ພົບປະແລກປ່ຽນການປັບປຸງຫຼັກສູດປະລິນຍາຕີ ສາຂາໂຄສະນາອົບຮົມ
ລະຫວ່າງ ກົມອົບຮົມ ຄະນະໂຄສະນາອົບຮົມສູນກາງພັກ ກັບ ຄະນະປັດຊະຍາ ສະຖາບັນການເມືອງ-ການປົກຄອງແຫ່ງຊາດ
@ ຂ່າວ-ພາບ: ຄະນະຮັບຜິດຊອບປັບປຸງຫຼັກສູດ ກົມອົບຮົມ
ຕອນເຊົ້າ ຂອງວັນທີ 20 ສິງຫາ 2025 ຢູ່ທີ່ຫ້ອງປະຊຸມໂຕະມົນຊັ້ນ2 ຂອງຄະນະໂຄສະ ນາອົບຮົມສູນກາງພັກ; ຄະນະຮັບຜິດຊອບປັບປຸງເນື້ອໃນຫຼັກສູດປະລິນຍາຕີສາຂາໂຄສະນາ ກົມອົບຮົມ, ຄະນະໂຄສະນາອົບຮົມສູນກາງພັກ ຮ່ວມກັບ ຄະນະປັບປຸງຫຼັກສູດ ຄະນະປັດຊະຍາ ສະຖາບັນການເມືອງ-ການປົກຄອງແຫ່ງຊາດ ໄດ້ພົບປະແລກປ່ຽນບົດຮຽນຮ່ວມກັນ ໂດຍພາຍໃຕ້ການເປັນປະທານ ຂອງທ່ານ ຄໍາກອງ ທໍາມະເທວາ ຄະນະພັກ, ຫົວໜ້າກົມອົບຮົມ ຄະນະໂຄສະນາອົບຮົມສູນກາງພັກ ມີທ່ານ ປທ ສີຈັນ ສູນດາລາ ຮອງຫົວໜ້າຄະນະປັດຊະຍາ ສະຖາບັນການເມືອງ-ການປົກຄອງແຫ່ງຊາດ ພ້ອມດ້ວຍຄະນະຮັບຜິດຊອບປັບປຸງເນື້ອໃນຫຼັກສູດເຂົ້າຮ່ວມ.
ຈຸດປະສົງ ຂອງພົບປະແລກປ່ຽນບົດຮຽນ ໃນຄັ້ງນີ້ ເພື່ອໃຫ້ປັບປຸງເນື້ອໃນຫຼັກສູດປະລິຍາຕີສາຂາໂຄສະນາອົບຮົມ ໃຫ້ມີຄຸນນະພາບ, ປະສິທິພາບ ແລະ ສອດຄ່ອງກັບສະພາບຄວາມເປັນຈິງ ໃນເນື້ອໂຄງຮ່າງຫຼັກສູດການຮຽນ-ການສອນນີ້ ແມ່ນປະກອບມີ 07 ພາກວິຊາ ຄື: 1 ຄວາມຮູ້ພື້ນຖານກ່ຽວກັບວຽກງານແນວຄິດຂອງພັກ, 2 ວິຊາໂຄສະນາ, 3 ວິຊາອົບຮົມ, 4 ວິຊາສັງລວມ ແລະ ຫາງສຽງສັງຄົມ, 5 ວິຊາເຕັກນິກການຂຽນຂ່າວ, ບົດຄວາມ ແລະ ບົດຜ່ານສື່, 6 ວິຊາຂໍ້ມູນຂ່າວສານ, 7 ວິຊາຄູໂຄສະນາອົບຮົມ.
ໃນການພົບປະແລກປ່ຽນ ໃນຄັ້ງນີ້ ຄະນະຜິດຊອບທັງສອງພາກສ່ວນ ໄດ້ປະກອບຄວາມຄິດຄໍາເຫັນໃສ່ເນື້ອໃນຫຼັກສູດປະລິນຍາຕີສາຂາໂຄສະນາອົບຮົມ ຢ່າງກົງໄປກົງມາແນ່ໃສ່ເຮັດໃຫ້ມີເນື້ອໃນເລິກເຊິ່ງທັງຍົກໃຫ້ເຫັນແຕ່ລະບັນຫາຕໍ່ເນື້ອໃນການປັບປຸງຫຼັກສູດ ແລະ ການກໍານົດໜ່ວຍກິດໃຫ້ຖືກຕ້ອງສອດ ຄ່ອງກັບຫຼັກສູດທີ່ກະຊວງສຶກສາທິການ ແລະ ກິລາ ວາງອອກ.
ໃນຕອນທ້າຍຂອງກອງປະຊຸມ ທ່ານ ຄໍາກອງ ທໍາມະເທວາ ຄະນະພັກ ຫົວໜ້າກົມອົບຮົມ ຄະນະໂຄສະນາອົບຮົມສູນກາງພັກ ໄດ້ມີຄໍາເຫັນຊີ້ນໍາຕື່ມວ່າ: ຮຽກຮ້ອງໃຫ້ຄະນະຮັບຜິດຊອບປັບປຸງຫຼັກສູດທັງສອງພາກສ່ວນ ສືບຕໍ່ປະສານສົມທົບກັນແນ່ໃສ່ປັບປຸງເນື້ອໃນຫຼັກສູດການຮຽນການສອນ ໃຫ້ມີເນື້ອໃນເລິກເຊິ່ງ ພ້ອມທັງ ແບ່ງຄວາມຮັບຜິດຊອບກັນຢ່າງລະອຽດຈະແຈ້ງແນ່ໃສ່ເພື່ອເຮັດໃຫ້ການຈັດຕັ້ງປະຕິບັດໂຄງການດັ່ງກ່າວປະກົດຜົນເປັນຈິງ.