ການນຳພັກ – ລັດ ລາວ – ຫວຽດນາມ ຊົມຮູບພາບການເຄື່ອນໄຫວຂອງບັນດາຜູ້ນຳປະຕິວັດທັງສອງປະເທດ.
ການນໍາພັກ, ລັດ ລາວ-ຫວຽດນາມ, ເຂົ້າຮ່ວມພິທີວາງ ສະແດງຮູບພາບ, ເອກະສານ, ວັດຖຸພັນ ແລະ ປຶ້ມພາຍໃຕ້ຫົວຂໍ້ “ສາຍພົວພັນມິດຕະ ພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບ ດ້ານ ລາວ-ຫວຽດນາມ,ຫວຽດ ນາມ-ລາວ” ໃນວັນທີ 17 ກໍລະກົດນີ້ ທີ່ຫໍພິພິທະພັນໄກສອນ ພົມວິຫານ. ເປັນກຽດເຂົ້າຮ່ວມພິທີມີ ສະຫາຍ ຫວໍ ວັນ ເຖື້ອງ ກໍາມະການກົມການເມືອງສູນ ກາງພັກ ຜູ້ປະຈໍາການຄະ ນະເລຂາທິການສູນກາງພັກ ຫົວໜ້າຄະນະຊີ້ນໍາລະດັບຊາດ ສະເຫຼີມສະຫຼອງປີສາມັກຄີມິດຕະພາບ ຫວຽດນາມ-ລາວ ປີ 2022, ສະຫາຍ ສອນໄຊ ສີພັນດອນ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ຮອງຫົວ ໜ້າຄະນະຊີ້ນໍາລະດັບຊາດສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ປີ 2022, ມີບັນດາສະຫາຍການນໍາລະດັບສູງຂອງພັກກອມມູນິດຫວຽດນາມພ້ອມດ້ວຍ ບັນດາສະຫາຍການນໍາພັກ-ລັດ ປະຊາຊົນ ປະຕິວັດລາວ.
ໃນພິທີ, ສະຫາຍ ທອງສະລິດ ມັງໜໍ່ເມກ ເລຂາທິການສູນກາງພັກ ຫົວ ໜ້າຫ້ອງວ່າການສູນກາງພັກ ຕາງໜ້າຄະນະຊີ້ນໍາລະດັບຊາດ ການສະເຫຼີມ ສະຫຼອງປີສາມັກຄີມິດຕະພາບ ລາວ-ຫວຽດນາມ ປີ 2022, ກໍຄືຕາງໜ້າຫ້ອງວ່າການສູນກາງພັກປະຊາຊົນປະຕິວັດລາວຂື້ນກ່າວ ຮັບຕ້ອນຄະນະຜູ້ແທນຂອງພັກກອມມູນິດຫວຽດນາມທີ່ເດີນທາງມາ ເຂົ້າຮ່ວມພິທີສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ໂດຍສະເພາະ 45 ປີ ແຫ່ງການເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ (18 ກໍລະກົດ 1977 – 18 ກໍລະກົດ 2022) ໃນຄັ້ງນີ້ ຊຶ່ງນໍາພາໂດຍສະຫາຍ ຫວໍວັນເຖື້ອງ ກຳມະການກົມການເມືອງສູນກາງພັກ ຜູ້ປະຈໍໍາການຄະນະເລຂາທິການສູນກາງພັກກອມມູນິດຫວຽດນາມ.
ຫ້ອງວ່າການສູນກາງພັກ ປະຊາຊົນ ປະຕິວັດລາວ ແລະ ຫ້ອງວ່າການສູນກາງພັກກອມມູນິດຫວຽດນາມ ໄດ້ນໍາເອົາຮູບພາບການເຄື່ອນໄຫວຂອງສອງພັກ, ສອງລັດ ແລະປະຊາຊົນສອງຊາດ ລາວ-ຫວຽດນາມ ມາວາງສະແດງຢູ່ສອງຈຸດຄື: ຢູ່ ສປປ ລາວ ແມ່ນຢູ່ຫໍພິພິທະພັນ ໄກສອນ ພົມວິຫານ ແລະ ຢູ່ຫວຽດນາມແມ່ນຢູ່ ຫໍພິພິທະພັນການປະຕິວັດ ຫວຽດນາມ ຊຶ່ງຢູ່ ຫໍພິພິທະພັນ ໄກສອນ ພົມວິຫານ ນີ້, ມີທັງໝົດ 400 ຮູບ ໂດຍແບ່ງອອກເປັນ 3 ພາກ ຄື: ພາກທີ I : ປະຫວັດສາດສາຍພົວພັນທີ່ເປັນມູນເຊື້ອຮ່ວມສໍາພັນສູ້ຮົບ ແລະ ການສ້າງສາຍພົວພັນການທູດ ລາວ- ຫວຽດນາມ, ຫວຽດນາມ-ລາວ (1930-1975); ພາກທີ II: ເພີ່ມທະວີຄວາມສາມັກຄີມິດ ຕະພາບ ແລະ ການຮ່ວມມື ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ (1976-1986) ແລະ ພາກທີ III: ສາຍພົວພັນມິດ ຕະພາບທີ່ຍິ່ງໃຫຍ່ ຄວາມສາ ມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ, ຫວຽດນາມ-ລາວ ຕະຫຼອດໄລຍະ 36 ປີ ແຫ່ງການປ່ຽນແປງໃໝ່ (1986-2022)ຮູບພາບ ແລະ ການເຄື່ອນໄຫວທັງໝົດແມ່ນຍັງມີອີກຫຼວງຫຼາຍ ທີ່ບໍ່ສາມາດເກັບທ້ອນໂຮມເຂົ້າໃນອາຄານ ຫຼື ສະຖານທີ່ໃດໜຶ່ງໝົດໄດ້. ແຕ່ທັງໝົດນັ້ນ ລ້ວນແຕ່ສ່ອງແສງເຖິງຄວາມມີຊີວິດຊີວາ, ຄວາມເປັນມາ, ການເຕີບໃຫຍ່ຂະຫຍາຍຕົວ, ມູນເຊື້ອການພົວພັນຮ່ວມມືຊ່ວຍເຫຼືອຊຶ່ງກັນ ແລະກັນ ບໍ່ວ່າຈະຢູ່ໃນໄລຍະຕໍ່ສູ້ກູ້ຊາດ ກໍຄືໄລຍະແຫ່ງການປົກປັກຮັກສາ ແລະພັດທະນາສ້າງສາປະເທດຊາດ. ຄວາມສາມັກຄີພິເສດ ຂອງສອງພັກ, ສອງລັດ ແລະປະຊາຊົນສອງຊາດ ລາວ-ຫວຽດນາມ ທີ່ມີໜຶ່ງບໍ່ມີສອງຫາຫຍັງຈະມາປຽບທຽບໄດ້ ຊຶ່ງຍາມໃດພັກ-ລັດ ແລະປະຊາຊົນສອງຊາດ ກໍໄດ້ເພີ່ມພູນຄູນສ້າງ ໃຫ້ເກີດດອກອອກຜົນ ແລະນັບມື້ນັບສະຫງ່າງາມ ຄືດັ່ງ ປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກ ຂອງປະຊາຊົນລາວບັນດາເຜົ່າ ໄດ້ກ່າວວ່າ: “ພູອາດຈະເຊາະເຈື່ອນ ແມ່ນໍ້າລໍາເຊອາດຈະເຫືອດແຫ້ງ, ແຕ່ສາຍພົວພັນມິດຕະພາບ ລາວ-ຫວຽດນາມ ຈະໝັ້ນຄົງຂະໜົງແກ່ນຕະຫຼອດກາລະນານ” ແລະ ບົດກະວີອັນລືຊື່ຂອງ ປະທານ ໂຮ່ຈິມິນ ທີ່ວ່າ:
“ຮັກຫອມກັນໝາຍໝັ້ນ ຫຼາຍສັນພູກໍ່ປີນໄຕ່ ຫຼາຍນໍ້າ ໃຫຍ່ ແລະ ໂຄກກວ້າງ ຂວາງ ກັ້ນກໍເດີນດັ້ນດຸ່ງໄປ ສອງຊາດລາວ-ຫວຽດນາມໄດ້ ຝັງຄວາມຮັກຢູ່ໃນໃຈ ຮົ່ງຮ່າທັງແມ່ຂອງ ບໍ່ເລິກປຸນປານໄດ້.”
(ຂ່າວ-ພາບ:www.pasaxon.org.la)