ຝຶກອົບຮົມວຽກງານໂຄສະນາອົບຮົມ 5 ແຂວງພາກໃຕ້ ປະຈໍາປີ 2023
ຄະນະໂຄສະນາອົບຮົມສູນກາງພັກ ໄດ້ເປີດຝຶກອົບຮົມວຽກງານໂຄສະນາອົບຮົມ 5 ແຂວງພາກໃຕ້ ປະຈໍາປີ 2023 ຂຶ້ນໃນຕອນເຊົ້າຂອງວັນທີ 03 ມີນາ 2023, ທີ່ ແຂວງ ຈໍາປາສັກ ໂດຍໃຫ້ກຽດເຂົ້າຮ່ວມເປັນຄະນະປະທານຂອງ ສະຫາຍ ຄໍາພັນ ເຜີຍຍະວົງ ຄະນະເລຂາທິການສູນກາງພັກ, ເລຂາຄະນະພັກ, ຫົວໜ້າຄະນະໂຄສະນາອົບຮົມສູນກາງພັກ,ສະຫາຍ ສົມສະຫວາດ ເລັ່ງສະຫວັດ ອະດີດກໍາມະການກົມການເມືອງສູນກາງພັກ, ອະດີດຮອງນາຍົກລັດຖະມົນຕີ, ສະຫາຍ ບັນດິດ ສຈ. ບໍ່ວຽງຄໍາ ວົງດາລາ ກໍາມະການສູນກາງພັກ, ເລຂາຄະນະພັກ, ລັດຖະມົນຕີກະຊວງເຕັກໂນໂລຊີ ແລະ ການສື່ສານ ແລະ ສະຫາຍ ປອ. ວິໄລວົງ ບຸດດາຄໍາ ກໍາມະການສູນກາງພັກ, ເລຂາຄະນະພັກ, ເຈົ້າແຂວງ ຈໍາປາສັກ ມີພະນັກງານຂັ້ນສູງຈາກສູນກາງພັກ, ຄູອາຈານ ຕະຫຼອດຮອດພະນັກງານໂຄສະນາອົບຮົມ ທີ່ມາຈາກຄະນະໂຄສະນາອົບຮົມແຂວງ ແລະ ເມືອງ ໃນ 5 ແຂວງພາກໃຕ້ ເຂົ້າຮ່ວມຈຳນວນທັງໝົດ 160 ກວ່າສະຫາຍ.
ຈຸດປະສົງຂອງການຈັດຝຶກອົບຮົມໃນຄັ້ງນີ້ ແມ່ນປະຕິບັດຍຸດທະສາດການພັດທະນາວຽກງານໂຄສະນາອົບຮົມໄປສູ່ຄຸນນະພາບໃໝ່, ການຫັນວຽກງານໂຄສະນາອົບຮົມເປັນທັນສະໄໝ; ປະຕິບັດຕາມມະຕິກອງປະຊຸມວຽກງານການເມືອງ-ແນວຄິດທົ່ວປະເທດຄັ້ງທີ v, ສ້າງຄວາມເຂົ້າໃຈ ແລະ ຖ່າຍທອດໃຫ້ ບັນດານັກຝຶກອົບຮົມກ່ຽວກັບວຽກງານໂຄສະນາ, ສິລະປະໃນການປາກເວົ້າ ແລະ ການປາຖະກະຖາ, ວຽກງານອົບຮົມ, ວຽກງານຄົ້ນຄວ້າ-ສັງລວມ, ວຽກງານຫາງສຽງສັງຄົມ, ວຽກງານໂຄສະນາຜ່ານສື່, ການນໍາໃຊ້ເຕັກໂນໂລຊີເຂົ້າໃນການເຮັດວຽກງານໂຄສະນາອົບຮົມ, ການຂຽນບົດຂ່າວສານຕ່າງໆໃຫ້ເລິກເຊິ່ງກວ່າເກົ່າ ແນໃສ່ເຮັດໃຫ້ຜູ້ເຂົ້າຮ່ວມຝຶກອົບຮົມສາມາດນໍາໄປປັບປຸງ ແລະ ຍົກລະດັບຂອງຕົນເອງໃນການເຮັດວຽກງານໂຄສະນາອົບຮົມໃຫ້ດີຂຶ້ນກວ່າເກົ່າ ເພື່ອຕອບສະໜອງໜ້າທີ່ການເມືອງທີ່ນັບມື້ນັບສູງຂຶ້ນ.
ໃນການຝຶກອົບຮົມດັ່ງກ່າວ ບັນດາຜູ້ເຂົ້າຮ່ວມຍັງໄດ້ຮັບກຽດຟັງການບັນລະຍາຍຂອງ ສະຫາຍ ສົມສະຫວາດ ເລັ່ງສະຫວັດ ຊຶ່ງນໍາສະເໜີໃນຫົວຂໍ້ ສິລະປະການເວົ້າ (ວາທະສິນ) ແລະ ການໂຄສະນາ-ປາຖະກະຖາ; ຮັບຟັງການນໍາສະເໜີກ່ຽວກັບການນໍາໃຊ້ເຕັກໂນໂລຊີທີ່ທັນສະໄໝເຂົ້າໃນວຽກງານໂຄສະນາອົບຮົມຂອງພັກ ຊຶ່ງນໍາສະເໜີໂດຍ ສະຫາຍ ບັນດິດ ສຈ. ບໍ່ວຽງຄໍາ ວົງດາລາ ແລະ ວຽກງານການເມືອງ-ແນວຄິດຂອງພັກ ຊຶ່ງນໍາສະເໜີໂດຍ ສະຫາຍ ຄໍາພັນ ເຜີຍຍະວົງ. ນອກນັ້ນ, ຍັງຈະໄດ້ຮັບຟັງອາຈານຂຶ້ນຫ້ອງສອນບັນລະຍາຍ, ສົນທະນາແລກປ່ຽນຄໍາເຫັນ ລະຫວ່າງ ອາຈານກັບນັກຝຶກອົບຮົມ ແລະ ລະຫວ່າງນັກຝຶກອົບຮົມດ້ວຍກັນ, ເຮັດທົດລອງປາຖະກະຖາໃນຫົວຂໍ້ຈໍານວນໜຶ່ງ, ຝຶກຂຽນບົດຂ່າວສານ ແລະ ໄປທັດສະນະສຶກສາ. ການຝຶກອົບຮົມໃນຄັ້ງນີ້ ຈະໄດ້ດໍາເນີນໄປເປັນເວລາ 6 ວັນ ຈຶ່ງຈະສິ້ນສຸດ
ຂ່າວ,ພາບ:ຄະນະໂຄສະນາອົບຮົມແຂວງຈຳປາສັກ