ພັກເຮົາ ຍາມໃດກໍຖືຊາວໜຸ່ມເປັນຂະບວນການຂອງພັກ
ເນື່ອງໃນໂອກາດວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ (22/3/1955-22/3/2025) ແລະ ວັນສ້າງຕັ້ງຄະນະຊາວໜຸ່ມປະຊາຊົນປະຕິວັດລາວ ຄົບຮອບ 70 ປີ (14/4/1955-14/4/2025) ເຊິ່ງທັງ 02 ເຫດການປະຫວັດສາດ ສຸດທີ່ມີຄວາມໝາຍສໍາຄັນຢ່າງຍິ່ງ.
ພັກເຮົາກໍາເນີດເກີດຂຶ້ນຈາກຂະບວນການຕໍ່ສູ້ຂອງປະຊາຊົນບັນດາເຜົ່າໂດຍແມ່ນກຳລັງຊາວໜຸ່ມເປັນກຳລັງຫຼັກແຫຼ່ງໃນການຕ້ານການຮຸກຮານຈາກຈັກກະພັດລ່າເມືອງຂຶ້ນ, ເພື່ອປົດປ່ອຍຊາດ ນໍາພາປະເທດຊາດກ້າວຂຶ້ນຕາມເສັ້ນທາງສັງຄົມນິຍົມ; ພັກເຮົາສືບທອດມາຈາກພັກກອມມູນິດອິນດູຈີນ ໂດຍຢຶດໝັ້ນລັດທິມາກ-ເລນິນ, ແນວຄິດ ໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງປະຊາຊົນລາວບັນດາເຜົ່າ, ນໍາພາຂະບວນການຕໍ່ສູ້ຂອງປະຊາຊົນບັນດາເຜົ່າຜ່ານເສັ້ນທາງຢ່າງລະອິດລະອ້ຽວ, ຍືດເຍື້ອຍາວນານ, ແຕ່ໃນທີ່ສຸດກໍສາມາດຍາດໄຊຊະນະໄດ້; ຈາກໄຊຊະນະນີ້ ສູ່ໄຊຊະນະໃໝ່ ທີ່ໃຫຍ່ຫຼວງກວ່າເກົ່າຈົນສາມາດປົດປ່ອຍປະຊາຊົນອອກຈາກແອກປົກຄອງຂອງພວກສັກດີນາລ່າເມືອງຂຶ້ນ, ກາຍເປັນພັກກໍາອໍານາດ ແລະ ນໍາພາປະຊາຊົນກ້າວສູ່ໄລຍະຂອງການປະຕິບັດສອງໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາພັດທະນາປະເທດ.
ໃນໂອກາດທີ່ມີຄວາມໝາຍສຳຄັນນີ້ທ່ານ ນາງ ວິລະວອນ ພັນທະວົງ ຄະນະປະຈໍາພັກ, ຮອງຫົວໜ້າຄະນະໂຄສະນາອົບຮົມສູນກາງພັກ (ຄອສພ), ຜູ້ຊີ້ນຳອົງການຈັດຕັ້ງມະຫາຊົນ ໄດ້ສະແດງຄວາມຮູ້ສຶກຂອງຕົນຜ່ານສື່ມວນຊົນເມື່ອບໍ່ດົນນີ້ວ່າ: ຕະຫຼອດໄລຍະ 70 ປີຜ່ານມາ, ພາຍໃຕ້ການຊີ້ນໍາ-ນໍາພາ ຂອງພັກປະຊາຊົນ ປະຕິວັດລາວ ຍາມໃດກໍຖືວ່າຊາວໜຸ່ມແມ່ນອະນາຄົດຂອງຊາດ, ແມ່ນຄວາມຫວັງຂອງພັກເຮົາ, ແມ່ນຜູ້ສືບຕໍ່ນຳເອົາຄັນທຸງອັນສະຫງ່າລາສີຂອງພັກ ໄປເຖິງໄຊຊະນະທີ່ສົມບູນ, ຊາວໜຸ່ມເປັນກຳລັງອັນໃຫຍ່ຫຼວງ, ມີຖານະບົດບາດສຳຄັນທີ່ສຸດໃນການແບກຫາບພາລະກິດທີ່ໜັກໜ່ວງ, ເປັນຕົ້ນແມ່ນການເພີ່ມພູນຜະລິດຜົນ, ການສູ້ຮົບ, ການຄົ້ນຄວ້າວິທະຍາສາດ ແລະ ອື່ນໆ. ໃນປະຫວັດສາດຂອງຊາດລາວ ໄດ້ຢັ້ງຢືນໄວ້ຢ່າງຈະແຈ້ງວ່າ ວິລະກໍາຂອງຊາວໜຸ່ມລາວ ໃນພາລະກິດຕໍ່ສູ້ກູ້ຊາດ ຊາວໜຸ່ມລາວບັນດາເຜົ່າຜູ້ຮັກຊາດ ແມ່ນກຳລັງສືບທອດທີ່ດີ ແລະ ເປັນກຳລັງທີ່ໄວ້ເນື້ອເຊື່ອໃຈຂອງພັກປະຊາຊົນ ປະຕິວັດລາວ, ເປັນກຳລັງແຮງຕົ້ນຕໍແມ່ນກະດູກສັນຫຼັງຂອງປະເທດຊາດ.
ໃນເງື່ອນໄຂໃໝ່ຂອງການປະຕິວັດ ກໍຄືປັດຈຸບັນ ພວກເຮົາພວມຢູ່ໃນທ່າມກາງທີ່ໂລກ, ພາກພື້ນໄດ້ມີຫຼາຍເຫດການທີ່ສຳຄັນທາງດ້ານການເມືອງ, ເສດຖະກິດ-ສັງຄົມ, ຄວາມໝັ້ນຄົງ, ຄວາມກ້າວໜ້າດ້ານເຕັກນິກ-ເຕັກໂນໂລຊີ, ນະວັດຕະກຳ, ໄພທຳມະຊາດ, ໂຣກລະບາດ ແລະ ອື່ນໆ ເຊິ່ງສ້າງຜົນກະທົບທັງດ້ານຕັ້ງໜ້າ ແລະ ດ້ານຫຍໍ້ທໍ້ຕໍ່ແນວຄິດ-ຈິດຕະສາດຂອງຄົນໃນສັງຄົມ ເວົ້າລວມ, ເວົ້າສະເພາະຖັນແຖວຊາວໜຸ່ມ; ເພື່ອເຮັດສໍາເລັດພາລະກິດປົກປັກຮັກສາຄວາມສະຫງົບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍ, ປອດໄພທາງດ້ານສັງຄົມ ໂດຍຢືນຕໍ່ໜ້າສະພາບການທີ່ມີສິ່ງທ້າທາຍທົດສອບນາໆປະການ ຕໍ່ຊາວໜຸ່ມ ເຊິ່ງເປັນກຳລັງແຮງຕົ້ນຕໍຂອງສັງຄົມ. ດັ່ງນັ້ນ, ຄະນະພັກແຕ່ລະຂັ້ນ ຈຶ່ງຕ້ອງໄດ້ສືບຕໍ່ເພີ່ມທະວີໃນການເສີມຂະຫຍາຍທາດແທ້-ມູນເຊື້ອປະຕິວັດອັນສະຫງ່າງາມຂອງພັກ ເຂົ້າໃນການກໍ່ສ້າງຊາວໜຸ່ມ ໃນສະພາບການໃໝ່ ໂດຍສືບຕໍ່ ເພີ່ມທະວີສຶກສາອົບຮົມການເມືອງ-ແນວຄິດ ໃນຖັນແຖວຊາວໜຸ່ມ ໃຫ້ແຂງແຮງ ແລະ ກວ້າງຂວາງກວ່າເກົ່າ; ສືບຕໍ່ປັບປຸງກົງຈັກ, ກໍ່ສ້າງບຸກຄະລາກອນຊາວໜຸ່ມຂັ້ນຕ່າງໆໃຫ້ມີຄວາມຮູ້, ຄວາມສາມາດ, ມີຄຸນສົມບັດສິນທໍາປະຕິວັດ, ມີທາດແທ້ການເມືອງໜັກແໜ້ນ, ໃນນີ້ສຸມໃສ່ກໍ່ສ້າງພະນັກງານສືບທອດປ່ຽນແທນໃຫ້ແຂງແຮງກວ່າເກົ່າ; ທັງຍູ້ແຮງຂະບວນການຕະລຸມບອນ ຂອງຊາວໜຸ່ມ ເຂົ້າໃນການພັດທະນາປະເທດຊາດ.
ຂ້າພະເຈົ້າ ໃນນາມຄະນະນໍາ ຄະນະໂຄສະນາອົບຮົມສູນກາງພັກ ທັງເປັນຜູ້ຊີ້ນໍາວຽກງານອົງການຈັດຕັ້ງມະຫາຊົນ ເວົ້າລວມ, ເວົ້າສະເພາະ ອົງການຈັດຕັ້ງຊາວໜຸ່ມ ຂອງຄະນະໂຄສະນາອົບຮົມສູນກາງພັກ ຖືເອົາໂອກາດນີ້ ຂໍສະແດງຄວາມຮູ້ບຸນຄຸນ ແລະ ເຊື່ອໝັ້ນຢ່າງໜັກແໜ້ນຕໍ່ການນຳພາຂອງພັກ ພ້ອມທັງຈະສຸມທຸກສະຕິປັນຍາ ຄວາມຮູ້-ຄວາມສາມາດຂອງຕົນ ເພື່ອພາລະກິດປະຕິວັດ ແລະ ຂໍອວຍພອນໄຊອັນປະເສີດມາຍັງການນໍາພັກ-ລັດ ທຸກຂັ້ນ ຈົ່ງມີສຸຂະພາບເຂັ້ມແຂງ ສືບຕໍ່ນໍາພາປະເທດຊາດກ້າວຂຶ້ນຢ່າງບໍ່ຢຸດຢັ້ງ; ອວຍພອນໄຊອັນປະເສີດ ມາຍັງຖັນແຖວຊາວໜຸ່ມທຸກຖ້ວນໜ້າ ຈົ່ງມີສຸຂະພາບເຂັ້ມແຂງມີພະລານາໄມສົມບູນສືບຕໍ່ຈັດຕັ້ງຜັນຂະຫຍາຍເນື້ອໃນຂໍ້ແຂ່ງຂັນ 4 ບຸກຂອງຊາວໝຸ່ມເພື່ອສ້າງຜົນງານຂໍ່ານັບຮັບຕ້ອນກອງປະຊຸມໃຫຍ່ ຄັ້ງທີ V ຂອງຊາວໜຸ່ມ ຄອສພ ທີ່ຈະໄຂຂຶ້ນໃນໄວໆນີ້ ເພື່ອໃຫ້ສົມດັ່ງຄໍາເວົ້າຂອງປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກໄດ້ມອບນາມມະຍົດໃຫ້ຊາວໝຸ່ມທີ່ວ່າ: “ຊາວໜຸ່ມຈົ່ງເປັນດັ່ງນົກອິນຊີ ທີ່ບໍ່ຫັ່ວນກົວຕໍ່ພະຍຸລົມແດງ ຈົ່ງກາຍເປັນສິນໄຊ ແຫ່ງຍຸກສະໄໜຂອງພວກເຮົາ ອິນຊີທັງຫຼາຍຈົ່ງບິນໃຫ້ສູງ ບິນໃຫ້ໄປແສນໄກ ໃຕ້ທ້ອງຟ້າສີຄາມຂອງປະເທດຊາດ”.
(ພາບ-ຂ່າວ: ມີໄຊ)