ກົມສັງລວມ ຄະນະໂຄສະນາອົບຮົມສູນກາງພັກ ໄດ້ສົມທົບກັບ ຄະນະໂຄສະນາອົບຮົມແຂວງວຽງຈັນ ຈັດຕັ້ງຝຶກອົບຮົມວຽກງານສັງລວມ–ຫາງສຽງສັງຄົມ ຄັ້ງທີ I ທີ່ ເມືອງວັງວຽງ ແຂວງວຽງຈັນ.
ໃນລະຫວ່າງ ວັນທີ 18-19 ພຶດສະພາ 2022 ກົມສັງລວມ ຄະນະໂຄສະນາອົບຮົມສູນກາງພັກ ໄດ້ສົມທົບກັບ ຄະນະໂຄສະນາອົບຮົມແຂວງວຽງຈັນ ຈັດຕັ້ງຊຸດຝຶດອົບຮົມວຽກງານຄົ້ນຄວ້າສັງລວມ-ຫາງສຽງສັງຄົມ ຂຶ້ນທີ່ຫ້ອງປະຊຸມໃຫຍ່ຫ້ອງວ່າການເມືອງໆວັງວຽງ. ໂດຍການເປັນປະທານກ່າວເປີດ ຂອງທ່ານ ບຸນຈັນ ມາລາວົງ ກໍາມະການພັກແຂວງ, ເລຂາພັກເມືອງ, ເຈົ້າເມືອງວັງວຽງ ແລະ ໃຫ້ກຽດເຂົ້າຮ່ວມ ຂອງທ່ານ ນ. ແສງຕານ ແກ້ວອິນດາປິງ ຫົວໜ້າກົມສັງລວມ ຄະນະໂຄສະນາອົບຮົມສູນກາງພັກ, ທ່ານ ນ. ຮັ່ງລີ ແກ້ວວິໄລສັກ ຮອງຫົວໜ້າຄະນະໂຄສະນາອົບຮົມແຂວງວຽງຈັນ ພ້ອມດ້ວຍຄະນະຮັບຜິດຊອບຊຸດຝຶດອົບຮົມ ແລະ ມີນັກສໍາມະນາກອນ ເຂົ້າຮ່ວມທັງໝົດ 41 ສະຫາຍ, ຍິງ 5 ສະຫາຍ.
ການຈັດຕັ້ງຝຶກອົບຮົມໃນຄັ້ງນີ້ ແມ່ນເພື່ອເຮັດໃຫ້ຜູ້ເຂົ້າຮ່ວມຝຶກອົບຮົມ ມີຄວາມຮັບຮູ້ ແລະ ເຂົ້າໃຈ ບັນຫາພື້ນຖານກ່ຽວກັບວຽກງານຫາງສຽງສັງຄົມ, ວິທີການເກັບກໍາ ແລະ ການນໍາໃຊ້ຫາງສຽງສັງຄົມເຂົ້າໃນວຽກງານການເມືອງ-ແນວຄິດ, ການສ້າງຕາໜ່າງເພື່ອນຮ່ວມງານ ແລະ ວຽກງານຄົ້ນຄວ້າສັງລວມ ທັງໝົດນີ້ກໍເພື່ອຍົກສູງຄວາມຮັບຮູ້-ເຂົ້າໃຈຢ່າງເລິກເຊິ່ງ, ຮັບຮູ້ພາລະບົດບາດ ແລະ ຄວາມສໍາຄັນ ຕໍ່ກັບບັນດາບັນຫາດັ່ງກ່າວ ເພື່ອເຮັດໃຫ້ນັກສໍາມະນາກອນສາມາດນໍາໄປຈັດຕັ້ງປະຕິບັດເຂົ້າໃນວຽກງານວິຊາສະເພາະຂອງຕົນ ແລະ ສາມາດເປັນເສນາທິການໃຫ້ແກ່ຄະນະພັກ, ຄະນະນໍາ ໃນການສະຫຼຸບສັງລວມບັນຫາຕ່າງໆ ທາງດ້ານດີທີ່ຄວນສົ່ງເສີມ ແລະ ດ້ານຫຍໍ້ທໍ້ທີ່ຄວນປັບປຸງແກ້ໄຂໃຫ້ຂັ້ນເທິງຊອກຫາວິທີການແກ້ໄຂໃຫ້ຖຶກຕ້ອງ ແລະ ທັນການ.
ຊຸດຝຶກອົບຮົມຄັ້ງນີ້້ໄດ້ຮັບຟັງການໂອ້ລົມ ຂອງ ທ່ານ ບຸນຈັນ ມາລາວົງ ກໍາມະການພັກແຂວງ, ເລຂາພັກເມືອງ, ເຈົ້າເມືອງວັງວຽງ ໂດຍທ່ານໄດ້ຍົກໃຫ້ເຫັນເຖິງຄວາມສໍາຄັນ ຂອງວຽກງານສັງລວມ-ຫາງສຽງສັງຄົມ ເຊິ່ງເປັນວຽກໜຶ່ງທີ່ຈໍາເປັນ ແລະ ມີຄວາມສໍາຄັນໃນການນໍາພາ-ຊີ້ນໍາຂອງພັກ ແລະ ການຄຸ້ມຄອງ-ບໍລິຫານຂອງລັດ ພ້ອມນັ້ນ, ຍັງໄດ້ເນັ້ນໃຫ້ຄະນະພັກຂອງບັນດາຫ້ອງການ, ກົມກອງ ແລະ ພາກສ່ວນທີ່ກ່ຽວຂ້ອງ ຍົກສູງຄວາມຮັບຜິດຊອບໃນການຕິດຕາມບັນດາການເຄື່ອນໄຫວ ແລະ ສະພາບແນວຄິດ-ຫາງສຽງສັງຄົມຂອງພະນັກງານ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າ ທີ່ມີຕໍ່ການເຄື່ອນໄຫວວຽກງານດ້ານຕ່າງໆໃນແຕ່ລະຂົງເຂດ ໃນຄວາມຮັບຜິດຊອບຂອງຕົນ ພ້ອມທັງເປັນເຈົ້າການວິເຄາະວິໄຈບັນຫາທີ່ເກີດຂຶ້ນໃຫ້ລະອຽດ, ຈະແຈ້ງ, ຖືກຕ້ອງຊັດເຈນ ແລະ ຊອກຫາວິທີການແກ້ໄຂໃຫ້ຖືກຕ້ອງ ແລະ ທັນການ.
(ໂດຍ: ຄໍາສິງ)
