ຄະນະພັກ ຄະນະນຳ ຄອສພ ເຂົ້າຮ່ວມເວທີສົນທະນາ ພາຍໃຕ້ຫົວຂໍ້ “ສື່ມວນຊົນກັບການພັດທະນາເສດຖະກິດ-ສັງຄົມ”
ໃນວັນທີ 02 ກັນຍາ 2022 ທີ່ຫ້ອງປະຊຸມສູນກາງຊາວໜຸ່ມປະຊາຊົນປະຕິວັດລາວໄດ້ຈັດເວທີສົນທະນາ ພາຍໃຕ້ຫົວຂໍ້ “ສື່ມວນຊົນກັບການພັດທະນາເສດຖະກິດ-ສັງຄົມ” ໃຫ້ກຽດເປັນປະທານພ້ອມທັງກ່າວເປີດພິທີທ່ານ ມອນໄຊ ລາວມົວຊົ່ງ ກຳມະການສຳຮອງສູນກາງກາງພັກ ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ເຂົ້າຮ່ວມມີ ທ່ານ ວັນຕຸລາ ຣັກນຸດ ຄະນະພັກ ຫົວໜ້າກົມຂໍ້ມູນຂ່າວສານ, ປະທານສະຫະພັນກຳມະບານ ຄອສພ ພ້ອມດ້ວຍຄະນະ, ບັນດາຫົວໜ້າກົມມາຈາກກະຊວງ-ອົງການອ້ອມຂ້າງ ພ້ອມດ້ວຍພະນັກງານລັດຖະກອນຜູ້ທີ່ເຮັດວຽກສື່ທີ່ສູນກາງຊາວໜຸ່ມປະຊາຊົນປະຕິວັດລາວເຂົ້າຮ່ວມຢ່າງພ້ອມພຽງ.
ໃນພິທີ ປະທານໄດ້ກ່າວຈຸດປະສົງເພື່ອເປັນການສ້າງຂະບວນການສະເຫຼີມສະຫຼອງວັນສື່ມວນຊົນ ແລະ ການພິມຈຳໜ່າຍ ຄົບຮອບ 72ປີ (13 ສິງຫາ 1950 – 13 ສິງຫາ 2022) ແລະ ໃຫ້ຮູ້ຕື່ມອີກວ່າໃນຍຸກທີ່ເຕັກໂນໂລຢີໄດ້ຮັບການພັດທະນາໄປຢ່າງວ່ອງໄວ ຄຽງຄູ່ກັບການພັດທະນາເສດຖະກິດ-ສັງຄົມ, ຂໍ້ມູນຂ່າວສານຈຶ່ງກາຍເປັນສິ່ງຈຳເປັນ ແລະ ຖືກຖ່າຍທອດຢ່າງວ່ອງໄວຜ່ານ social network (ເຄືອຂ່າຍທາງສັງຄົມ) ທີ່ເອີ້ນວ່າ “ສື່” ເພື່ອທີ່ຈະໄດ້ຮັບຮູ້ເຫດການຕ່າງໆທີ່ເກີດຂຶ້ນທັງພາຍໃນ ແລະ ຕ່າງປະເທດ, ດ້ວຍເຫດນີ້ “ສື່” ຈຶ່ງເປັນສິ່ງທີ່ທຸກຄົນສາມາດເຂົ້າເຖິງໄດ້ງ່າຍ. “ສື່ສັງຄົມອອນລາຍ” ໄດ້ເຂົ້າມາມີອິດທິພົນຕໍ່ການດຳລົງຊີວິດຂອງຄົນໃນສັງຄົມທຸກເພດທຸກໄວ ແລະ ກາຍເປັນດາບສອງຄົມດັ່ງນັ້ນ, ຈຶ່ງເປັນເລື່ອງຍາກທີ່ຈະຄວບຄຸມທັງໃນດ້ານເນື້ອຫາສາລະ, ຄຸນນະພາບຂອງພາບ ແລະ ສຽງ, ຄວາມໜ້າເຊື່ອຖືຂອງຂໍ້ມູນ, ຄວາມເໝາະສົມຕໍ່ຜູ້ບໍລິໂພກອັນເກີດຈາກຄວາມວ່ອງໄວໃນການນຳສະເໜີໂດຍຂາດການກັ່ນຕອງ ຈຶ່ງເຮັດໃຫ້ເກີດຄວາມສັບສົນໃນການຮັບເອົາຂໍ້ມູນ ແລະ ພຶດຕິກຳຮຽນແບບທີ່ບໍ່ຖືກຕ້ອງທັງທີ່ຮູ້ຕົວ ແລະ ບໍ່ຮູ້ຕົວ.
ໃນພິທີກໍໄດ້ມີການແລກປ່ຽນຄຳຄິດຄຳເຫັນຢ່າງກົງໄປກົງໄປ ເພື່ອເຮັດແນວໃດໃຫ້ໄວໜຸ່ມຂອງລາວເຮົາໄດ້ຮັບຂໍ້ມູນທີ່ຖືກຕ້ອງ ແລະ ເຊື່ອໝັ້ນຕໍ່ແນວທາງນະໂຍບາຍຕ່າງໆຂອງພັກ ແລະ ລັດ, ຫັນມາເສບສື່ທີ່ມີຄຸນນະພາບ ໂດຍສະເພາະການໂຄສະນາຕ້ານ ແລະ ສະກັດກັ້ນບັນຫາຢາເສບຕິດ, ປະກົດການຫຍໍ້ທໍ້ຕ່າງໆ, ເຜີຍແຜ່ຂ່າວສານຕ່າງໆໃຫ້ຮູ້ເຖິງສິດທິມະນຸດແມ່ຍິງ-ເດັກນ້ອຍໃຫ້ຫຼາຍຂຶ້ນ ເພື່ອເຮັດໃຫ້ສັງຄົມມີການພັດທະນາກ້າວໜ້າຂື້ນຢ່າງບໍ່ຢຸດຢັ້ງ.
