາອົບຮົມສູນກາງພັກ, ຄະນະຮັບຜິດຊອບຊຸດຝຶກອົບຮົມ ແລະ ບັນດານັກສໍາມະກອນ ຈາກໂຄສະນາອົບຮົມແຂວງ ທົ່ວປະເທດ ຈໍານວນ 134 ສະຫາຍ, ຍິງ 55 ສະຫາຍ.
ໃນພິທີ ທ່ານ ພູວັນ ສຸວັນ ຮອງຫົວໜ້າກົມຂໍ້ມູນຂ່າວສານ ແລະ ຝຶກອົບຮົມ ໄດ້ກ່າວຈຸດປະສົງຂອງຊຸດຝຶກອົບຮົມຄັ້ງນີ້ເພື່ອສ້າງຄວາມເຂັ້ມແຂງໃຫ້ແກ່ພະນັກງານ, ນັກທິດສະດີ, ນັກໂຄສະນາ, ຢູ່ບັນດາແຂວງ, ເມືອງໃນການຂີດຂຽນບົດປະເພດຕ່າງໆລົງໂຄສະນາເຜີຍແຜ່ທາງອອນລາຍໃນຍຸກໃໝ່ແນ່ໃສ່ເຮັດໃຫ້ການໂຄສະນາເຜີຍແຜ່ຜ່ານທາງລະບົບເຕັກໂນໂລຊີມີຄວາມທັນສະໄໝ ຮັບປະກັນທັງຮູບການ ແລະ ເນື້ອໃນ ເຊີ່ງເລີ່ມຈາກການສ້າງພື້ນຖານຄວາມຮູ້ໃນການກັ່ນກອງຂໍ້ມູນຂ່າວສານ ແລະ ເຂົ້າໃຈຫຼັກການຂອງການຂຽນບົດຂ່າວ,ບົດຄວາມ ເຜີຍແຜ່ໃນສື່ເອເລັກໂຕຣນິກ, ນອກນັ້ນ ຍັງເຮັດໃຫ້ການໂຄສະ ນາເຜີຍແຜ່ບັນດາຂໍ້ມູນຂ່າວສານ, ການເຄື່ອນໄຫວວຽກງານຕ່າງໆຂອງແຂວງ ເວົ້າລວມ, ເວົ້າສະເພາະຂອງຄະນະໂຄສະນາອົບຮົມແຂວງ, ເມືອງໄດ້ຮັບການເຜີຍແຜ່ອອກສູ່ສັງຄົມຢ່າງກວ້າງຂວາງ ທັງອຸດົມສົມບູນໄປດ້ວຍເນື້ອໃນທີ່ມີເນື້ອໃນສາລະ ຈື່ງຈຳເປັນຕ້ອງໄດ້ບຳລຸງຍົກລະດັບໃຫ້ແກ່ຜູ້ທີ່ເຮັດວຽກຕົວຈິງໃຫ້ມີຄວາມຊໍານານ.
ໃນໂອກາດທີ່ມີຄວາມໝາຍສໍາຄັນດັ່ງກ່າວທ່ານ ນ. ວິລະວອນ ພັນທະວົງ ຄະນະປະຈໍາພັກ ຮອງຫົວໜ້າຄະນະໂຄສະນາອົບຮົມສູນກາງພັກ, ຜູ້ຊີ້ນໍາວຽກງານກົມຂໍ້ມູນຂ່າວສານ ແລະ ຝຶກອົບຮົມ ໄດ້ໃຫ້ກຽດກ່າວເປິດຊຸດຝຶກອົບຮົມ ພ້ອມທັງຮຽກຮ້ອງມາຍັງບັນດາທ່ານທ່ີ່ໄດ້ເຂົ້າຮ່ວມຊຸດຝຶກອົບຮົມຄັ້ງນີ້ ຈົ່ງພ້ອມກັນຍົກສູງຄວາມຮັບຜິດຊອບດ້ວຍຄວາມຫ້າວຫັນ, ເອົາໃຈໃສ່ຄົ້ນຄວ້າຍາດແຍ່ງເອົາຄວາມຮູ້, ແລກປ່ຽນບົດຮຽນນໍາບັນດານັກວິທະຍາກອນຜູ້ທີ່ຊ່ຽວຊານກ່ຽວກັບວິທີການຄົ້ນຄິດ, ວິທີການຂຽນບົດຂ່າວ, ບົດຄວາມເຜີຍແຜ່ຜ່ານສື່ເອເລັກໂຕຣນິກ, ເພື່ອຍົກສູງຄວາມຮູ້ ແລະ ປະສົບການໃນການບໍາລຸງຍົກລະດັບໃຫ້ແກ່ບັນດາສະຫາຍຜູ້ທີ່ເຮັດວຽກຕົວຈິງເພື່ອເປັນບ່ອນອີງ ແລະ ເປັນຄວາມຮູ້ພຶ້ນຖານທີ່ຈະນໍາໄປຫມູນໃຊ້ໃນການຈັດຕັ້ງປະຕິບັດຫນ້າທີ່ວຽກງານວິຊາສະເພາະຕົວຈິງຂອງຕົນ ແລະ ຖ່າຍທອດຄວາມຮູ້, ປະສົບການດັ່ງກ່າວລົງສູ່ບັນດາເມືອງໃຫ້ມີປະສິດທິພາບ ປະສິດທິຜົນສູງ ຕາມເປົ້າໝາຍການຫັນວຽກງານໂຄສະນາອົບຮົມໄປສູ່ຄຸນນະພາບໃໝ່.
ຊຸດຝຶກອົບຮົມຄັ້ງນີ້ຈະໄໍດ້ດໍາເນີນເປັນໄລຍະເວລາ 5 ວັນ ວັນທີ 4-8 ພະຈິກ 2024 ເຊິ່ງບົດຮຽນທັງໝົດປະກອບມີ 3 ບົດຄື:
ບົດທີ 1 ຫົວຂໍ້: ທັກສະການຂຽນຂ່າວແບບມືອາຊີບ ສະເໜີໂດຍ: ທ່ານ ຄໍາວິສັນ ແກ້ວສຸວັນ ອະດີດຜູ້ຊ່ວຍຫົວໜ້າຄະນະໂຄສະນາອົບຮົມສູນກາງພັກ.
ບົດທີ 2 ສະເໜີໂດຍ: ທ່ານ ວັນໄຊ ຕະວິນຍານ ກໍາມະການຄະນະພັກ ຮອງຫົວໜ້າຄະນະໂຄສະນາອົບຮົມສູນກາງພັກ, ຜູ້ບັນນາທິການໃຫຍ່ໜັງສືພິມປະຊາຊົນ.
ບົດທີ 3 ສະເໜີໂດຍ: ທ່ານ ວັນຕຸລາ ຮັກນຸດ ກໍາມະການຄະນະພັກ ຫົວໜ້າກົມຂໍ້ມູນຂ່າວສານ ແລະ ຝຶກອົບຮົມ.
