ກອງປະຊຸມສ່ອງແສງສະພາບແນວຄິດ-ຫາງສຽງສັງຄົມຢູ່ 8 ແຂວງພາກເໜືອ.
ໃນລະຫວ່າງ ວັນທີ 20-28 ກໍລະກົດ 2020 ຜ່ານມາ, ທ່ານ ຄໍາເຈນ ວົງໂພສີ ກຳມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ໄດ້ລົງເຄື່ອນໄຫວເຮັດວຽກ ແລະ ເຂົ້າຮ່ວມເປັນປະທານກອງປະຊຸມສ່ອງແສງສະພາບແນວຄິດ-ຫາງສຽງສັງຄົມຢູ່ 8 ແຂວງພາກເໜືອ.
ກອງປະຊຸມວາລະທີ່ໜຶ່ງໄດ້ຈັດຂຶ້ນ ໃນວັນທີ 21 ກໍລະກົດ 2020 ທີ່ຫ້ອງວ່າການປົກຄອງແຂວງ ໄຊຍະບູລີ ໂດຍການເປັນປະທານຮ່ວມຂອງ ທ່ານ ຄຳເຈນ ວົງໂພສີ ກຳມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ແລະ ທ່ານ ປອ ສົມລິດ ເປືອກແກ້ວ ຮອງເລຂາພັກແຂວງ, ຮອງເຈົ້າແຂວງ, ປະທານສະພາປະຊາຊົນແຂວງ ໄຊຍະບູລີ; ເຂົ້າຮ່ວມມີບັນດາຫົວໜ້າຄະນະໂຄສະນາອົບຮົມແຂວງຫົວພັນ, ຊຽງຂວາງ, ຫຼວງພະບາງ ແລະ ໄຊຍະບູລີ, ມີປະທານແນວລາວສ້າງຊາດແຂວງໄຊຍະບູລີ, ເຈົ້າເມືອງ, ຫົວໜ້າຫ້ອງການໂຄສະນາເມືອງເທດສະບານແຂວງ, ພະນັກງານໂຄສະນາອົບຮົມສູນກາງພັກ ແລະ ພະນັກງານໂຄສະນາອົບຮົມແຂວງ ໄຊຍະບູລີ ເຂົ້າຮ່ວມ.
ໃນໂອກາດນີ້ ທ່ານ ສົມລິດ ເປືອກແກ້ວ ຮອງເລຂາພັກແຂວງ, ຮອງປະທານສະພາປະຊາຊົນແຂວງໄດ້ລາຍງານໂດຍສັງເຂບໃນການຈັດຕັ້ງປະຕິບັດແຜນພັດທະນາເສດຖະກິດ-ສັງ ຄົມ 6 ເດືອນຕົ້ນປີ ແລະ ວຽກຈຸດສຸມ 6 ເດືອນທ້າຍປີ 2020, ການພັດທະນາພື້ນຖານໂຄງລ່າງ, ການຜະລິດກະສິກໍາເປັນສິນຄ້າ,ວຽກງານປ້ອງກັນຊາດປ້ອງກັນຄວາມສະຫງົບ ແລະ ວຽກງານກະກຽມດໍາເນີນກອງປະຊຸມໃຫຍ່ 3 ຂັ້ນ. ຈາກນັ້ນ ທ່ານ ອາເມ ຊົງເຢຍເລັ່ງ ຫົວໜ້າໂຄສະນາອົບຮົມແຂວງໄດ້ກ່າວວ່າ: ວຽກງານສັງລວມ ແລະ ເກັບກໍາຫາງສຽງສັງຄົມແຂວງໄຊຍະບູລີໄດ້ປະຕິບັດຕາມພາລະບົດບາດເປັນເສນາທິການໃຫ້ແກ່ຄະນະພັກ, ຄະນະໂຄສະນາອົບຮົມແຂວງ, ເມືອງ ແລະ ຜູ້ເຮັດວຽກງານການເມືອງແນວຄິດປະຈໍາຢູ່ຂະແໜງການຕ່າງໆ ບໍ່ພຽງແຕ່ນໍາເອົາແນວທາງນະໂຍບາຍຂອງພັກ, ຂໍ້ກໍານົດ, ມະຕິຄໍາສັ່ງ, ລະບຽບກົດໝາຍລົງມາເຜີຍແຜ່ໃຫ້ແກ່ເປົ້າໝາຍຕ່າງໆ ແຕ່ຍັງໄດ້ເກັບກໍາສະພາບແນວຄິດດ້ານຕັ້ງໜ້າ, ດ້ານຫຍໍ້ທໍ້ ແລະ ຫາງສຽງສັງຄົມຕ່າງໆ ທີ່ພົ້ນເດັ່ນເກີດຂຶ້ນໃນແຕ່ລະໄລຍະຈາກສໍານັກງານ, ອົງການ ແລະຮາກຖານບ້ານເພື່ອສະຫຼຸບສັງລວມ,ວິເຄາະວິໄຈ,ລາຍງານຂໍທິດຊີ້ນໍາຈາກຂັ້ນເທິງແກ້ໄຂຢ່າງທັນການ.
ຈາກນັ້ນຕາງໜ້າໂຄສະນາອົບຮົມແຕ່ລະແຂວງກໍ່ໄດ້ຂຶ້ນລາຍງານກ່ຽວກັບການຈັດຕັ້ງປະຕິບັດວຽກງານເກັບກໍາຫາງສຽງສັງຄົມໃນໄລຍະຜ່ານມາເຊິ່ງໄດ້ຍົກໃຫ້ເຫັນດ້ານດີ, ດ້ານອ່ອນ ແລະ ຂໍ້ຄົງຄ້າງ ເພື່ອຈະໄດ້ປຶກສາຫາລືຖອດຖອນບົດຮຽນເຊິ່ງກັນ ແລະ ກັນ, ຊຸກຍູ້ສົ່ງເສີມດ້ານທີ່ຕັ້ງໜ້າ ແລະ ແກ້ໄຂຈຸດບົກຜ່ອງທີ່ເປັນສາເຫດອຸດຕັນ, ຈຸດປະສົງກໍ່ເພື່ອເປັນການເກັບກໍາສະພາບແນວຄິດ-ຫາງສຽງສັງຄົມ ປະກົດການຫຍໍ້ທໍ້ທຸກຖ້ອຍທໍານອງບິດເບືອນໃສ່ຮ້າຍປ້າຍສີຂອງກຸ່ມຄົນບໍ່ດີບົນພື້ນຖານນັ້ນເພື່ອກໍານົດທິດທາງ, ວິທີການ ແລະ ສ້າງຄວາມເປັນເອກະພາບໃນມາດຕະການປັບປຸງແກ້ໄຂຢ່າງຖືກຕ້ອງສອດຄ່ອງທັນເວລາ ທັງເປັນຂໍ້ມູນລາຍງານຂັ້ນເທິງໃນການຊຸກຍູ້ການປະຕິບັດໜ້າທີ່ການເມືອງ ຂອງຄະນະໂຄສະນາອົບຮົມສູນກາງພັກ ກໍ່ຄືຄະນະພັກແຕ່ລະຂັ້ນວາງອອກ ເພື່ອແນ່ໃສ່ເຮັດໃຫ້ການເຄື່ອນໄຫວວຽກງານການເມືອງ-ແນວຄິດ ຢູ່ຂັ້ນທ້ອງຖິ່ນຮາກຖານໃຫ້ດີກວ່າເກົ່າ ແລະ ເພື່ອຍາດແຍ່ງຄວາມຄິດເຫັນຂອງຄະນະພັກ, ອົງການປົກຄອງທ້ອງຖິ່ນຕໍ່ວຽກງານການເມືອງແນວຄິດ ກໍ່ຄືການປະຕິບັດໜ້າທີ່ການເມືອງຂອງຄະນະໂຄສະນາອົບຮົມແຕ່ລະຂັ້ນ.
ວາລະທີ່ສອງໄດ້ຈັດຂຶ້ນໃນ ວັນທີ 27 ກໍລະກົດ 2020 ທີ່ຫ້ອງວ່າການແຂວງອຸດົມໄຊ ໂດຍການເປັນປະທານຂອງ ທ່ານ ຄຳເຈນ ວົງໂພສີ ແລະ ເປັນປະທານຮ່ວມຂອງ ທ່ານ ຄຳພັນ ເຜີຍຍະວົງ ກຳມະການສູນກາງພັກ, ເລຂາພັກແຂວງ, ເຈົ້າແຂວງອຸດົມໄຊ; ເຂົ້າຮ່ວມມີ: ບັນດາຫົວໜ້າຄະນະໂຄສະນາອົບຮົມແຂວງ ບໍ່ແກ້ວ, ຫຼວງນ້ຳທາ, ຫົວໜ້າ ແລະ ຮອງຫົວໜ້າໂຄສະນາອົບຮົມແຂວງອຸດົມໄຊ, ປະທານແນວລາວສ້າງຊາດແຂວງ, ຫ້ອງການໂຄສະນາເມືອງເທດສະບານແຂວງ ແລະ ພະນັກງານໂຄສະນາຂອງສູນກາງ-ແຂວງເຂົ້າຮ່ວມ.
ການລົງເຄື່ອນໄຫວເຮັດວຽກຂອງທ່ານ ຄຳເຈນ ວົງໂພສີ ກຳມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ໃນຄັ້ງນີ້ໄດ້ຮັບຟັງການລາຍງານສະພາບການຈັດຕັ້ງປະຕິບັດວຽກງານໂຄສະນາອົບຮົມ ໂດຍສະເພາະແມ່ນການດຳເນີນວຽກງານໂຄສະນາສຶກສາອົບຮົມການເມືອງ-ແນວຄິດ, ເກັບກຳຫາງສຽງສັງຄົມ ຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ ແລະ ການດຳເນີນກອງປະຊຸມ 3 ຂັ້ນ ຂອງພັກ ຢູ່ຂັ້ນທ້ອງຖິ່ນ. ຊຶ່ງກ່ອນອື່ນ ທ່ານໄດ້ໃຫ້ການຍ້ອງຍໍຊົມເຊີຍ ແລະ ຕີລາຄາສູງ ຕໍ່ຄວາມເອົາໃສ່ໃນການຊີ້ນຳໆພາຂອງຄະນະພັກ, ອົງການປົກຄອງທ້ອງຖິ່ນ ກໍຄືຄະນະໂຄສະນາອົບຮົມແຂວງ, ຫ້ອງການໂຄສະນາອົບຮົມເມືອງ ທີ່ໄດ້ຕັ້ງໜ້າເຮັດໜ້າທີ່ການເມືອງຂອງຕົນ ໂດຍສະ ເພາະແມ່ນໄດ້ມີຄວາມຮັບຜິດຊອບສູງຕໍ່ໜ້າທີ່ວຽກງານການເມືອງທີ່ພັກ-ລັດ ມອບໝາຍ ເຮັດໃຫ້ຫຼາຍດ້ານບັນລຸຜົນສຳເລັດຢ່າງຕັ້ງໜ້າເປັນຕົ້ນແມ່ນ ວຽກງານສຶກສາອົບຮົມການເມືອງ-ແນວຄິດ ເວົ້າລວມ, ວຽກງານເກັບກຳແນວຄິດຫາງສຽງສັງຄົມ ເວົ້າສະເພາະ, ການສ້າງສາພັດທະນາເສດຖະກິດ-ສັງຄົມ, ວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ການເຄື່ອນໄຫວສ້າງຂະບວນການຕ່າງໆ ເພື່ອຂ່ຳນັບຮັບຕ້ອນກອງປະຊຸມໃຫຍ່ອົງຄະນະພັກຂັ້ນຂອງຕົນ ແລະ ກອງປະຊຸມໃຫຍ່ຄັ້ງທີ XI ຂອງພັກ. ພ້ອມນັ້ນ ທ່ານ ຍັງໄດ້ໃຫ້ທິດຊີ້ນຳພະນັກງານ-ສະມາຊິກພັກ, ລັດຖະກອນ ຄະນະໂຄສະນາອົບຮົມທຸກຂັ້ນ ຈົ່ງສູ້ຊົນຈັດຕັ້ງປະຕິບັດແຜນການ, ໂຄງການ, ວຽກງານຂອງຕົນໃຫ້ມີຜົນສຳເລັດ, ເອົາໃຈໃສ່ຄົ້ນຄ້ວາຮ່ຳຮຽນເອົາແນວທາງ, ມະຕິ, ຄຳສັ່ງຂອງ ພັກ-ລັດ ເພື່ອນໍາມາໝູນໃຊ້ເຂົ້າໃນໜ້າທີ່ການເມືອງ ທີ່ໄດ້ຮັບມອບໝາຍ. ໃນນັ້ນ, ໃຫ້ເອົາໃຈໃສ່ກຳແໜ້ນແນວທາງແຜນນະໂຍບາຍ, ລະບຽບກົດໝາຍຂອງພັກ-ລັດ, ກຳແໜ້ນແນວຄິດຂອງພະນັກງານສະມາຊິກພັກ ແລະ ປະຊາຊົນລາວ ບັນດາເຜົ່າ, ກຳແໜ້ນການເຄື່ອນໄຫວຂອງສັງຄົມ ແລະ ກຳແໜ້ນວຽກງານວິຊາສະເພາະຄວາມຮັບຜິດຊອບ, ມີແບບແຜນວິທີເຮັດວຽກທີ່ດີ, ມີວິໄນ ແລະ ສະຕິຕໍ່ການຈັດຕັ້ງ ໃຫ້ກາຍເປັນພະນັກງານທີ່ດີ, ມີຄວາມຮູ້ຄວາມສາມາດ ເພື່ອແບກຫາບພາລະໜ້າທີ່ທີ່ພັກມອບໝາຍໃຫ້ປະສົບຜົນສໍາເລັດເປັນກ້າວໆ.
ໃນໂອກາດດັ່ງກ່າວ ທ່ານກໍໄດ້ລົງຊຸກຍູ້ ແລະ ຢ້ຽມຢາມພື້ນຖານການຜະລິດທາງດ້ານເສດຖະກິດ, ວັດທະນະທຳ- ສັງຄົມຂອງແຂວງ, ເມືອງ; ຢ້ຽມຢາມພະນັກງານອາວຸໂສບຳນານ ແລະ ປະຊາຊົນບັນດາເຜົ່າພາຍໃນແຂວງໄຊຍະບູລີ ແລະ ແຂວງອຸດົມໄຊ.
