ຄອສພ ປາຖະກະຖາຜົນສໍາເລັດຂອງກອງປະຊຸມຄົບຄະນະຄັ້ງທີ 3 ພັກກອມມູນິດຈີນ ສະໄໝທີ XX
ໂຄສະນາອົບຮົມສູນກາງພັກ (ຄອສພ) ໄດ້ຈັດຕັ້ງພິທີປາຖະກະຖາ ຜົນສໍາເລັດຂອງກອງປະຊຸມຄົບຄະນະ ຄັ້ງທີ 3 ຂອງຄະນະກໍາມະການສູນກາງພັກກອມມູນິດຈີນ ສະໄໝທີ XX ໃນຕອນເຊົ້າວັນທີ 9 ສິງຫານີ້ ທີ່ສະໂມສອນຄອສພ. ໃຫ້ກຽດປາຖະກະຖາ ໂດຍ ສະຫາຍ ນາງ ຟ່າງ ຮອງ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປ ຈີນ ປະຈໍາ ສປປ ລາວ, ເຂົ້າຮ່ວມຮັບຟັງມີ ສະຫາຍ ລາວປາວຊົ່ງ ນະວົງໄຊ ກໍາມະການສູນກາງພັກ ຮອງເລຂາຄະນະພັກ ຮອງຫົວໜ້າ ຄອສພ, ບັນດາສະຫາຍກໍາມະການສູນກາງພັກ, ຮອງເລຂາຄະນະພັກ, ຮອງຄະນະປະຈໍາພັກ, ກໍາມະການພັກ, ພະນັກງານຫຼັກແຫຼ່ງ ຂອງບັນດາກະຊວງ, ອົງການຈັດຕັ້ງມະຫາຊົນນະຄອນຫຼວງວຽງຈັນ ພ້ອມດ້ວຍພະນັກງານພາຍໃນ ຄອສພ ເຂົ້າຮ່ວມ.
ກອງປະຊຸມ ໄດ້ຮັບຟັງຜົນສໍາເລັດ ໃນວັນທີ 18 ກໍລະກົດ 2024 ທີ່ນະຄອນຫຼວງປັກກິ່ງ ສປ ຈີນ, ສະຫາຍ ສີຈິ້ນຜິງ ເລຂາທິການໃຫຍ່ ຄະນະກຳມະການສູນກາງພັກ ໄດ້ກ່າວຄຳປາໄສອັນສຳຄັນ. ກອງປະຊຸມ ໄດ້ຕີລາຄາສູງຕໍ່ຜົນສຳເລັດຜົນ ແລະ ຜົນງານອັນຍິ່ງໃຫຍ່ການປະຕິຮູບຢ່າງຮອບດ້ານ ນັບແຕ່ຍຸກໃໝ່ເປັນຕົ້ນມາ, ຊຶ່ງເປັນຂໍກຸນແຈສຳຄັນ ໃນການຊຸກຍູ້ພາລະກິດອັນຍິ່ງໃຫຍ່ທີ່ສ້າງສາປະເທດໃຫ້ເຂັ້ມແຂງ ແລະ ຟື້ນຟູຄວາມຈະເລີນຮຸ່ງເຮືອງຂອງປະຊາຊາດຢ່າງຮອບດ້ານ ດ້ວຍຄວາມທັນສະໄໝແບບຈີນ. ກ່ຽວກັບສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່ຢ່າງຮອບດ້ານ, ລົງເລິກເຊື່ອມຊຶມ ແລະ ຈັດຕັ້ງປະຕິບັດແນວຄິດໃໝ່ ທັດສະນະໃໝ່ ການຕີລາຄາໃໝ່ຕ່າງໆຂອງ ສະຫາຍ ສີຈິ້ນຜິງ ກ່ຽວກັບການລົງເລິກການປະຕິຮູບຢ່າງຮອບດ້ານ, ຢຶດໝັ້ນການປົດປ່ອຍແນວຄິດ, ສະແຫວງຫາສັດຈະທໍາຈາກຄວາມເປັນຈິງ, ກ້າວໄປຂ້າງໜ້າພ້ອມກັບຍຸກສະໄໝ ແລະ ເຮັດແທ້ທຳຈິງ.
ໃນກອງປະຊຸມຄົບຄະນະ ໄດ້ຊີ້ອອກວ່າ: ເປົ້າໝາຍລວມຂອງການລົງເລິກການປະຕິຮູບຢ່າງຮອບດ້ານຕື່ມອີກນັ້ນ ແມ່ນສືບຕໍ່ປັບປຸງ ແລະ ພັດທະນາລະບອບສັງຄົມນິຍົມ ທີ່ມີສີສັນພິເສດຂອງຈີນ ໃຫ້ສົມບູນ, ຊຸກຍູ້ການຫັນເປັນທັນສະໄໝຂອງລະບົບ ແລະ ຄວາມສາມາດດ້ານການບໍລິຫານຂອງຊາດ. ຮອດປີ 2035, ສ້າງໂຄງປະກອບເສດຖະກິດຕະຫຼາດສັງຄົມນິຍົມໃນລະດັບສູງ ໃຫ້ສຳເລັດຜົນຢ່າງຮອບດ້ານ, ຮອດປີ 2029 ກົງກັບໂອກາດສະຖາປະນາ ສາທາລະນະລັດ ປະຊາຊົນຈີນ ຄົບຮອບ 80 ປີ; ໃນການລົງເລິກການປະຕິຮູບຢ່າງຮອບດ້ານ ຕ້ອງສະຫຼຸບ ແລະ ນຳໃຊ້ບົດຮຽນອັນລ້ຳຄ່ານັບແຕ່ດຳເນີນການປະຕິຮູບ ແລະ ເປີດປະຕູສູ່ພາຍນອກເປັນຕົ້ນມາ, ຢຶດໝັ້ນຖືປະຊາຊົນເປັນໃຈກາງ, ຢຶດໝັ້ນຮັກສາທາດແທ້ ແລະ ປະດິດສ້າງໃໝ່. ໂຄງປະກອບເສດຖະກິດຕະຫຼາດສັງຄົມນິຍົມໃນລະດັບສູງ ເປັນສິ່ງຮັບປະກັນທີ່ສຳຄັນຂອງຄວາມທັນສະໄໝແບບຈີນ. ຕ້ອງເສີມຂະຫຍາຍບົດບາດຂອງກົນໄກຕະຫຼາດເປັນຢ່າງດີກວ່າເກົ່າ, ສ້າງສະພາບແວດລ້ອມດ້ານຕະຫຼາດທີ່ຍຸຕິທຳ ແລະ ມີພະລັງຊີວິດຫຼາຍກວ່າເກົ່າ, ເຮັດໃຫ້ການຈັດສັນຊັບພະຍາກອນມີປະສິດທິພາບສູງທີ່ສຸດ ແລະ ປະສິດທິຜົນໃຫຍ່ທີ່ສຸດ.
ກອງປະຊຸມຄົບຄະນະ ຊີ້ອອກວ່າ: ການພັດທະນາທີ່ມີຄຸນນະພາບສູງ ແມ່ນໜ້າທີ່ສຳຄັນອັນດັບໜຶ່ງໃນການສ້າງສາປະເທດສັງຄົມນິຍົມທັນສະໄໝຢ່າງຮອບດ້ານ. ຕ້ອງນຳພາການປະຕິຮູບດ້ວຍທັດສະນະການພັດທະນາອັນໃໝ່, ລົງເລິກການປະຕິຮູບໂຄງປະກອບດ້ານການສະໜອງ, ປັບປຸງກົນໄກຊຸກຍູ້ສົ່ງເສີມ ແລະ ຊຸກຍູ້ການພັດທະນາທີ່ມີຄຸນນະພາບສູງໃຫ້ສົມບູນ, ສ້າງແຮງຂັບເຄື່ອນໃໝ່ ແລະ ທ່າແຮງໃໝ່ເຂົ້າໃນການພັດທະນາ. ດ້ານການສຶກສາ ວິທະຍາສາດເຕັກໂນໂລຊີ ແລະ ຜູ້ມີຄວາມຮູ້ຄວາມສາມາດ ເປັນສິ່ງຄ້ຳປະກັນທີ່ມີລັກສະນະພື້ນຖານ ແລະ ລັກສະນະຍຸດທະສາດຕໍ່ຄວາມທັນສະໄໝແບບຈີນ, ການດັດສົມຄວບຄຸມມະຫາພາກຕາມຫຼັກວິທະຍາສາດ ແລະ ການປົກຄອງທີ່ມີປະສິດທິຜົນຂອງລັດຖະບານ ເປັນຄວາມຮຽກຮ້ອງພາຍໃນທີ່ເສີມຂະຫຍາຍທ່າແຮງຂອງໂຄງປະກອບເສດຖະກິດຕະຫຼາດສັງຄົມນິຍົມ. ການພັດທະນາຕົວເມືອງ ແລະ ຊົນນະບົດແບບເຊື່ອມໂຍງເຂົ້າກັນ ແມ່ນຄວາມຮຽກຮ້ອງຕ້ອງການທີ່ຈຳເປັນຂອງຄວາມທັນສະໄໝແບບຈີນ. ການຫັນເປັນອຸດສາຫະກຳແບບໃໝ່ ຫັນເປັນຕົວເມືອງແບບໃໝ່ ແລະ ພັດທະນາຊົນນະບົດໃຫ້ຈະເລີນຮຸ່ງເຮືອງຢ່າງຮອບດ້ານ, ຫຼຸດຜ່ອນຄວາມແຕກໂຕນກັນລະຫວ່າງຕົວເມືອງກັບຊົນນະບົດ.
ການເປີດປະຕູສູ່ພາຍນອກ ເປັນຂີດໝາຍອັນຈະແຈ້ງຂອງຄວາມທັນສະໄໝແບບຈີນ. ຕ້ອງຢຶດໝັ້ນການເປີດປະຕູສູ່ພາຍນອກທີ່ເປັນນະໂຍບາຍພື້ນຖານແຫ່ງຊາດ, ຕ້ອງເດີນຕາມເສັ້ນທາງພັດທະນາສັງຄົມນິຍົມທີ່ມີສີສັນພິເສດຂອງຈີນ ຢ່າງເດັດດ່ຽວບໍ່ຫວັ່ນໄຫວຄອນແຄນ. ການປົກຄອງປະເທດຕາມກົດໝາຍເປັນສິ່ງຮັບປະກັນທີ່ສຳຄັນຕໍ່ຄວາມທັນສະໄໝແບບຈີນ. ຕ້ອງຈັດຕັ້ງປະຕິບັດລັດຖະທຳມະນູນຢ່າງຮອບ ດ້ານ, ປົກປັກຮັກສາຄວາມສັກສິດຂອງລັດຖະທຳມະນູນ, ຄຽງຄູ່ກັບການສ້າງກົດໝາຍ ປະຕິບັດກົດໝາຍ ຕຸລາການ ແລະ ເຄົາລົບກົດໝາຍ, ປັບປຸງກົນໄກຮັບປະກັນຄວາມສະເໝີພາບຂອງທຸກຄົນຢູ່ຕໍ່ໜ້າກົດໝາຍໃຫ້ຄົບຖ້ວນ, ສົ່ງເສີມຈິດໃຈປົກຄອງປະເທດຕາມກົດໝາຍສັງຄົມນິຍົມ. ໃນນັ້ນ, ຄວາມໝັ້ນຄົງຂອງຊາດ ເປັນພື້ນຖານສຳຄັນ ທີ່ເຮັດໃຫ້ຄວາມທັນສະໄໝແບບຈີນກ້າວເດີນໄປໄກຢ່າງໜັກແໜ້ນ. ດ້ານການປ້ອງກັນຊາດ ແລະ ກອງທັບເປັນພາກສ່ວນສຳຄັນຂອງຄວາມທັນສະໄໝແບບຈີນ. ການນຳພາຂອງພັກ ເປັນສິ່ງຮັບປະກັນຂັ້ນພື້ນຖານທີ່ລົງເລິກການປະຕິຮູບຢ່າງຮອບດ້ານຕື່ມອີກ ເພື່ອຊຸກຍູ້ຄວາມທັນສະໄໝແບບຈີນ. ຕ້ອງເຊື່ອມຊຶມຄວາມໝາຍຕັດສິນຊີ້ຂາດຂອງ “2 ກຳນົດ” ຢ່າງເລິກເຊິ່ງ, ເພີ່ມທະວີ “4 ສະຕິ”, ມີຄວາມເດັດດ່ຽວໃນ “4 ໝັ້ນໃຈຕົນເອງ”, ເຮັດໃຫ້ໄດ້ “2 ປົກປັກຮັກສາ”, ຮັກສາສະຕິຕື່ນຕົວໃນລະດັບສູງ ທີ່ນຳພາການປະຕິຮູບທາງສັງຄົມດ້ວຍການປະຕິວັດຕົນເອງຂອງພັກ.
ກອງປະຊຸມຄົບຄະນະ ຮຽກຮ້ອງໃຫ້ທົ່ວພັກ ທົ່ວກອງທັບ ແລະ ທົ່ວປວງຊົນຈີນທັງຊາດ ຈົ່ງສາມັກຄີກັນຢູ່ອ້ອມຂ້າງສູນກາງພັກທີ່ມີ ສະຫາຍ ສີຈິ້ນຜິງ ເປັນແກນກາງ ຢ່າງແໜ້ນແຟ້ນກວ່າເກົ່າ, ເຊີດຊູຄັນທຸງແຫ່ງການປະຕິຮູບ ແລະ ເປີດປະຕູສູ່ພາຍນອກ, ຮ່ວມແຮງຮ່ວມໃຈກັນ ບຸກບືນກ້າວໄປຂ້າງໜ້າ, ພະຍາຍາມບຸກບືນສູ້ຊົນ ເພື່ອສ້າງສາປະເທດສັງຄົມນິຍົມທັນສະໄໝທີ່ເຂັ້ມແຂງ ໃຫ້ສຳເລັດຜົນຢ່າງຮອບດ້ານ.
