ພິທີຫວນຄືນມູນເຊື້ອວັນສ້າງຕັ້ງວາລະສານອະລຸນໃໝ່ ຄົບຮອບ 40 ປີ (22/3/1985 – 22/3/2025)
ໃນວັນທີ 24 ມີນານີ້ ຢູ່ທີ່ສະໂມສອນຄະນະໂຄສະນາອົບຮົມສູນກາງພັກ ໂດຍໃຫ້ກຽດເຂົ້າຮ່ວມຂອງ ສະຫາຍ ໝູນແກ້ວ ອໍລະບູນ ອະດີດກຳມະການສູນກາງພັກ ອະດີດຫົວໜ້າບັນນາທິການໃຫຍ່ວາລະສານອະລຸນໃໝ່ ອະດີດລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ; ອະດີດເຈົ້າແຂວງ ວຽງຈັນ; ມີສະຫາຍ ສາຄອນ ພົມມະລາດ ກຳມະການຄະນະພັກ ຮອງຫົວໜ້າຄະນະໂຄສະນາອົບຮົມສູນກາງພັກ, ມີບັນດາອະດີດຮອງຫົວໜ້າ ຄອສພ; ອະດີດ ບກ ໃຫຍ່ ວາລະສານ, ບັນດາແຂກທີ່ຖືກເຊີນຈາກບັນດາສື່ຕ່າງໆ, ພະນັກງານອາວຸໂສ-ບໍານານຂອງວາລະສານອະລຸນໃໝ່ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ກ່ອນເຂົ້າສູ່ພິທີໄດ້ຮັບຊົມວິດີໂອການນຳສະເໜີປະຫວັດ ແລະ ຜົນງານ ຂອງວາລະສານອະລຸນໃໝ່ໃນໄລຍະ 40 ຜ່ານມາໂດຍຫຍໍ້ ແລະ ການສຳພາດອະດີດການນຳ, ອະດີດພະນັກງານວາລະສານອະລຸນໃໝ່ເພື່ອຫວນຄືນມູນເຊື້ອອັນດີງາມຂອງວາລະສານທີ່ສືບທອດມາຈາກໜັງສືພິມ “ແສງສະຫວ່າງ” ຂອງພັກປະຊາຊົນ ປະຕິວັດລາວ ໃນເມື່ອກ່ອນ ຊຶ່ງເປັນຕົ້ນກຳເນີດຂອງວາລະສານ”ອະລຸນໃໝ່”. ເພື່ອສ້າງຄວາມຮັບຮູ້-ເຂົ້າໃຈ ແລະ ກຳໄດ້ຢ່າງເລິກເຊິ່ງເຖິງຄວາມສຳຄັນ ຈຳເປັນ, ບົດບາດທີ່ຕັ້ງຂອງວາລະສານອະລຸນໃໝ່ ໃນຖານະເປັນອົງການທິດສະດີ ແລະ ພຶດຕິກຳຂອງພັກ, ທັງເປັນການປຸກລະດົມເພື່ອປຸກລະດົມການຮ່ວມມື, ເຕົ້າໂຮມສະຕິປັນຍາ, ຄຳຄິດຄຳເຫັນຈາກບັນດານັກຂີດຂຽນ, ນັກຊ່ຽວຊານ, ນັກວິທະຍາສາດ ເພື່ອປັບປຸງ-ພັດທະນາວາລະສານອະລຸນໃໝ່ ໃຫ້ມີຄຸນນະພາບສູງສາມາດຕອບສະໜອງຄວາມຮຽກ ຮ້ອງຕ້ອງການຂອງໜ້າທີ່ການເມືອງສ່ອງແສງເຖິງທິດສະດີ ແລະ ພຶດຕິກຳຢ່າງສອດຄອງໃນໄລຍະໃໝ່, ໃຫ້ສົມກັບເປັນເຄື່ອງມືອັນແຫຼມຄົມຂອງພັກ. ສະນັ້ນ ເພື່ອລະນຶກເຖິງຜົນງານ, ຄຸນງາມຄວາມດີ ແລະ ສະແດງຄວາມຮູ້ບຸນຄຸນຕໍ່ອະດີດການນຳ, ພະນັກງານຫຼັກແຫຼ່ງຮຸ່ນກ່ອນຂອງວາລະສານ ແລະ ເພື່ອເປັນການປະກອບສ່ວນເຂົ້າໃນບັ້ນສະເຫຼີມສະຫຼອງ 3 ວັນປະຫວັດ ສາດໃນປີ 2025 ຊຶ່ງເປັນປີທີ່ມີຄວາມໝາຍຄວາມສຳຄັນສຳລັບທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະ ທົ່ວປວງຊົນລາວທັງຊາດ ໂດຍສະເພາະຕໍ່ກັບວາລະສານອະລຸນໃໝ່ ໃນຖານະວາລະສານທິດສະດີ ແລະ ພຶດຕິກຳຂອງພັກປະຊາຊົນ ປະຕິວັດລາວ.
ໃນໂອກາດດັ່ງກ່າວ, ສະຫາຍ ໝູນແກ້ວ ອໍລະບູນ ໄດ້ເລົ່າຫວນຄືນປະຫວັດຄວາມເປັນມາ, ຕົ້ນກຳເນີດ, ຄວາມສຳຄັນ, ຄວາມຈຳເປັນ, ທີ່ຕັ້ງ, ບົດບາດຂອງວາລະສານອະລຸນໃໝ່ ໃນຖານະເປັນອົງການທິດສະດີ ແລະ ພຶດຕິກຳຂອງສູນກາງພັກ, ເຮັດໜ້າທີ່ຕົ້ນຕໍໃນການຄົ້ນຄວ້າ-ໂຄສະນາເຜີຍແຜ່ທັດສະນະ, ແນວທາງນະໂຍບາຍຂອງພັກ, ແຜນນະໂຍບາຍຂອງລັດ; ຊີ້ແຈງອະທິບາຍ, ຕອບແກ້-ແນະນຳບັນຫາທີ່ສັງຄົມໃຫ້ຄວາມສົນໃຈຕໍ່ສະຖານະການເຫດການຢູ່ພາຍໃນ ແລະ ຕ່າງປະເທດ ເພື່ອສ້າງຄວາມຮັບຮູ້-ເຂົ້າໃຈທີ່ຖືກຕ້ອງໃຫ້ແກ່ມະຫາຊົນ. ນອກຈາກນັ້ນ ໃນພິທີດັ່ງກ່າວຍັງໄດ້ຮັບຟັງການປະກອບຄຳເຫັນໃນການເຄື່ອນໄຫວວຽກງານວາລະສານໃນຍຸກຂໍ້ມູນຂ່າວສານທີ່ທັນສະໄໝ ຫຼື ໃນຍຸກດີຈີຕອນ ຊຶ່ງບັນດາຄຳເຫັນດັ່ງກ່າວ ລ້ວນແຕ່ມີຄວາມສໍາຄັນ, ທັງເປັນບົດຮຽນ, ເປັນບັນຫາທີ່ວາລະສານອະລຸນໃໝ່ ກໍຄືພະນັກງານວາລະສານອະລຸນໃໝ່ທຸກຄົນຈະຕ້ອງໄດ້ເອົາໃຈໃສ່ຄົ້ນຄວ້າກຳແໜ້ນ ເພື່ອເປັນທິດທາງໃນການປັບປຸງ-ພັດທະນາວາລະສານ ນັບທັງດ້ານເນື້ອໃນ ແລະ ຮູບການໃຫ້ກ້າວສູ່ຄຸນນະພາບໃໝ່, ທັນຍຸກທັນສະໄໝ, ສາມາດປະຕິບັດບົດບາດເປັນອົງການທິດສະດີ ແລະ ພຶດຕິກຳຂອງສູນກາງພັກໄດ້ຢ່າງໜັກແໜ້ນ ເຂັ້ມແຂງ ແລະ ແຂງແຮງ.
