ວຽກງານການເມືອງແນວຄິດ ໃນທ່າມກາງການລະບາດຂອງພະຍາດໂຄວິດ-19.
ທ່ານ ຄຳວິສັນ ແກ້ວສຸວັນ
ຜູ້ຊ່ວຍຄະນະໂຄສະນາອົບຮົມສູນກາງພັກ
ຈາກສະພາບການລະບາດຂອງພະຍາດໂຄວິດ-19 ໃນຮອບສອງ ເຊິ່ງເລີ່ມຮຸນແຮງຂຶ້ນໃນເດືອນເມສາທີ່ຜ່ານມາ ເຮັດໃຫ້ມີຜູ້ຕິດເຊື້ອຂະຫຍາຍວົງກ້ວາງ ໄປໃນ 15 ແຂວງ, ໃນນັ້ນມີຜູ້ຕິດເຊື້ອລະບາດແຮງຢູ່ນະຄອນຫຼວງວຽງຈັນ, ແຂວງຈຳປາສັກ ແລະ ແຂວງບໍ່ແກ້ວ ມີທ່າອ່ຽງເພີ່ມຂຶ້ນ ໃນໄລຍະເວລາສັ້ນໆ ຜູ້ຕິດເຊື້ອເພີ່ມຂຶ້ນຫຼາຍກວ່າປີ 2020 ຈົນຕົວເລກສະສົມເຖິງ 1 ພັນກວ່າຄົນ ແລະ ມີຜູ້ເສຍຊີວິດ 1 ຄົນ.
ຕໍ່ໜ້າສະພາບການດັ່ງກ່າວ; ຄະນະໂຄສະນາອົບຮົມສູນກາງພັກ ໄດ້ສ້າງເອກະສານນຳພາແນວຄິດເລກທີ 16/ຄອສພ ລົງວັນທີ 11/05/2021 ວ່າດ້ວຍ: ການເພີ່ມທະວີການຊີ້ນໍາວຽກງານການເມືອງ-ແນວຄິດໃນການສະກັດກັ້ນ, ປ້ອງກັນ, ຄວບຄຸມ ແລະ ແກ້ໄຂພະຍາດໂຄວິດ-19.
ເອກະສານສະບັບນີ້ລວມມີ 3 ຂໍ້ໃຫ່ຍຄື:
I. ສະພາບການກຳເນີດ ແລະ ແຜ່ລະບາດຂອງພະຍາດໂຄວິດ-19.
ລວມມີ:
1/ ການກຳເນີດຂອງພະຍາດອັກເສບປອດສາຍພັນໃໝ່ (ໂຄວິດ-19).
2/ ການແຜ່ລະບາດຂອງພະຍາດອັກເສບປອດສາຍພັນໃໝ່ (ໂຄວິດ-19).
3/ ຜົນກະທົບຂອງເຊື້ອພະຍາດໂຄວິດ-19.
II. ການສະກັດກັ້ນຄວບຄຸມ, ປ້ອງກັນ ແລະ ແກ້ໄຂພະຍາດໂຄວິດ-19.
III. ເພີ່ມທະວີການຊີ້ນຳວຽກງານການເມືອງ-ແນວຄິດ ໃນການສະກັດກັ້ນ, ປ້ອງກັນ, ຄວບຄຸມ ແລະ ແກ້ໄຂ ພະຍາດໂຄວິດ-19.
ຈາກເນື້ອໃນທັງໝົດນັ້ນມັນຮຽກຮ້ອງໃຫ້ທຸກຝ່າຍກ່ຽວຂ້ອງເປັນຕົ້ນແມ່ນ: ຄະນະປະຈຳພັກກະຊວງ-ອົງການ; ສູນກາງແນວລາວສ້າງຊາດ ແລະ ອົງການຈັດຕັ້ງມະຫາຊົນຂັ້ນສູນກາງ; ຄະນະປະຈຳພັກນະຄອນຫຼວງວຽງຈັນ ແລະ ແຂວງໃນທົ່ວປະເທດ; ຄະນະໂຄສະນາອົບຮົມນະຄອນຫຼວງວຽງຈັນ, ຄະນະໂຄສະນາອົບຮົມແຂວງໃນທົ່ວປະເທດ ຕ້ອງໄດ້ກຳແໜ້ນບັນດາ ເນື້ອໃນສຳຄັນຂອງເອກະສານນີ້ໃນການຜັນຂະຫຍາຍໂຄສະນາເຜີຍແຜ່ຢ່າງກ້ວາງຂວາງ ໃຫ້ທົ່ວສັງຄົມໄດ້ຮັບຊາບຢ່າງທົ່ວເຖິງ.
ຈຸດສຳຄັນທີ່ຕ້ອງກຳແໜ້ນໃນເອກະສານສະບັບນີ້ແມ່ນຂໍ້ທີສາມໃຫ່ຍຄື:
ເພີ່ມທະວີການຊີ້ນຳວຽກງານການເມືອງ-ແນວຄິດ ໃນການສະກັດກັ້ນ, ປ້ອງກັນ, ຄວບຄຸມ ແລະ ແກ້ໄຂ ພະຍາດໂຄວິດ-19.
ປັດຈຸບັນຜູ້ຕິດເຊື້ອພະຍາດໂຄວິດ-19 ຍັງສືບຕໍ່ມີທ່າອ່ຽງເພີ່ມຂຶ້ນໃນທຸກໆມື້ ເຊິ່ງຈະນຳໄປສູ່ການສ້າງຄວາມສູນເສຍດ້ານຊີວິດ, ສຸຂະພາບ ກໍຄືຜົນກະທົບຢ່າງໜັກໜ່ວງທາງດ້ານເສດຖະກິດ, ວັດທະນະທຳ-ສັງຄົມ, ການເຄື່ອນໄຫວວຽກງານຕ່າງໆຂອງພັກ ແລະ ລັດ.
ເພື່ອສືບຕໍ່ຈັດຕັ້ງປະຕິບັດຄຳສັ່ງເລກທີ 15/ນຍ ແລະ ຄຳສັ່ງແນະນຳເລກທີ 87/ຄລສພ; ຄະນະພັກແຕ່ລະຂັ້ນຕ້ອງໄດ້ເພີ່ມທະວີວຽກງານສຶກສາອົບຮົມການເມືອງ-ແນວຄິດ, ໂຄສະນາປຸກລະດົມ, ຊຸກຍູ້ໃຫ້ພະນັກງານ-ລັດຖະກອນ, ທະຫານ, ຕຳຫຼວດ, ປະຊາຊົນ ແລະ ຊັ້ນຄົນຕ່າງໆໃນສັງຄົມ ສືບຕໍ່ປະຕິບັດທິດຊີ້ນຳຂອງກົມການເມືອງສູນກາງພັກທີ່ວ່າ: ຖືເອົາການຕ້ານ, ສະກັດກັ້ນ, ຄວບຄຸມ ແລະ ປ້ອງກັນພະຍາດໂຄວິດ-19 ເປັນໜ້າທີ່ຍຸດທະສາດສຳຄັນ ແລະ ຮີບດ່ວນໃນການນຳພາຊີ້ນຳ ແລະ ບັນຊາຕົວຈິງຄືໃນສະພາວະສົງຄາມ; ຖືເປັນປັດໄຈສຳຄັນຕັດສີນກວ່າໝູ່ ທີ່ຈະເຮັດໃຫ້ປະເທດເຮົາສາມາດຄວບຄຸມ ການແຜ່ລະບາດຂອງເຊື້ອພະຍາດໂຄວິດ-19, ຕ້ອງຮັບປະກັນບໍ່ໃຫ້ມີການລະບາດຄັ້ງໃໝ່ ແລະ ລະບາດຮອບໃຫ່ຍທີ່ທະວີຄູນຂຶ້ນກວ່າເກົ່າ. ສະນັ້ນ, ຄະນະພັກແຕ່ລະຂັ້ນຕ້ອງຖືເອົາວຽກງານໂຄສະນາສຶກສາອົບຮົມເປັນວຽກກົກ, ເປັນວຽກງານແຖວໜ້າ ແລະ ເປັນວຽກງານຮີບດ່ວນຂອງທົ່ວພັກ, ທົ່ວລັດ ແລະ ທົ່ວປວງຊົນທັງຊາດ, ປະກອບສ່ວນຢ່າງຕັ້ງໜ້າ ເຂົ້າຮ່ວມພາລະກິດສະກັດກັ້ນ, ປ້ອງກັນ, ຄວບຄຸມ ພະຍາດໂຄວິດ-19 ເຊິ່ງເປັນທິດຊີ້ນຳ ເປັນເອກະພາບໃນການຈັດຕັ້ງປະຕິບັດ ແຕ່ສູນກາງຮອດທ້ອງຖິ່ນ ດ້ວຍຈິດໃຈທີ່ວ່າ: “ສະໜາມຮົບຕ້ານພະຍາດກໍຄືກັນກັບສະໜາມຮົບຕີສັດຕູ” ເຊິ່ງຄະນະພັກແຕ່ລະຂັ້ນ ຕ້ອງເພີ່ມທະວີຊີ້ນຳ-ນຳພາວຽກງານໂຄສະນາສຶກສາອົບຮົມການເມືອງ-ແນວຄິດດັ່ງນີ້:
- ໂຄສະນາສຶກສາອົບຮົມການເມືອງ-ແນວຄິດ ກ່ຽວກັບການຍົກສູງສະຕິຄວາມຕື່ນຕົວ, ເປັນເຈົ້າການປະກອບສ່ວນທາງດ້ານສະຕິປັນຍາ ແລະ ກຳລັງແຮງທາງດ້ານວັດຖຸຂອງປວງຊົນ, ຂອງທົ່ວຊັ້ນຄົນໃນສັງຄົມ ໃນການຈັດຕັ້ງປະຕິບັດຄຳສັ່ງເລກທີ 15/ນຍ ແລະ ຄຳແນະນຳເລກທີ 87/ຄລສພ, ກໍຄືບັນດາແຈ້ງການຂອງຫ້ອງວ່າການສຳນັກງານນາຍົກ, ຂອງຄະນະສະເພາະກິດລະດັບຊາດ, ຄະນະສະເພາະກິດຂອງພາກສ່ວນຕ່າງໆ ທັງຂັ້ນສູນກາງ ແລະ ທ້ອງຖິ່ນຢ່າງເຂັ້ມງວດ ແລະ ມີປະສິດທິຜົນສູງ.
- ໂຄສະນາສຶກສາອົບຮົມ ແລະ ປຸກລະດົມໃຫ້ພະນັກງານ, ລັດຖະກອນ, ທະຫານ, ຕຳຫຼວດ, ນັກຮຽນ, ນັກສຶກສາ, ກຳມະກອນ, ປະຊາຊົນບັນດາເຜົ່າ ແລະ ຊັ້ນຄົນໃນສັງຄົມ ຍົກສູງສະຕິຕື່ນຕົວ ແລະ ເປັນເຈົ້າການ ໃນການຕໍ່ສູ້ຕ້ານກັບການໂຄສະນາທີ່ບິດເບືອນໃສ່ຮ້າຍປ້າຍສີ, ສ້າງຂ່າວປອມ, ຂ່າວທີ່ບໍ່ມີມູນຄວາມຈິງ ທີ່ອອກຜ່ານທາງສື່ອອນລາຍ, ເຟດບຸກ, ສື່ອິນເຕີເນັດ… ເພື່ອສ້າງຄວາມປັ່ນປ່ວນ, ສ້າງຄວາມບໍ່ສະຫງົບຢູ່ສັງຄົມ, ປຸກລະດົມຂົນຂວາຍປະຊາຊົນ, ຊັ້ນຄົນ, ທຸກພາກສ່ວນ, ທຸກກຳລັງແຮງຢູ່ໃນສັງຄົມ ພ້ອມກັນປະກອບສ່ວນເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ ເພື່ອຕ້ານພະຍາດໂຄວິດ-19.
- ໂຄສະນາສຶກສາອົບຮົມກ່ຽວກັບນ້ຳໃຈຮັກຊາດ, ຈິດໃຈເອກະລາດ, ເປັນເຈົ້າຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ, ສົ່ງເສີມມູນເຊື້ອດຸໝັ່ນ, ອົດທົນ ແລະ ປະດິດສ້າງໃນການອອກແຮງງານຂອງປະຊາຊົນເຮົາ; ຊຸກຍູ້ຂະບວນການອອກແຮງງານເພີ່ມພູນຜະລິດຜົນ ເປັນຕົ້ນແມ່ນການປູກຝັງ-ລ້ຽງສັດ; ນ້ຳໃຈປະຢັດມັດທະຍັດ ເພື່ອປັບປຸງການດຳລົງຊີວິດຂອງພະນັກງານ, ທະຫານ, ຕຳຫຼວດ ແລະ ປະຊາຊົນເຮົາໃນໄລຍະທີ່ພວກເຮົາປະຕິບັດມາດຕະການປ້ອງກັນ, ຄວບຄຸມ ແລະ ແກ້ໄຂພະຍາດໂຄວິດ-19.
- ໂຄສະນາສຶກສາອົບຮົມ ກ່ຽວກັບມູນເຊື້ອຄວາມສາມັກຄີເປັນເອກະພາບພາຍໃນທົ່ວພັກ, ທົ່ວລັດ ແລະ ປວງຊົນທັງຊາດ ເພື່ອເປັນກຳລັງແຮງສັງລວມຮ່ວມແຮງ, ຮ່ວມໃຈໃນການຕ້ານ, ສະກັດກັ້ນ, ປ້ອງກັນ, ຄວບຄຸມ ແລະ ແກ້ໄຂພະຍາດໂຄວິດ-19.
- ໂຄສະນາສຶກສາອົບຮົມ ກ່ຽວກັບການເພີ່ມທະວີຄວາມສາມັກຄີ, ການພົວພັນຮ່ວມມືຮອບດ້ານ ກັບບັນດາປະເທດເພື່ອນມິດຍຸດທະສາດ, ເພີ່ມພູນຄູນສ້າງມູນເຊືຶ້ອສາມັກຄີພິເສດ ແລະ ການຮ່ວມມືຮອບດ້ານກັບ ສສ ຫວຽດນາມ; ຂະຫຍາຍການພົວພັນຮ່ວມມືທີ່ເປັນມູນເຊື້ອກັບ ສປ ຈີນ ບົນຈິດໃຈຄູ່ຮ່ວມມືຍຸດທະສາດຮອບດ້ານ, ໝັ້ນຄົງຍາວນານ ແລະ ຄູ່ຮ່ວມຊາຕາກຳ; ພົວພັນຮ່ວມມືກັບປະເທດເພື່ອນບ້ານໃກ້ຄຽງ, ບັນດາປະເທດໃນອາຊຽນ ແລະ ປະເທດເພື່ອນມິດ, ອົງການຈັດຕັ້ງສາກົນ, ອົງການຈັດຕັ້ງສັງຄົມ ເພື່ອພ້ອມກັນສະກັດກັ້ນ, ປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19.
- ໂຄສະນາປຸກລະດົມໃຫ້ພະນັກງານ, ລັດຖະກອນ, ທະຫານຕຳຫຼວດ, ກຳມະກອນ, ນັກສຶກສາ ແລະ ປະຊາຊົນ, ຊັ້ນຄົນໃນສັງຄົມ ເຂົ້າຮ່ວມຂະບວນການສັກຢາວັກຊີນ ເພື່ອສ້າງພູມຄຸ້ມກັນໃຫ້ແກ່ຮ່າງກາຍປ້ອງກັນການເຈັບເປັນ ແລະ ເສຍຊີວິດຈາການຕິດເຊື້ອພະຍາດໂຄວິດ-19, ທັງເປັນການປະກອບສ່ວນຊ່ວຍໃນການຕ້ານ, ສະກັດກັ້ນ, ປ້ອງກັນ, ຄວບຄຸມການແຜ່ລະບາດຂອງເຊື້ອພະຍາດໂຄວິດ-19.
ຂໍຮຽກຮ້ອງໃຫ້ຈັດຕັ້ງປະຕິບັດເປັນເອກະພາບກັນດ້ວຍຈິດໃຈທີ່ວ່າ:
“ສະໝາມຮົບຕ້ານພະຍາດກໍຄືກັນກັບສະໝາມຮົບຕີສັດຕູ…”