ໃນຕອນເຊົ້າຂອງວັນທີ 20 ກັນຍາ 2024 ໜ່ວຍສະຫະພັນແມ່ຍິງກົມກວດກາ ຄະນະໂຄສະນາອົບຮົມສູນກາງພັກ ໄດ້ຈັດກອງປະຊຸມສະຫຼຸບການເຄື່ອນໄຫວວຽກງານຂອງຕົນຂຶ້ນ ທີ່ຫ້ອງປະຊຸມ ຊັ້ນ 5 ຂອງຄະນະໂຄສະນາອົບຮົມສູນກາງພັກ; ໃຫ້ກຽດເຂົ້າຮ່ວມ ແລະ ເປັນປະທານຮ່ວມໂດຍ ສະຫາຍ ສະຫວ່າງ ດາລາແສນ ເລຂາ ໜ່ວຍພັກ ວ່າການຫົວໜ້າກົມກວດກາ, ສະຫາຍ ນ. ພວງມາລີ ອັກຄະມຸນຕີ ກຳມະການຄະນະພັກ, ປະທານສະຫະພັນແມ່ຍິງ ຄະນະໂຄສະນາອົບຮົມສູນກາງພັກ ແລະ ອົງການຈັດຕັ້ງມະຫາຊົນ, ເຂົ້າຮ່ວມມີຕາງໜ້າໜ່ວຍສະຫະພັນແມ່ຍິງ ອ້ອມຂ້າງຄະນະໂຄສະນາອົບຮົມສູນກາງພັກ ແລະ ສະມາຊິກແມ່ຍິງພາຍໃນໜ່ວຍກົມກວດກາທຸກສະຫາຍ.
ໃນກອງປະຊຸມ ສະຫາຍ ນ. ບຸນປະຄອຍ ດວງມະໂນ ປະທານສະຫະພັນແມ່ຍິງໜ່ວຍກົມກວດກາ ໄດ້ຂຶ້ນກ່າວເປີດກອງປະຊຸມຢ່າງເປັນທາງການ ພ້ອມທັງຜ່ານບົດສະຫຼຸບວຽກງານແມ່ຍິງ ຕະຫຼອດໄລຍະ 5 ປີຜ່ານ ມາ ຕໍ່ກອງປະຊຸມ ອັນເປັນຂີດໝາຍສໍາຄັນຍິ່ງຕໍ່ຊີວິດການເມືອງຂອງໜ່ວຍສະຫະພັນແມ່ຍິງ ທີ່ສາມາດຍາດໄດ້ ຜົນສຳເລັດໃນຫຼາຍດ້ານເປັນກ້າວໆມາ.
ຈາກນັ້ນຄະນະໜ່ວຍສະຫະພັນແມ່ຍິງຊຸດເກົ່າໄດ້ຜ່ານບົດສໍາຫຼວດການນໍາພາ ຂອງຄະນະໜ່ວຍສະຫະ ພັນແມ່ຍິງກົມກວດກາ ໃນໄລຍະ 5 ປີຜ່ານມາ ພ້ອມທັງອຳລາໜ້າທີ່.
ກອງປະຊຸມໄດ້ຜ່ານຜົນຂອງການທາບທາມຢັ່ງຄະແນນສຽງ ແລະ ປະກາດລາຍຊື່ຄະນະສະຫະພັນແມ່ຍິງຊຸດໃໜ່ຂອງກົມກວດກາເຊິ່ງມີລາຍຊື່ດັ່ງນີ້:
– ສະຫາຍ ນ. ບຸນປະຄອຍ ດວງມະໂນ, ເປັນປະທານສະຫະພັນແມ່ຍິງກົມກວດກາ;
– ສະຫາຍ ນ. ສີມອນ ກາຖະຍະລາດ, ເປັນຮອງປະທານສະຫະພັນແມ່ຍິງກົມກວດກາ ເພື່ອສຶບຕໍ່ນໍາພາ ສະຫະພັນແມ່ຍິງກົມກວດກາ.
ໃນຕອນທ້າຍຂອງພິທີ ກອງປະຊຸມຍັງໄດ້ຮັບຟັງການໂອ້ລົມຂອງ ສະຫາຍ ນ. ພວງມາລີ ອັກຄະມຸນຕີ ກຳມະການພັກ, ປະທານສະຫະພັນແມ່ຍິງ ຄະນະໂຄສະນາອົບຮົມສູນກາງພັກ ເຊິ່ງທ່ານກ່າວວ່າ ກອງປະຊຸມສະຫຼຸບວຽກງານແມ່ຍິງ ຂອງໜ່ວຍສະຫະພັນແມ່ຍິງຄັ້ງນີ້ ເປັນຂີດໝາຍທີ່ສຳຄັນໃນຊີວິດການເມືອງ ຂອງ ໜ່ວຍແມ່ຍິງພວກເຮົາ ເພາະກອງປະຊຸມໄດ້ສັງເກດຕີລາຄາຢ່າງຮອບດ້ານ, ພາວະວິໄສ, ກົງໄປກົງມາຕໍ່ການ ເຄື່ອນໄຫວຈັດຕັ້ງປະຕິບັດທິດທາງໜ້າທີ່ໃນໄລຍະຜ່ານມາ ໂດຍຊີ້ໃຫ້ເຫັນຜົນງານ ແລະ ຜົນສຳເລັດທີ່ຍາດມາໄດ້ ຕະຫຼອດໄລຍະຜ່ານມາ, ເສີມຂະຫຍາຍດ້ານດີທີ່ຕັ້ງໜ້າ ແລະ ເອົາໃຈໃສ່ປັບປຸງດ້ານທີ່ຄົງຄ້າງ ໃຫ້ສອດຄ່ອງກັບເງື່ອນໄຂສະພາບຕົວຈິງ ກອງປະຊຸມຄັ້ງນີ້ ຍັງໄດ້ກຳນດທິດທາງໜ້າທີ່ຕົ້ນຕໍໄລຍະ 5 ປີຕໍ່ໜ້າ. ໃນໂອກາດນີ້ ປະທານໄດ້ເນັ້ນໃຫ້ຄະນະໜ່ວຍສະຫະພັນແມ່ຍິງກົມກວດກາ ຊຸດໃໜ່ ຕ້ອງໄດ້ເອົາໃຈໃສ່ຍົກສູງຄວາມຮັບຜິດ ຊອບຂອງຕົນ ໃຫ້ຫຼາຍຂຶ້ນ, ຄຽງຄູ່ກັບການປົກປັກຮັກສາ ແລະ ເສີມຂະຫຍາຍວັດທະນະທໍາອັນດີງາມຂອງແມ່ຍິງທີ່ເປັນເອກະລັກຂອງຊາດໄວ້ ໃຫ້ຢືນຍົງຄູ່ກັບຄົນລາວ, ຊາດລາວເຮົາຕະຫຼອດໄປ.
