ທ່ານ ຮອງຫົວໜ້າຄະນະໂຄສະນາອົບຮົມສູນກາງພັກ ລົງເຄື່ອນໄຫວຕິດຕາມ,
ຊຸກຍູ້ວຽກງານແນວຄິດ-ຫາງສຽງສັງຄົມ ຢູ່ແຂວງຫົວພັນ ແລະ ແຂວງຊຽງແຂວງ
ໃນລະຫວ່າງໃນວັນທີ 1-12 ທັນວາ 2024, ທ່ານ ລາວປາວຊົ່ງ ນະວົງໄຊ ກໍາມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ໄດ້ລົງເຄື່ອນໄຫວເຮັດວຽກຢູ່ແຂວງຫົວພັນ ແລະ ແຂວງຊຽງຂວາງໃນວັນທີ 3 ທັນວາ 2024, ທ່ານ ລາວປາວຊົ່ງ ນະວົງໄຊ ກໍາມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ແລະ ທ່ານ ນາງ ລ້ອງຄຳ ພອນມີໄຊ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງ ໄດ້ຮ່ວມເປັນປະທານກອງປະຊຸມຮັບສ່ອງແສງສະພາບແນວຄິດ-ຫາງສຽງສັງຄົມ ທົ່ວແຂວງຫົວພັນ ທີ່ຫ້ອງປະຊຸມໃຫຍ່ຫ້ອງວ່າການປົກຄອງແຂວງ ໂດຍມີບັນດາກໍາມະການປະຈໍາພັກແຂວງ, ກໍາມະການພັກແຂວງ, ຫົວໜ້າ-ຮອງຫົວໜ້າພະແນກການ, ກົມກອງອ້ອມຂ້າງແຂວງ, ຄະນະວິຊາການຈາກຄະນະໂຄສະນາອົບຮົມສູນກາງພັກ, ຄະນະໂຄສະນາອົບຮົມແຂວງ, ຫົວໜ້າ-ຮອງຫົວໜ້າຄະນະໂຄສະນາອົບຮົມບັນດາເມືອງ ເຂົ້າຮ່ວມທັງໝົດຈໍານວນ 28 ທ່ານ, ຍິງ 10 ທ່ານ ແລະ ໃນວັນທີ 9 ທັນວາ 2024 ກອງປະຊຸມຮັບສ່ອງແສງສະພາບແນວຄິດ-ຫາງສຽງສັງຄົມ ທົ່ວແຂວງຊຽງແຂວງ ໄດ້ຈັດຂຶ້ນຢູ່ທີ່ຫ້ອງປະຊຸມໃຫຍ່ຫ້ອງວ່າການປົກຄອງແຂວງ ໂດຍການເປັນປະທານຮ່ວມຂອງທ່ານ ລາວປາວຊົ່ງ ນະວົງໄຊ ກໍາມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ແລະ ທ່ານ ໝໍບີ ຫາຕົງປາວ ຮອງເລຂາຄະນະບໍລິຫານງານພັກແຂວງ, ຜູ້ຊີ້ນໍາວຽກງານການເມືອງ-ແນວຄິດ ໂດຍມີບັນດາກໍາມະການພັກແຂວງ, ຫົວໜ້າ-ຮອງຫົວໜ້າພະແນກການ, ກົມກອງອ້ອມຂ້າງແຂວງ, ຄະນະວິຊາການຈາກຄະນະໂຄສະນາອົບຮົມສູນກາງພັກ, ຄະນະໂຄສະນາອົບຮົມແຂວງ ແລະ ຫົວໜ້າ-ຮອງຫົວໜ້າຄະນະໂຄສະນາອົບຮົມບັນດາເມືອງຈໍານວນໜຶ່ງ ເຂົ້າຮ່ວມທັງໝົດຈໍານວນ 45 ທ່ານ, ຍິງ 16 ທ່ານ. ຈຸດປະສົງການລົງເຄື່ອນໄຫວເຮັດວຽກ ແມ່ນເພື່ອຊຸກຍູ້ ແລະ ຕິດຕາມ, ເກັບກຳສະພາບແນວຄິດ-ຫາງສຽງສັງຄົມທັງດ້ານຕັ້ງໜ້າ ແລະ ຫຍໍ້ທໍ້, ສະພາບປະກົດການຫຍໍ້ທໍ້ຕ່າງໆທີ່ພົ້ນເດັ່ນ ຂອງຖັນແຖວພະນັກງານ-ລັດຖະກອນ, ສະມາຊິກພັກ, ທະຫານ, ຕຳຫຼວດ ແລະ ປະຊາຊົນລາວບັນດາເຜົ່າຕໍ່ກັບການຈັດຕັ້ງຜັນຂະຫຍາຍແນວທາງ, ແຜນນະໂຍບາຍຂອງພັກ, ລະບຽບກົດໝາຍ, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ lX ຂອງລັດ ຢູ່ທ້ອງຖິ່ນໃນໄລຍະທ້າຍສະໄໝ, ບັນຫາທີ່ເຄັ່ງຮ້ອນທີ່ເກີດຂຶ້ນຢູ່ປະເທດເຮົາ ໂດຍສະເພາະຢູ່ແຕ່ລະທ້ອງຖິ່ນ ເພື່ອລາຍງານຂັ້ນເທິງມີທິດນຳການແກ້ໄຂ, ຊີ້ແຈງອະທິບາຍຕໍ່ກັບບັນຫາທີ່ເກີດຂຶ້ນຢູ່ແຕ່ລະທ້ອງຖິ່ນຢ່າງຖືກຕ້ອງ, ສອດຄ່ອງ ແລະ ທັນການ.
ໃນກອງປະຊຸມທັງ 2 ແຂວງ, ຕາງໜ້າຄະນະໂຄສະນາອົບຮົມແຂວງ ໄດ້ຂຶ້ນລາຍງານສະພາບແນວຄິດ-ຫາງສຽງສັງຄົມທີ່ພົ້ນເດັ່ນຂອງແຂວງ ໃຫ້ທີ່ປະຊຸມໄດ້ຮັບຊາບ; ຫຼັງຈາກນັ້ນ, ບັນດາຜູ້ແທນກອງປະຊຸມ ກໍໄດ້ຜັດປ່ຽນກັນຂຶ້ນລາຍງານສະພາບແນວຄິດ-ຫາງສຽງສັງຄົມ ທີ່ເກີດຂຶ້ນຢູ່ພາຍໃນຂະແໜງການຂອງຕົນ ກໍຄືຢູ່ພາຍໃນແຂວງ, ພ້ອມທັງນໍາສະເໜີແນວທາງວິທີການແກ້ໄຂໃຫ້ສອດຄ່ອງ ແລະ ທັນການ ເພື່ອພ້ອມກັນນໍາພາແນວຄິດສັງຄົມໃຫ້ມີຄວາມຮັບຮູ້, ເຂົ້າໃຈທີ່ຖືກຕ້ອງ ແລະ ເປັນເອກະພາບກັນໃນທົ່ວສັງຄົມ; ຕອນທ້າຍຂອງກອງປະຊຸມ ທ່ານ ລາວປາວຊົ່ງ ນະວົງໄຊ ກໍາມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ຍັງໄດ້ໃຫ້ກຽດໂອ້ລົມ ໂດຍໄດ້ເນັ້ນໜັກໃຫ້ຄະນະພັກ, ອົງການປົກຄອງແຂວງຕ້ອງຖືສຳຄັນວຽກງານການເມືອງ-ແນວຄິດ ເວົ້າລວມ, ເວົ້າສະເພາະ ກໍແມ່ນວຽກງານຕິດຕາມ, ເກັບກຳສະພາບແນວຄິດ-ຫາງສຽງສັງຄົມໃນໄລຍະໃໝ່, ເອົາໃຈໃສ່ສ້າງເງື່ອນໄຂໃນການຍົກລະດັບຄວາມຮູ້-ຄວາມສາມາດຂອງຜູ້ຮັບຜິດຊອບ ຕິດພັນກັບການສະໜອງງົບປະມານຢ່າງເໝາະສົມ ເພື່ອຕອບສະໜອງໃນການຈັດຕັ້ງປະຕິບັນວຽກງານໃຫ້ມີຄວາມສະດວກ ແລະ ມີປະສິດທິພາບສູງຂຶ້ນ, ເພີ່ມທະວີການສຶກສາອົບຮົມນຳພາແນວຄິດໃຫ້ຖັນແຖວສະມາຊິກພັັກ, ພະນັກງານ-ລັດຖະກອນ, ທະຫານ, ຕຳຫຼວດ ແລະ ປະຊາຊົນລາວບັນດາເຜົ່າ ພາຍໃນແຂວງໃຫ້ມີຄວາມຮັບຮູ້-ເຂົ້າໃຈຕໍ່ສະພາບການທີ່ເກີດຂຶ້ນ, ເຊື່ອໝັ້ນ ແລະ ໃຫ້ການຮ່ວມມື ຕໍ່ມາດຕະການແກ້ໄຂສະພາບຄວາມຫຍຸ້ງຍາກທາງດ້ານເສດຖະກິດຂອງຂັ້ນເທິງ; ເປັນເຈົ້າການເກັບກຳ, ວິເຄາະ, ວິໄຈສະພາບແນວຄິດ-ຫາງສຽງສັງຄົມທີ່ມີຕໍ່ການນຳພາຂອງພັກ ແລະ ການຄຸ້ມຄອງຂອງລັດໃຫ້ເລິກເຊິ່ງ, ເພີ່ມຄວາມແຫຼມຄົມໃນການອະທິບາຍຕອບແກ້ບັນຫາຕ່າງໆ ທີ່ສັງຄົມໃຫ້ຄວາມສົນໃຈໃຫ້ທ່ວງທັນກັບສະພາບການທີ່ເກີດຂຶ້ນຢູ່ແຕ່ລະທ້ອງຖິ່ນ ໂດຍສະເພາະ ໃນໄລຍະປັດຈຸບັນ ຕ້ອງສຸມໃສ່ການກະກຽມໃຫ້ແກ່ການດໍາເນີນກອງປະຊຸມໃຫຍ່ 3 ຂັ້ນຂອງພັກ, ການສະເຫຼີມສະຫຼອງ 3 ວັນປະຫວັດສາດ ແລະ ການຜັນຂະຫຍາຍມະຕິ, ຄຳສັ່ງຕ່າງໆຂອງພັກ-ລັດ, ນອກນັ້ນ ຍັງໄດ້ເນັ້ນໜັກໃນການເຄື່ອນໄຫວວຽກງານໂຄສະນາ ໂດຍສະເພາະ ແມ່ນວຽກງານໂຄສະນາປະຖະກະຖາ, ວຽກງານໂຄສະນາເຄື່ອນທີ່ ແລະ ວຽກງານອົບຮົມໃຫ້ແກ່ເປົ້າໝາຍຕ່າງໆ.
ໃນໂອກາດດຽວກັນ ທ່ານຮອງຫົວໜ້າຄະນະໂຄສະນາອົບຮົມສູນກາງພັກ ພ້ອມດ້ວຍຄະນະວິຊາການຂອງຄະນະໂຄສະນາອົບຮົມສູນກາງພັກ ຍັງໄດ້ເຄື່ອນໄຫວເຮັດວຽກຮ່ວມກັບຄະນະພັກ-ຄະນະນຳຂອງເມືອງຊຳໃຕ້, ເມືອງກວັນ ແຂວງຫົວພັນ; ເມືອງໜອງແຮດ ແຂວງຊຽງຂວາງ ເພື່ອຕິດຕາມ, ຊຸກຍູ້ ແລະ ຮັບຟັງການລາຍງານສະພາບການຈັດຕັ້ງປະຕິບັດວຽກງານໂຄສະນາອົບຮົມ ກໍຄືການຈັດຕັ້ງຜັນຂະຫຍາຍມະຕິເລກທີ 206/ກມສພ ວ່າດ້ວຍການຍົກສູງຄຸນນະພາບວຽກງານການເມືອງ-ແນວຄິດໃນໄລຍະໃໝ່, ມະຕິກອງປະຊຸມວຽກງານການເມືອງ-ແນວຄິດທົ່ວປະເທດ ຄັ້ງທີ V, ຄໍາສັ່ງເລກທີ 04/ຄລສພ ວ່າດ້ວຍການເພີ່ມທະວີວຽກງານຕິດຕາມ, ເກັບກໍາສະພາບແນວຄິດ-ຫາງສຽງສັງຄົມໃນໄລຍະໃໝ່, ຕິດພັນກັບການລົງເລິກແລກປ່ຽນທັດສະນະ, ແລກປ່ຽນບົດຮຽນທາງດ້ານວິຊາການລະຫວ່າງສູນກາງ ແລະ ທ້ອງຖິ່ນ ເພື່ອແນໃສ່ເຮັດໃຫ້ການຈັດຕັ້ງປະຕິບັດວຽກງານໂຄສະນາອົບຮົມ ມີປະສິດທິພາບ ແລະ ຫັນປ່ຽນໄປສູ່ຄຸນນະພາບໃໝ່ຂຶ້ນກວ່າເກົ່າ.
ຂ່າວ ແລະ ພາບ: ສຸກັນຍາ ເນື່ອງມະນີ
