ຝຶກອົບຮົມວຽກງານວິຊາສະເພາະໂຄສະນາອົບຮົມ ໃຫ້ແກ່ພະນັກງານພາຍໃນຄະນະໂຄສະນາອົບຮົມສູນກາງພັກ
ໃນຕອນເຊົ້າຂອງວັນທີ 18 ສິງຫາ 2025, ທີ່ຫ້ອງປະຊຸມຊັ້ນ2 ຄະນະໂຄສະນາອົບຮົມສູນກາງພັກໄດ້ຈັດຊຸດຝຶກອົບຮົມວຽກງານວິຊາສະເພາະໂຄສະນາອົບຮົມ ໃຫ້ແກ່ພະນັກງານພາຍໃນ ຄອສພ ເປັນເວລາ 10 ວັນ ໂດຍໃຫ້ກຽດເຂົ້າຮ່ວມເປັນປະທານຂອງ ນາງ ວິລະວອນ ພັນທະວົງ ຄະນະປະຈຳພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ມີບັນດາຄະນະກົມ, ຄູອາຈານ ແລະ ພະນັກງານພາຍໃນ ຄອສພ ເຂົ້າຮ່ວມຢ່າງພ້ອມພຽງ.
ຈຸດປະສົງຂອງການຈັດຝຶກອົບຮົມໃນຄັ້ງນີ້ ແມ່ນປະຕິບັດຍຸດທະສາດການພັດທະນາວຽກງານໂຄສະນາອົບຮົມໄປສູ່ຄຸນນະພາບໃໝ່ພາຍຫຼັງວຽກງານຖະແຫຼ່ງຂ່າວມາຂຶ້ນກັບຄະນະໂຄສະນາອົບຮົມສູນກາງພັກ ເຮັດໃຫ້ພະນັກງານຜູ້ສືບທອດມີຄວາມເຂົ້າເລິກເຊິ່ງໃນວຽກງານໂຄສະນາອົບຮົມໄລຍະໃໝ່ ໂດຍສະເພາະການຫັນວຽກງານໂຄສະນາອົບຮົມເປັນທັນສະໄໝໃຫ້ເຂົ້າກັບຍຸກປັດຈຸບັນ, ສ້າງຄວາມເຂົ້າໃຈ ແລະ ຖ່າຍທອດໃຫ້ ບັນດານັກຝຶກອົບຮົມກ່ຽວກັບວຽກງານໂຄສະນາ, ສິລະປະໃນການປາກເວົ້າ ແລະ ການປາຖະກະຖາ, ວຽກງານອົບຮົມ, ວຽກງານຄົ້ນຄວ້າ-ສັງລວມ, ວຽກງານຫາງສຽງສັງຄົມ, ວຽກງານໂຄສະນາຜ່ານສື່, ການນໍາໃຊ້ເຕັກໂນໂລຊີທີ່ທັນສະໄໝເຂົ້າໃນການເຮັດວຽກງານໂຄສະນາອົບຮົມ, ການຂຽນບົດຂ່າວສານຕ່າງໆໃຫ້ເລິກເຊິ່ງກວ່າເກົ່າ ແນໃສ່ເຮັດໃຫ້ຜູ້ເຂົ້າຮ່ວມຝຶກອົບຮົມສາມາດນໍາໄປປັບປຸງ ແລະ ຍົກລະດັບຂອງຕົນເອງໃນການເຮັດວຽກງານໂຄສະນາອົບຮົມໃຫ້ດີຂຶ້ນກວ່າເກົ່າ ເພື່ອຕອບສະໜອງໜ້າທີ່ການເມືອງທີ່ນັບມື້ນັບສູງຂຶ້ນ.
