ນັກຂ່າວແມ່ຍິງລາວ ຮ່ວມຖອດຖອນບົດຮຽນການນຳໃຊ້ AI ແລະ ສື່ມວນຊົນຍຸກໃໝ່
ນັກຂ່າວແມ່ຍິງລາວ ຮ່ວມຖອດຖອນບົດຮຽນ 10 ຫົວຂໍ້ຫຼັກ ທີ່ເມືອງນານນິງ: ເນັ້ນການນຳໃຊ້ AI ແລະ ສື່ມວນຊົນຍຸກໃໝ່ ເພື່ອເຊື່ອມໂຍງວັດທະນະທຳ ອາຊຽນ-ຈີນ ນານນິງ, ສປ ຈີນ ເຂົ້າຮ່ວມມີ: ຄະນະນັກຂ່າວແມ່ຍິງ ຈາກສຳນັກຂ່າວລາວ ພ້ອມດ້ວຍເພື່ອນຮ່ວມອາຊີບສື່ມວນຊົນ ແລະ ພະນັກງານລັດຖະບານ ຈາກປະເທດມຽນມາ ແລະ ອິນໂດເນເຊຍ ລວມທັງໝົດ 27 ທ່ານ ໄດ້ຮ່ວມກັນເຈາະເລິກ 10 ຫົວຂໍ້ບັນຍາຍລະດັບສາກົນ ໃນກອງປະຊຸມສໍາມະນາ “Seminar for Female Multimedia Journalists from ASEAN Countries” ທີ່ຈັດຂຶ້ນຢູ່ ເມືອງນານນິງ ແຂວງກວາງຊີ ສປ ຈີນ ເພື່ອແນໃສ່ການຍົກລະດັບສັກກາຍະພາບຂອງແມ່ຍິງໃນວົງການສື່ສານມວນຊົນ ໃຫ້ກ້າວທັນກັບເຕັກໂນໂລຊີລະດັບໂລກ.
ການຝຶກອົບຮົມໃນຄັ້ງນີ້ ບໍ່ພຽງແຕ່ເປັນການສ້າງເຄືອຂ່າຍລະຫວ່າງອາຊຽນ ແລະ ຈີນ ເທົ່ານັ້ນ, ແຕ່ຍັງເປັນການເປີດມຸມມອງໃໝ່ຜ່ານ 10 ຫົວຂໍ້ການຮຽນຮູ້ທີ່ກວມເອົາທັງດ້ານທິດສະດີ, ເຕັກໂນໂລຊີ ແລະ ການພັດທະນາບົດບາດຍິງ-ຊາຍ ດັ່ງນີ້:
1. ການເຂົ້າເຖິງບໍລິບົດ ແລະ ຄວາມກ້າວໜ້າຂອງຈີນ: ຜູ້ເຂົ້າຮ່ວມໄດ້ເລີ່ມຕົ້ນຮຽນຮູ້ກ່ຽວກັບສະພາບເງື່ອນໄຂພື້ນຖານຂອງ ສປ ຈີນ ແລະ ຈຸດພິເສດຂອງເຂດປົກຄອງຕົນເອງກວາງຊີຈ້ວງ ເພື່ອເປັນພື້ນຖານໃນການເຂົ້າໃຈການພັດທະນາຂອງພາກພື້ນ.
2. ການປ່ຽນແປງ ແລະ ຈຸດຢືນຂອງສື່ແມ່ຍິງ: ຖອດບົດຮຽນກ່ຽວກັບ “ການປ່ຽນແປງຕົວຕົນ ແຕ່ບໍ່ປ່ຽນແປງຈຸດຢືນ” (Changing identity, Unchanging anchor) ເຊິ່ງເນັ້ນໃສ່ການເຕີບໂຕຂອງບຸກຄະລາກອນສື່ເພດຍິງໃນຕ່າງປະເທດ ທ່າມກາງຍຸກສະໄໝທີ່ປ່ຽນແປງຢ່າງຮວດໄວ.
3. ເຕັກນິກການຜະລິດສື່ແບບຄົບວົງຈອນ: ສຶກສາຂະບວນການຜະລິດຂ່າວ ແລະ ການບໍລິຫານຈັດການສື່ແບບຫຼາກຫຼາຍ (Converged Media Operation) ຕັ້ງແຕ່ຕົ້ນຈົນຈົບ.
4. ແນວຄິດວັດທະນະທຳ ແລະ ການສື່ສານຂ້າມວັດທະນະທຳ: ເຂົ້າຮ່ວມຖອດຖອນບົດຮຽນ ທີ່ຄະນະສື່ສານມວນຊົນ ມະຫາວິທະຍາໄລຊົນເຜົ່າກວາງຊີ (Guangxi Minzu University) ເພື່ອສຶກສາແນວຄິດດ້ານວັດທະນະທຳຂອງ ທ່ານ ສີ ຈິ້ນຜິງ ແລະ ຍຸດທະສາດການສື່ສານຂ້າມວັດທະນະທຳ.
5. ສະພາບລວມ ແລະ ການເກັບກຳຂ່າວໃນຍຸກອໍມີເດຍ (All-Media): ຮຽນຮູ້ພື້ນຖານຂອງສື່ມວນຊົນຈີນ ແລະ ເຕັກນິກການລົງພື້ນທີ່ເກັບກຳຂໍ້ມູນ ເພື່ອຜະລິດເນື້ອຫາໃນຮູບແບບສື່ປະສົມ.
6. ການສ້າງຂີດຄວາມສາມາດ ແລະ ການຮ່ວມມື: ເຈາະເລິກການສື່ສານຂ້າມວັດທະນະທຳ, ການສ້າງຄວາມສາມາດໃນການສື່ສານລະດັບຊາດ, ການປັ້ນບຸກຄະລາກອນສື່ໃນຮົ້ວມະຫາວິທະຍາໄລ ແລະ ການສົ່ງເສີມການແລກປ່ຽນ-ຮ່ວມມື ກັບບັນດາປະເທດອາຊຽນ.
7. ປັນຍາປະດິດ (AI) ກັບນະວັດຕະກຳສື່: ສຶກສາວິທີການທີ່ ປັນຍາປະດິດ ຫຼື AI ເຂົ້າມາມີບົດບາດໃນການຂັບເຄື່ອນ ແລະ ສ້າງນະວັດຕະກຳໃໝ່ໆ ໃຫ້ກັບການປະສົມປະສານສື່ວິທະຍາສາດ ແລະ ເຕັກໂນໂລຊີ.
8. ນະວັດຕະກຳຈາກມຸມມອງຂອງແມ່ຍິງ: ການຫັນເອົາຜົນສຳເລັດທາງວິທະຍາສາດ ແລະ ເຕັກໂນໂລຊີ ມາຜັນຂະຫຍາຍໃຫ້ເກີດຜົນໃນພາກອຸດສາຫະກຳ ແລະ ການພັດທະນາ ໂດຍເບິ່ງຜ່ານທັດສະນະຂອງເພດຍິງ.
9. ພາບລັກຂອງນັກວິຊາຊີຈາມບແມ່ຍິງໃນສື່: ການສ້າງ ແລະ ມູນຄ່າຂອງພາບລັກນັກວິຊາຊີບບາງສ່ວນຂອງແມ່ຍິງ (Female professional image) ຈາກມຸມມອງຂອງສື່ມວນຊົນ ເພື່ອສ້າງຄວາມເຊື່ອໝັ້ນ ແລະ ຄວາມເປັນມືອາຊີບ.
10. ສື່ໃໝ່ກັບຫ້ອງສະໝຸດອັດສະລິຍະ: ການນຳໃຊ້ສື່ຍຸກໃໝ່ ເຂົ້າມາພັດທະນາຫ້ອງສະໝຸດ ເພື່ອສ້າງປະສົບການການອ່ານແບບອັດສະລິຍະ (Smart Reading Experience).
ຜ່ານການຮຽນຮູ້ທັງ 10 ຫົວຂໍ້ຫຼັກນີ້, ຄະນະນັກຂ່າວແມ່ຍິງຈາກ ສປປ ລາວ, ມຽນມາ ແລະ ອິນໂດເນເຊຍ ບໍ່ພຽງແຕ່ໄດ້ຮັບຄວາມຮູ້ທາງດ້ານເຕັກນິກການນຳໃຊ້ AI ແລະ ສື່ດິຈິຕອນເທົ່ານັ້ນ, ແຕ່ຍັງໄດ້ແລກປ່ຽນທັດສະນະກ່ຽວກັບການຍົກສູງບົດບາດຂອງແມ່ຍິງໃນການເປັນຜູ້ນຳພາດ້ານການສື່ສານ ເພື່ອເພີ່ມທະວີຄວາມເຂົ້າອົກເຂົ້າໃຈ ແລະ ຄວາມຮ່ວມມືອັນດີງາມ ລະຫວ່າງ ອາຊຽນ ແລະ ສປ ຈີນ ໃຫ້ແໜ້ນແຟ້ນຍິ່ງໆຂຶ້ນໃນອະນາຄົດ.
