ພິທີຝຶກອົບຮົມວຽກງານໄອທີໃຫ້ແກ່ຊາວໜຸ່ມ ຄອສພ
ໃນວັນທີ 22 ກັນຍາ 2020 ທີ່ຫ້ອງອິນເຕີເນັດຊັ້ນ3 ຂອງກົມຂໍ້ມູນຂ່າວສານຄະນະໂຄສະນາອົບຮົມສູນກາງພັກໄດ້ເປີດຝຶກອົບຮົມວຽກງານໄອທີໃຫ້ແກ່ຊາວໜຸ່ມ ຄອສພໂດຍໃຫ້ກຽດເຂົ້າຮ່ວມໂດຍທ່ານ ນ. ສຸກສະຫວັນ ອິນຄະວິໄລ ເລຂາຄະນະບໍລິຫານງານຊາວໜຸ່ມຂອງຄະນະໂຄສະນາອົບຮົມສູນກາງພັກ ແລະ ສະມາຊິກຊາວໜຸ່ມຈຳນວນ 15 ສະຫາຍ, ຍິງ 12 ສະຫາຍ.
ໃນພິທີ ທ່ານ ນ. ສຸກສະຫວັນ ອິນຄະວິໄລ ເລຂາຄະນະບໍລິຫານງານຊາວໜຸ່ມຂອງຄະນະໂຄສະນາອົບຮົມສູນກາງພັກກ່າວເປີດພິທີ ແລະ ກ່າວຈຸດປະສົງ ໃນການເປີດຊຸດຝຶກອົບຮົມວຽກງານໄອທີໃຫ້ແກ່ຊາວໜຸ່ມ ຄອສພ ໃນຄັ້ງນີ້ ພ້ອມນັ້ນໄດ້ຮຽກຮ້ອງໃຫ້ນັກຝຶກອົບຮົມເອົາໃຈໃສ່ຍາດແຍ່ງເອົາຄວາມຮູ້ເພື່ອນຳໄປໝູນໃຊ້ເຂົ້າໃນການ ປະຕິບັດໜ້າທີ່ວຽກງານວິຊາສະເພາະຂອງຕົນ. ເນື້ອໃນການຝຶກອົບຮົມໃນຄັ້ງມີຄື:
- ການກຳນົດສິດຕ່າງໆໃນການນຳໃຊ້ຄອມພິວເຕີ.
- ການບຳລຸງຮັກສາຄອມພິວເຕີ ແລະ ການຝຶກການວາງມືໃນການພິມ
- ຄວາມຮູ້ພື້ນຖານນຳໃຊ້ໂປຼແກຼມ Excel
- ການແກ້ໄຂ Usbທີ່ມີໄວຣັດ
- ວິທີດາວໂຫຼດ ແລະ ຕິດຕັ້ງແອນຕິ້ໄວຣັດ
- ການນຳໃຊ້gmail ແລະ google drive
- ການນຳໃຊ້ໂປຼແກຼມ Anydesk
- ຄວາມຮູ້ພື້ນຖານນຳໃຊ້ໂປຼແກຼມ Powerpoint
ການຝຶກອົບຮົມໄດ້ດຳເນີນມາຮອດວັນທີ 15 ຕຸລາ 2020 ໄດ້ສຳເລັດຢ່າງຈົບງາມ ສະນັ້ນ ໃນພິທີສະຫຼຸບບັ້ນຝຶກອົບຮົມ ທ່ານ ວັນຕຸລາ ຣັກນຸດ ວ່າການຫົວໜ້າກົມຂໍ້ມູນຂ່າວສານໄດ້ໃຫ້ກຽດມອບໃບຢັ້ງຢືນ ແລະ ມີຄຳເຫັນໂອ້ລົມ ເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ນັກຝຶກອົບຮົມທີ່ໄດ້ເອົາໃຈໃສ່ຄົ້ນຄວ້າ, ຮ່ຳຮຽນ ແລະ ແລກປ່ຽນປະສົບການເຊິ່ງກັນ ແລະ ກັນທັງເຫັນໄດ້ເຖີງຄວາມໝາຍຄວາມສຳຄັນຂອງວຽກງານໄອທີໃນຍຸກ4,0 ເຖິງວ່າຈະມີເວລາສັ້ນກໍຕາມແຕ່ທາງຄູ, ອາຈານ ແລະ ນັກຝຶກອົບຮົມໄດ້ພ້ອມກັນເອົາໃຈໃສ່ຈັດຕັ້ງປະຕິບັດຈົນປະສົບຜົນເລັດ. ການຝຶກອົບຮົມວຽກງານໄອທີຈະໄດ້ຈັດຂື້ນທຸກໆປີເພື່ອແນ່ໃສ່ສ້າງຄວາມເຂັ້ມແຂງໃຫ້ແກ່ສະມາຊິກຊາວໜຸ່ມ ຄອສພ ໃນການນຳໃຊ້ເຄື່ອງໄອທີທີ່ທັນສະໄໝ. ນອກນັ້ນທ່ານຍັງໄດ້ຮຽກຮ້ອງໃຫ້ນັກຝຶກອົບຮົມໝົດທຸກຄົນຈົ່ງສືບຕໍ່ຄົ້ນຄວ້າໝູນໃຊ້ບົດຮຽນທີ່ຮຽນມາເຂົ້າໃນໜ້າທີ່ວຽກງານ, ສືບຕໍ່ຄົ້ນຄິດປະດິດສ້າງ, ຮຽນຮູ້ດ້ວຍຕົນເອງ, ຮຽນຮູ້ນຳໝູ່ຄະນະ, ໄປຈັດຕັ້ງຜັນຂະຫຍາຍ ແລະ ນຳໃຊ້ເຂົ້າໃນວຽກງານໃຫ້ປະກົດຜົນເປັນຈິງ.
