ພິທີສະຫຼຸບການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ຍ້ອງຍໍຜົນງານດີເດັ່ນປະຈຳປີ 2019
ຕອນເຊົ້າວັນທີ 13 ກໍລະກົດ 2020 ຄະນະໂຄສະນາອົບຮົມສູນກາງພັກ ໄດ້ຈັດພິທີສະຫຼຸບການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ຍ້ອງຍໍຜົນງານດີເດັ່ນປະຈຳປີ 2019 ຂື້ນທີ່ຫ້ອງປະຊຸມໃຫຍ່ ຄອສພ (ຫຼັກ6). ໂດຍໃຫ້ກຽດເປັນປະທານຂອງ ສະຫາຍ ຄຳເຈນ ວົງໂພສີ ກຳມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ, ມີຄະນະພັກ, ຄະນະກົມ ແລະ ພະນັກງານ-ລັດຖະກອນທັງໝົດພາຍໃນ ຄອສພ ເຂົ້າຮ່ວມຢ່າງພ້ອມພຽງ.
ໃນພິທີ ທ່ານ ອານົງສັກ ອິນທະວົງ ຄະນະພັກ, ຫົວໜ້າກົມຈັດຕັ້ງ-ພະນັກງານ ໄດ້ຂື້ນຜ່ານບົດສະຫຼຸບບັ້ນດຳເນີນກວດກາໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈຳປີ 2019 ແລະ ສະຫຼຸບການຍ້ອງຍໍຜົນງານພະນັກງານປະຈຳປີ 2019 ເຊິ່ງທ່ານໄດ້ຍົກໃຫ້ເຫັນສະພາບລວມຂອງບັ້ນດຳເນີນການກວດກາ ແລະ ຜົນຂອງການກວດກາໜ່ວຍພັກປອດໃສ, ເຂັ້ມແຂງ, ໜັກແໜ້ນ.
ຜ່ານການປະເມີນ ແລະ ການປະຕິບັດວຽກງານກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຂອງຫ້ອງການ ແລະ ບັນດາກົມພາຍໃນຄະນະໂຄສະນາອົບຮົມສູນກາງພັກ ເຊິ່ງມີ 9 ໜ່ວຍພັກ, ມີສະມາຊິກທັງໝົດ 149 ສະຫາຍ, ຍິງ 70 ສະຫາຍ, ສະມາຊິກພັກສຳຮອງ 18 ສະຫາຍ, ຍິງ 8 ສະຫາຍ, ສະມາຊິກພັກບຳນານ 30 ສະຫາຍ, ຍິງ 12 ສະຫາຍ.
ໃນນີ້ສາມາດເລືອກໄດ້ໜ່ວຍພັກປອດໃສ, ເຂັ້ມແຂງ, ໜັກແໜ້ນຈຳນວຍ 8 ໜ່ວຍ, ຍົກເວັ້ນໜ່ວຍພັກບຳນານບໍ່ໄດ້ຕີລາຄາ.
ຜ່ານການປະເມີນມີສະມາຊິກພັກປະເພດຕ່າງໆຄື:
- ສະມາຊິກພັກ ແຂງ 75 ສະຫາຍ, ຍິງ 34 ສະຫາຍ
- ສະມາຊິກພັກ ກາງ 3 ສະຫາຍ, ຍິງ 3 ສະຫາຍ
- ບໍ່ໄດ້ຈັດປະເພດ 71 ສະຫາຍ ເຫດຜົນໄປຮຽນຕໍ່ ແລະ ແມ່ນສະມາຊິກພັກສຳຮອງ ແລະ ສະມາຊິກພັກບຳນານ.
ຫຼັງຈາກນັ້ນໄດ້ສືບຕໍ່ຜ່ານບົດສະຫຼຸບການຍ້ອງຍໍຜົນງານປະຈຳປີ 2019, ການປະເມີນພະນັກງານ-ລັດຖະກອນ ທົ່ວຄະນະໂຄສະນາອົບຮົມສູນກາງພັກ ຈຸດປະສົງເພື່ອເປັນການກວດກາຕີລາຄາພະນັກງານໃນທົ່ວ ຄອສພ ໃນການຈັດຕັ້ງປະຕິບັດວຽກງານທາງດ້ານວິຊາສະເພາະກໍຄືດ້ານອຶ່ນໆເຊັ່ນ:ດ້ານຄຸນທາດການເມືອງ, ຄຸນສົມບັດສີນທຳປະຕິວັດ, ນ້ຳໃຈເສຍສະຫຼະຮັກຊາດ ແລະ ພັດທະນາຕົນເອງທຸກໆດ້ານ ເພື່ອສົ່ງເສີມວຽກດີຄົນເດັ່ນໃນການປະຕິບັດແນວທາງນະໂຍບາຍຂອງພັກ, ລະບຽບກົດໝາຍກົດຂອງລັດ ແລະ ການປະຕິບັດທິດທາງແຜນການວຽກງານຄະນະໂຄສະນາອົບຮົມສູນກາງພັກວາງອອກໃຫ້ໄດ້ຮັບຜົນເປັນຈິງ; ເພື່ອຈົດຈຳຜົນງານ, ຄຸນງາມຄວາມດີຂອງພະນັກງານ-ລັດຖະກອນທີ່ໄດ້ປະກອບສ່ວນເຫື່ອແຮງ, ສະຕິປັນຍາໃນການປະຕິບັດໜ້າທີ່ຂອງຕົນໃນໄລຍະໜື່ງປີຜ່ານມາ.
ຄະນະໂຄສະນາອົບຮົມສູນກາງພັກ ມີພະນັກງານທັງໝົດ 170 ຄົນ ຍິງ 87 ຄົນ, ໃນນັ້ນຜູ້ທີ່ມີເງື່ອນໄຂຄົບຖ້ວນໃນການປະເມີນມີຈຳນວນ 147 ຄົນ, ເປັນຍິງ 70 ຄົນ, ຜູ້ທີ່ບໍ່ໄດ້ເຂົ້າຮ່ວມການປະເມີນໂດຍມີເຫດຜົນ ມີຈຳນວນ 18 ຄົນ ເປັນຍິງ 8 ຄົນ; ຜ່ານການປະເມີນພະນັກງານ-ລັດຖະກອນທົ່ວ ຄອສພ ສາມາດຄັດເລືອກໄດ້ດັ່ງນີ້:
- ປະເພດ 1 ມີ: 36 ສະຫາຍ, ຍິງ 17 ສະຫາຍ
- ປະເພດ 2 ມີ: 85 ສະຫາຍ, ຍິງ 49 ສະຫາຍ
- ໃບຊົມເຊີຍ ມີ: 8 ສະຫາຍ, ຍິງ 4 ສະຫາຍ
ໃນໂອກາດດັ່ງກ່າວ ສະຫາຍ ຄຳເຈນ ວົງໂພສີ ກຳມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກກໍ່ໄດ້ໃຫ້ກຽດໂອ້ລົມຕໍ່ພິທີດັ່ງກ່າວ ເຊິ່ງກ່ອນອຶ່ນທ່ານໄດ້ສະແດງຄວາມຊົມເຊີຍມາຍັງຄະນະພັກ, ບັນດາເລຂາໜ່ວຍພັກທີ່ໄດ້ ເອົາໃຈໃສ່ດ້ວຍຄວາມຮັບຜິດຊອບສູງໃນການປະເມີນຜົນການປະຕິບັດວຽກງານຂອງພະນັກງານ-ລັດຖະກອນ ແລະ ບັນດາສະຫາຍໄດ້ເປັນເຈົ້າການໃນການຕີລາຄາຕົນເອງຕາມ 3 ເນື້ອໃນປະເມີນທີ່ແທດຄວາມຈິງ, ທັງຈິງໃຈໃນການປະກອບຄຳຄິດຄຳເຫັນຕຳນິສົ່ງຂ່າວເຊິ່ງກັນ ແລະ ກັນເພື່ອເສີມຂະຫຍາຍດ້ານດີ ແລະ ປັບປຸງແກ້ໄຂຈຸດອ່ອນຂອງຕົນ. ນອກນັ້ນທ່ານໄດ້ເນັ້ນໃຫ້ບັນດາພະນັກງານຈົ່ງພ້ອມກັນຄົ້ນຄວ້າເຊື່ອມຊືມ, ກໍາແໜ້ນບັນດາມະຕິ ແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດ; ຍົກສູງສະຕິຮັກຊາດ, ສຸມໃສ່ປະຕິບັດໜ້າທີ່ວຽກງານ, ເຂົ້າຮ່ວມຂະບວນການປົກປັກຮັກສາ ແລະ ສ້າງສາປະເທດຊາດ; ມີຄວາມອຸ່ນອ່ຽງທຸນທ່ຽງໃນການປະຕິບັດວຽກງານໃຫ້ແທດເໝາະກັບໜ້າທີ່ວຽກງານໃນໄລຍະໃໝ່.
