ໃນຕອນບ່າຍວັນທີ 10 ມັງກອນ 2024 ສະຖາບັນເຕັກໂນໂລຊີການສື່ສານຂໍ້ມູນຂ່າວສານ ກະຊວງເຕັກໂນໂລຊີ ແລະ ການສື່ສານໄດ້ຈັດກອງປະຊຸມສຳມະນາຫົວຂໍ້”ຈາກຍຸກ ICT-DIGITAL ສູ່ຍຸກ AI ໂລກຈະປ່ຽນເປັນຮູບແບບໃດໃນເມື່ອ AI ພັດທະນາຢ່າງກ້າວກະໂດດ” ໃຫ້ແກ່ນັກພະນັກງານບັນດາກະຊວງ/ອົງການທຽບເທົ່າ ໃນນັ້ນ, ກໍມີຕາງໜ້າໃຫ້ຄະນະໂຄສະນາອົບຮົມສູນກາງພັກເຂົ້າຮ່ວມແນ່ໃສ່ເຮັດໃຫ້ບັນດາກະຊວງອົງການ ໄດ້ຮັບຮູ້ ແລະ ເຂົ້າໃຈກ່ຽວກັບການພັດທະນາຢ່າງກ້າວກະໂດດຂອງAI.
ໃນກອງປະຊຸມ ທ່ານ ປອ ປະດັບໄຊ ໄຊຍະໂຄດ ຫົວໜ້າສະຖາບັນເຕັກໂນໂລຊີການສື່ສານຂໍ້ມູນຂ່າວສານໄດ້ກ່າວຈຸດປະສົງ ແລະ ກ່າວເປີດກອງປະຊຸມໃນຄັ້ງນີ້ໂດຍເນັ້ນໃສ່ການຍົກລະດັບ ແລະ ແລກປ່ຽນບົດຮຽນແບບແຜນວິທີການຄົ້ນຄວ້າວິທະຍາສາດ ທາງດ້ານ ໄອຊີທີ (ICT), ປັນຍາປະດິດ (AI)ການຂັບເຄື່ອນດ້ານບຸກຄະລາກອນໃນຍຸກການຫັນເປັນດິຈິຕອນ.
ຈາກນັ້ນ, ໄດ້ຮັບຟັງການສຳມະນາຫົວຂໍ້”ຈາກຍຸກ ICT-DIGITAL ສູ່ຍຸກ AI ໂລກຈະປ່ຽນເປັນຮູບແບບໃດໃນເມື່ອ AI ພັດທະນາຢ່າງກ້າວກະໂດດ” ສະເໜີໂດຍ ທ່ານ ເດັ່ນພົງ ສຸກພັກດີ,ຮອງອະທິການບໍດີຝ່າຍການສຶກສາ ແລະ ດິຈິຕອນ, ມະຫາວິທະຍາໄລຂອນແກ່ນ ; ທ່ານ ອະນຸຊາ ໂສມາບຸດ, ຜູ້ຊ່ວຍອະທິການບໍດີຝ່າຍການສຶກສາ, ມະຫາວິທະຍາໄລຂອນແກ່ນ; ທ່ານ ກິດຊະວັດ ໂລ່ວັດຊະລິນ, ຮອງອະທິການບໍດີຝ່າຍວິຊາການວິໄຈ ແລະ ການຕ່າງປະເທດ,ມະຫາວິທະຍາໄລຂອນແກ່ນ ເຊີ່ງທັງ 3ທ່ານ ໄດ້ຍົກໃຫ້ເຫັນເຖິງບາດກ້າວການຂະຫຍາຍຕົວຂອງລະບົບປັນຍາປະດິດAI, ການນຳໃຊ້ລະບົບປັນຍາປະດິດAI ທີ່ມີໃນປັດຈຸບັນເຂົ້າໃນວຽກງານຕ່າງໆ , ການແກ້ໄຂບັນຫາ ແລະ ປະໂຫຍດຂອງAI, ພ້ອມກັນນັ້ນ ໃນກອງປະຊຸມດັ່ງກ່າວຍັງໄດ້ມີການແລກປ່ຽນປະກອບຄຳຄິດເຫັນເພື່ອເປັນທິດທາງໃນການສຶກສາ ແລະ ນຳໃຊ້ບັນດາເຕັກໂນໂລຊີໃນຍຸກAI.
ຂ່າວ: ກົມຂໍ້ມູນຂ່າວສານ ແລະ ຝຶກອົບຮົມ, ຄອສພ.
ຮູບພາບ: ສະຖາບັນເຕັກໂນໂລຊີການສຶ່ສານຂໍ້ມູນຂ່າວສານ, ກຕສ.