ຮອງຫົວໜ້າຄະນະໂຄສະນາອົບຮົມສູນກາງພັກ ລົງເຄື່ອນໄຫວວຽກງານ ຢູ່ແຂວງບໍລິຄຳໄຊ
ໃນລະຫວ່າງວັນທີ 7-11 ມັງກອນ 2025 ທ່ານ ສາຄອນ ພົມມະລາດ ກໍາມະການພັກ ຮອງຫົວໜ້າຄະນະໂຄສະນາອົບຮົມສູນກາງພັກ, ຜູ້ຊີ້ນຳກົມໂຄສະນາ, ກົມອົບຮົມ ແລະ ວາລະສານ ອະລຸນໃໝ່ ພ້ອມຄະນະ ໄດ້ລົງຊຸກຍູ້ວຽກງານໂຄສະນາອົບຮົມ, ວຽກງານວາລະສານອະລຸນໃໝ່ ຢູ່ແຂວງບໍລິຄໍາໄຊ.
ໃນຕອນເຊົ້າວັນທີ 7 ມັງກອນ 2025 ຜ່ານມາ, ທ່ານຮອງຫົວໜ້າຄະນະໂຄສະນາອົບຮົມສູນກາງພັກ ພ້ອມຄະນະ ໄດ້ເຂົ້າພົບ ທ່ານ ວົງສີ ທອງສີອິນທິປັນຍາ ຄະນະປະຈໍາພັກແຂວງ, ປະທານແນວລາວສ້າງຊາດແຂວງ ຜູ້ຊີ້ນໍາອົງການຈັດຕັ້ງມະຫາຊົນ ເພື່ອແຈ້ງຈຸດປະສົງຂອງການມາເຄື່ອນໄຫວ ແລະ ເຮັດວຽກຢູ່ແຂວງບໍລິຄຳໄຊ ໄດ້ຮັບຊາບ. ຈຸດປະສົງຕົ້ນຕໍຂອງການເຄື່ອນໄຫວຢູ່ແຂວງບໍລິຄຳໄຊ ໃນເທື່ອນີ້ ກໍເພື່ອຊຸກຍູ້, ຕິດຕາມ ແລະ ກໍາໄດ້ຜົນສໍາເລັດການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ກອງປະຊຸມໃຫຍ່ ຂອງອົງຄະນະພັກແຂວງ, ເມືອງ ແລະ ການພັດທະນາເສດຖະກິດ-ສັງຄົມ ກໍຄືການກະກຽມກອງປະຊຸມໃຫຍ່ 3 ຂັ້ນ ຂອງພັກ ຕິດພັນກັບການສະຫຼຸບຕີລາຄາຜົນການຈັດຕັ້ງປະຕິບັດ 40 ປີ ແນວທາງການປ່ຽນແປງໃໝ່; ການກຽມສະ ເຫຼີມສະຫຼອງ 3 ວັນປະຫວັດສາດ ສໍາຄັນຂອງພັກ ແລະ ຂອງຊາດ; ຊຸກຍູ້ຕິດຕາມການເຄື່ອນໄຫວວຽກງານໂຄສະນາອົບຮົມ ກໍຄືວຽກງານການເມືອງ-ແນວຄິດຢູ່ພາຍໃນແຂວງ; ນຳສະເໜີກ່ຽວກັບການຈັດຕັ້ງ ແລະ ການເຄື່ອນໄຫວປະຕິບັດບົດບາດ-ໜ້າທີ່ການເມືອງໃນໄລຍະໃໝ່ ຂອງວາລະ ສານອະລຸນໃໝ່ ໃນຖານະເປັນວາລະສານທິດສະດີ ແລະ ພຶດຕິກໍາຂອງພັກປະຊາຊົນປະຕິວັດລາວ ໂດຍສະເພາະ ການແລກປ່ຽນກ່ຽວກັບການຄົ້ນຄວ້າທິດສະດີ ແລະ ສັງລວມພຶດຕິກຳ ຢູ່ສູນກາງ ແລະ ທ້ອງຖິ່ນ ທັງເປັນການປຸກລະດົມກຳລັງແຮງສັງລວມ-ເສີມຂະຫຍາຍສະຕິປັນຍາ, ເພື່ອນຮ່ວມງານ ເພື່ອນຜູ້ອ່ານ ປະກອບສ່ວນປັບປຸງ ແລະ ສ້າງການຫັນປ່ຽນວຽກງານວາລະສານອະລຸນໃໝ່ ໃຫ້ດີຂຶ້ນເປັນລໍາດັບ; ສາມາດເກັບກຳ, ສັງລວມເປັນຂໍ້ມູນ ຮັບໃຊ້ໃນການຄົ້ນຄວ້າ ແລະ ສ້າງເປັນຜະລິດຕະພັນ ໝາກຜົນແຫ່ງການນຳພາ-ຊີ້ນຳ ກໍຄືສະພາບການພັດທະນາເສດຖະກິດ-ສັງຄົມໃນທົ່ວແຂວງ ແລະ ອັນພົ້ນເດັ່ນ ຢູ່ທ້ອງຖິ່ນຮາກຖານ, ເຜີຍແຜ່ລົງວາລະສານອະລຸນໃໝ່ ຢ່າງມີຊີວິດຊີວາ ແລະ ແທດກັບຕົວຈິງ ໃນຕໍ່ໜ້າ.
ໃນຕອນບ່າຍ ຂອງວັນດຽວກັນ ກໍໄດ້ຮ່ວມເຮັດວຽກກັບຄະນະໂຄສະນາອົບຮົມແຂວງ, ມີພະນັກງານທົ່ວຄະນະໂຄສະນາອົບຮົມແຂວງ, ມີຕາງໜ້າຜູ້ທີ່ຮັບຜິດຊອບໃນວຽກໂຄສະນາ, ຖະແຫຼງຂ່າວ-ສື່ມວນຊົນ, ວາລະ ສານ, ຄົ້ນຄວ້າສັງລວມ ຈາກ: ຫ້ອງວ່າການແຂວງ, ຄະນະຈັດຕັ້ງແຂວງ, ຄະນະກວດກາ, ໂຮງຮຽນການເມືອງ-ການປົກຄອງ, ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ວິທະຍຸແຂວງ, ຜູ້ຮັບຜິດຊອບວຽກງານໂຄສະນາ ຂອງກອງບັນຊາການທະຫານແຂວງ… ເພື່ອແລກປ່ຽນກ່ຽວກັບການຄົ້ນຄວ້າທິດສະດີ ແລະ ສັງລວມພຶດຕິກຳ ຢູ່ສູນກາງ ແລະ ທ້ອງຖິ່ນ; ການສ້າງເພື່ອນຮ່ວມງານ ເພື່ອນຜູ້ອ່ານ ປະກອບສ່ວນປັບປຸງ ແລະ ສ້າງການຫັນປ່ຽນວຽກງານວາລະສານອະລຸນໃໝ່ ໃຫ້ດີຂຶ້ນເປັນລໍາດັບ. ໃນກອງປະຊຸມ ບັນດາສະຫາຍທີ່ເຂົ້າຮ່ວມກອງປະຊຸມ ໄດ້ມີຄວາມເຫັນຢ່າງກົງໄປກົງມາ, ຍົກໃຫ້ເຫັນສະພາບພົ້ນເດັ່ນທັງດ້ານຕັ້ງໜ້າ, ຂໍ້ຍຸ້ງຍາກ-ຄົງຄ້າງ ແລະ ທິດທາງເຄື່ອນໄຫວໃນຕໍ່ໜ້າ ໃນວຽກງານສື່ມວນຊົນຂອງພັກ ກໍຄືວຽກງານ ວາລະສານອະລຸນໃໝ່ ດ້ວຍບັນຍາກາດຟົດຟື້ນ ແລະ ຄວາມເປັນເຈົ້າການ ລະອຽດສົມຄວນ.
ໃນໂອກາດດັ່ງກ່າວ ທ່ານ ສາຄອນ ພົມມະລາດ ໄດ້ໂອ້ລົມຕໍ່ກອງປະຊຸມແລກປ່ຽນບົດຮຽນ ດັ່ງກ່າວ ກ່ຽວກັບການສ້າງການຫັນປ່ຽນວຽກງານໂຄສະນາອົບຮົມໄປສູ່ຄຸນນະພາບໃໝ່ ເຊິ່ງກວມເອົາເນື້ອໃນ ເຊັ່ນ: ການນຳພາ-ຊີ້ນໍາ-ແບບແຜນວິທີເຮັດວຽກ, ເປັນບັນຫາສໍາຄັນທີ່ສຸດຕັດສິນຜົນສໍາເລັດ ຫຼື ປະລາໄຊ ໃນການເຄື່ອນໄຫວວຽກງານ; ການຫັນປ່ຽນດ້ານເນື້ອໃນ ຮູບການ ແລະ ວິທີການເຮັດວຽກງານໂຄສະນາອົບຮົມ; ສ້າງ ແລະ ປັບປຸງເນື້ອໃນໃຫ້ອຸດົມສົມບູນ, ມີຊີວິດຊີວາ, ເນື້ອໃນເຮັດວຽກງານໂຄສະນາອົບຮົມ ຕ້ອງຄົບຖ້ວນ ແລະ ຮອບດ້ານ, ຮັບໃຊ້ໃນແຕ່ລະເປົ້າໝາຍ ຕ້ອງຕອບສະໜອງກັບໜ້າທີ່ການເມືອງໃນແຕ່ລະໄລຍະ. ພ້ອມກັນນັ້ນ ໃນການເຮັດວຽກງານໂຄສະນາອົບຮົມ ຕ້ອງໄດ້ນໍາໃຊ້ຫຼາຍຮູບການ, ຫຼາຍວິທີການ ດ້ວຍພາຫະນະຕ່າງໆ ນັບທັງອັນເປັນມູນເຊື້ອໃຫ້ສອດຄ່ອງກັບຈຸດພິເສດ ຂອງແຕ່ລະເປົ້າໝາຍ; ນໍາໃຊ້ວິທີໂຄສະນາເຜີຍແຜ່ ດ້ວຍລະບົບໂຄສະນາປາກເປົ່າ, ການປຸກລະດົມ, ປາຖະກະຖາ, ໜັງສືພິມ, ວາລະສານ, ວິທະຍຸ, ໂທລະພາບ, ອິນເຕີເນັດ, ເວັບໄຊສ໌, ສື່ແບບໃໝ່, ສື່ສັງຄົມອອນລາຍ; ການປັບປຸງກົງຈັກການຈັດຕັ້ງ ແລະ ກໍ່ສ້າງພະນັກງານ ແມ່ນໄປຕາມທິດ “ກະທັດຮັດ, ໂປ່ງໃສ, ມີປະສິດທິພາບ ຫັນໄປສູ່ທັນສະໄໝ”, ເຮັດໃຫ້ກົງຈັກການຈັດຕັ້ງ ແລະ ຈໍານວນພະນັກງານມີຄວາມເໝາະສົມ, ແຕ່ຍັງສາມາດຮັບປະກັນການຈັດຕັ້ງປະຕິບັດໜ້າທີ່ການເມືອງ ມີປະສິດທິພາບສູງ. ພ້ອມກັນນັ້ນ ການສະໜອງງົບປະມານ, ພາຫະນະ, ວັດຖຸອຸປະກອນ ໃຫ້ພຽງພໍກັບວຽກງານຕົວຈິງ, ຮັບປະກັນໃຫ້ວຽກງານດັ່ງກ່າວ ສາມາດເຄື່ອນໄຫວໄດ້ຢ່າງມີປະສິດທິຜົນສູງ ເຊິ່ງແມ່ນປັດໄຈໜຶ່ງທີ່ສໍາຄັນປະກອບສ່ວນເຮັດໃຫ້ວຽກງານໂຄສະນາອົບຮົມມີຄຸນນະພາບດີຂຶ້ນ.
ນອກຈາກນັ້ນ, ທີມງານ ຍັງຈະໄດ້ລົງເຄື່ອນໄຫວວຽກງານຢູ່ເມືອງວຽງທອງ ແລະ ເມືອງໄຊຈຳພອນ, ແຂວງບໍລິຄຳໄຊ ຕື່ມອີກ.
