ສະພາທິດສະດີສູນກາງພັກສະຫຼຸບການຈັດຕັ້ງປະຕິບັດວຽກງານ
ປະຈໍາ 06 ເດືອນຕົ້ນປີ ແລະ ທິດທາງແຜນການປະຈໍາ 06 ເດືອນທ້າຍປີ 2025
ໃນວັນທີ 20 ສິງຫາ 2025 ນີ້ ທີ່ຫ້ອງປະຊຸມຊັ້ນ 02, ສໍານັກງານສະພາທິດສະດີສູນກາງພັກ (ຫຼັກ6) ສະພາທິດສະດີສູນກາງພັກ ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວຽກງານ ປະຈໍາ 06 ເດືອນຕົ້ນປີ ແລະ ທິດທາງແຜນການປະຈໍາ 06 ເດືອນທ້າຍປີ 2025 ພາຍໃຕ້ການເປັນປະທານແລະກ່າວເປີດ ຂອງ ສະຫາຍ ຄຳພັນ ເຜີຍຍະວົງ ຄະນະເລຂາທິການສູນກາງພັກຫົວໜ້າຄະນະໂຄສະນາອົບຮົມສູນກາງພັກປະທານສະພາທິດສະດີສູນກາງພັກ. ກອງປະຊຸມໃນຄັ້ງນີ້ມີບັນດາສະຫາຍຄະນະປະຈໍາສະພາທິດສະດີສູນກາງພັກ, ສະມາຊິກສະພາທິດສະດີສູນກາງພັກ ແລະພະນັກງານຫຼັກແຫຼ່ງຫ້ອງການສະພາທິດສະດີສູນກາງພັກ ເຂົ້າຮ່ວມຢ່າງພ້ອມພຽງ.
ໃນກອງປະຊຸມ ສະຫາຍ ຄໍາມອນ ຈັນທະຈິດ, ຮອງຫົວໜ້າຄະນະໂຄສະນາອົບຮົມສູນກາງພັກ, ຮອງປະທານຜູ້ປະຈຳການສະພາທິດສະດີສູນກາງພັກ ໄດ້ຂຶ້ນຜ່ານບົດສະຫຼຸບຕີລາຄາການຈັດຕັ້ງປະຕິບັດວຽກງານປະຈໍາ06 ເດືອນຕົ້ນປີ 2025 ແລະ ທິດທາງ 06 ເດືອນທ້າຍປີ ໂດຍຍົກໃຫ້ເຫັນບັນດາຜົນງານໃນ 06 ເດືອນຜ່ານມາ ເປັນຕົ້ນ: ວຽກຄົ້ນຄວ້າທິດສະດີ ແລະພຶດຕິກຳ ໃນປີ 2025; ເຊິ່ງຖືກຮັບຮອງບົດວິພາກໂຄງການ ຈໍານວນ 04 ໂຄງການ ຄື: ໜຶ່ງ, “ຍຸດທະສາດການພັດທະນາເສດຖະກິດແບບຍືນຍົງເປັນມິດກັບສິ່ງແວດລ້ອມຢ່າງຍາວນານ” ແນໃສ່ນຳພາປະເທດບໍ່ຕົກເຂົ້າໃນແຮ້ວ ຂອງປະເທດລາຍຮັບປານກາງ ໂດຍມອບໃຫ້ຄະນະກຳມະການດ້ານເສດຖະກິດ-ການເງິນ ເປັນຜູ້ຮັບຜິດຊອບ; ສອງ, ຫົວຂໍ້: “ດຳເນີນນະໂຍບາຍການຕ່າງປະເທດແຫ່ງສັນຕິພາບ ແລະການຮ່ວມມື ເພື່ອການພັດທະນາໃນໂລກຫຼາຍຂົ້ວ” ໂດຍມອບໃຫ້ຄະນະກຳມະການດ້ານການເມືອງ-ຄວາມໝັ້ນຄົງ ເປັນຜູ້ຮັບ ຜິດຊອບ; ສາມ, ຫົວຂໍ້: “ສືບຕໍ່ປົກປັກຮັກສາ ແລະເສີມຂະຫຍາຍວັດທະນະທຳແຫ່ງຊາດ ສົມທົບກັບການຮັບເອົາຄວາມກ້າວໜ້າຈາກວັດທະນະທຳ ຂອງໂລກ” ໂດຍມອບໃຫ້ຄະນະກຳມະການດ້ານວັດທະນະທຳ-ສັງຄົມ ເປັນຜູ້ຮັບຜິດຊອບ; ສີ່, ຫົວຂໍ້: “ພັກນຳພາໂດຍກົງ, ເດັດຂາດ ແລະຮອບດ້ານ” ໂດຍມອບໃຫ້ຄະນະເລຂາທິ ການວິທະຍາ ສາດ ເປັນຜູ້ຮັບຜິດຊອບ.
ນອກຈາກນີ້, ໄດ້ຮັບຮອງເອົາຫົວຂໍ້ໃຫຍ່, ຫົວຂໍ້ຍ່ອຍ ຂອງກອງປະຊຸມສຳມະນາທິດສະດີ ສອງພັກ ລາວ-ຫວຽດນາມ XII, ລາວ-ຈີນ ຄັ້ງທີ XIII ປີ 2025 ແລະ ລາວ-ກູບາ ຄັ້ງທີ III ປີ 2026.
ສໍາລັບການຄົ້ນຄວ້າທິດສະດີ ແລະ ສະຫຼຸບພຶດຕິກໍາ ຮັບໃຊ້ແນວທາງຂອງພັກ ໄດ້ສໍາເລັດການຮຽບຮຽງຮັບຮອງ ແລະ ຈັດພິມເປັນປື້ມ ກ່ຽວກັບການສ້າງປະຖົມປັດໄຈຕາມເສັ້ນທາງກ້າວຂຶ້ນສັງຄົມນິຍົມ ຢູ່ ສປປ ລາວ; ການຄົ້ນຄວ້າສ້າງໂຄງການ ການເມືອງຂອງພັກປະຊາຊົນປະຕິວັດລາວ ໄດ້ສໍາເລັດການປັບປຸງ ແລະ ຈັດພິມເປັນສະບັບທີ 09, ລົງວັນທີ 31 ກໍລະກົດ 2025; ການກະກຽມສະຫຼຸບ 40 ປີ ແຫ່ງການປ່ຽນແປງໃໝ່ ຢູ່ ສປປ ລາວ ມາຮອດປັດຈຸບັນໄດ້ສໍາເລັດການກວດແກ້, ຮຽບແຮງເນື້ອໃນເປັນສະບັບທີ 03 ເພື່ອກະກຽມລາຍງານ ຕໍ່ກອງປະຊຸມສູນກາງຄັ້ງທີ 11 ສະໄໝທີ XI.
ກອງປະຊຸມຍັງຍົກໃຫ້ເຫັນດ້ານດີ, ດ້ານອ່ອນ, ບົດຮຽນທີີ່ຖອດຖອນໄດ້ ພ້ອມກັນນັ້ນກໍໄດ້ກຳນົດທິດທາງແຜນການຈັດຕັ້ງເຄື່ອນໄຫວວຽກງານໃນ 06 ເດືອນທ້າຍ ປີ 2025 ໂດຍສະເພາະຄາດໝາຍສູ້ຊົນ ຂອງວຽກງານຕ່າງໆໃຫ້ສຳເລັດຜົນເປັນຈິງ ບັນດາຜົນສຳເລັດ ແລະຜົນງານທີ່ຍາດມາໄດ້ຕະຫຼອດ 6 ເດືອນຜ່ານມາໄດ້ສະແດງເຖິງຄວາມເປັນເອກະພາບ ແລະ ຄວາມຮັບຜິດຊອບການເມືອງສູງ ຂອງບັນດາສະມາຊິກສະພາທິດສະດີສູນກາງພັກ; ການປະກອບສ່ວນອັນສຳຄັນ ແລະ ສົມກຽດ ເຂົ້າໃນການປັບປຸງບູລະນະລັດປະຊາທິປະໄຕ ປະຊາຊົນໃຫ້ມີຄວາມເຂັ້ມແຂງ ແລະ ໜັກແໜ້ນ ນັ້ນໄດ້ປະກອບສ່ວນເຂົ້າໃນພັດທະນາເສດຖະກິດ-ສັງຄົມ ຂອງປະເທດຊາດ ແລະການຄົ້ນຄວ້າກຳນົດແນວທາງ, ແຜນນະໂຍບາຍຂອງພັກ-ລັດ ຢ່າງມີປະສິດທິພາບ.
ຂ່າວ: ສະພາທິດສະດີສູນກາງພັກ
