ກອງປະຊຸມສຳມະນາເປີດກວ້າງ ເພື່ອລະດົມຄວາມຄິດເຫັນຕໍ່ຮ່າງບົດຄົ້ນຄວ້າ
ຫົວຂໍ້: “ການຄົ້ນຄວ້າທິດສະດີ ແລະ ສະຫຼຸບພຶດຕິກຳໃຫ້ແກ່ການສ້າງປະຖົມປັດໄຈ ເພື່ອກ້າວເດີນສູ່ຈຸດໝາຍສັງຄົມນິຍົມ” ຢູ່ແຂວງພາກໃຕ້.
ໃນວັນທີ 10 ພຶດສະພາ 2022; ສະພາທິດສະດີສູນກາງພັກ ຮ່ວມກັບ ແຂວງຈຳປາສັກ ໄດ້ຈັດກອງປະຊຸມສໍາມະນາເປີດກວ້າງ ເພື່ອລະດົມຄວາມຄິດເຫັນປະກອບໃສ່ຮ່າງຄົ້ນຄວ້າ ໃນຫົວຂໍ້: “ການຄົ້ນຄວ້າທິດສະດີ ແລະສະຫຼຸບພຶດຕິກຳໃຫ້ແກ່ການສ້າງປະຖົມປັດໄຈ ເພື່ອກ້າວເດີນສູ່ຈຸດໝາຍສັງຄົມນິຍົມ” ທີ່ຫ້ອງປະຊຸມໃຫຍ່ຫ້ອງວ່າການແຂວງຈຳປາສັກ ໂດຍການເປັນປະທານຮ່ວມ ຂອງສະຫາຍ ປອ ກິແກ້ວ ຈັນທະບູຣີ ຮອງເລຂາ, ຮອງປະທານສະຖາບັນວິທະຍາສາດເສດຖະກິດ-ສັງຄົມແຫ່ງຊາດ, ຄະນະປະຈຳ ສທພ, ຫົວໜ້າຄະນະເລຂາທິການວິທະຍາສາດ ສະພາທິດສະດີສູນກາງພັກ ແລະ ສະຫາຍ ສາຍທອງ ໄຊຍະວົງ ຮອງເລຂາພັກແຂວງ, ປະທານສະພາປະຊາຊົນແຂວງຈຳປາສັກ, ເຂົ້າຮ່ວມມີບັນດາການນຳ 4 ແຂວງພາກໃຕ້, ມີແຂວງສະຫວັນນະເຂດ, ເຈົ້າເມືອງ, ເຈົ້ານະຄອນ, ພະແນກການຕ່າງໆອ້ອມຂ້າງແຂວງຈຳປາສັກ ແລະ ກອງເລຂາຊ່ວຍວຽກດ້ານເນື້ອໃນ.
ໃນພິທີ ສະຫາຍ ປອ ກິແກ້ວ ຈັນທະບູຣີ ຮອງເລຂາ, ຮອງປະທານສະຖາບັນວິທະຍາສາດເສດຖະກິດ-ສັງຄົມແຫ່ງຊາດ, ຄະນະປະຈຳ ສທພ, ຫົວໜ້າຄະນະເລຂາທິການວິທະຍາສາດ ສະພາທິດສະດີສູນກາງພັກໄດ້ໃຫ້ກຽດກ່າວເປີດກອງປະຊຸມເຊິ່ງທ່ານໄດ້ກ່າວວ່າກອງປະຊຸມຄັ້ງນີ້ມີຄວາມໝາຍຄວາມສຳຄັນຫຼາຍ ເພາະວ່າເປັນຄົ້ນຄວ້າປະກອບສ່ວນຄຳຄິດຄຳເຫັນທາງທິດສະດີ ແລະ ສະຫຼຸບພຶດຕິກຳໃນການປັບປຸງ ແລະ ກໍ່ສ້າງພັກເຮົາໃຫ້ເຂັ້ມແຂງທາງດ້ານສະຕິປັນຍາ ແລະ ຄວາມສາມາດນຳພາໃນທົ່ວສັງຄົມກໍ່ຄື ຄຸນຜົນປະໂຫຍດຂອງການຄົ້ນຄວ້າຫົວຂໍ້ດັ່ງກ່າວ ແມ່ນເພື່ອສ້າງເປັນບ່ອນອີງທາງດ້ານທິດສະດີວິທະຍາສາດ ແລະ ພຶດຕິກຳໃຫ້ແກ່ການກຳນົດທັດສະນະ, ແນວທາງ, ແຜນນະໂຍບາຍຂອງພັກເຮົາໃນເງື່ອນໄຂໃໝ່ ແລະ ເປັນພື້ນຖານໃຫ້ແກ່ການຮ່າງໂຄງການການເມືອງຂອງພັກເຮົາ ແຕ່ນີ້ຮອດປີ 2050 ເຊິ່ງຄາດວ່າຈະນຳສະເໜີຮັບຮອງເອົາໃນກອງປະຊຸມໃຫຍ່ ຄັ້ງທີ XII ຂອງພັກໃນຕໍໜ້າ.
ຫຼັງຈາກນັ້ນ ສະຫາຍ ປອ ດາວສະຫວັນ ເຄືອມີໄຊ ຫົວໜ້າສູນຄົ້ນຄວ້າແນວຄິດໄກສອນ ພົມວິຫານ ສມປຊ, ຮອງຫົວໜ້າຄະນະເລຂາທິການວິທະຍາສາດ ສະພາທິດສະດີສູນກາງພັກ ໄດ້ລາຍງານໂດຍສັງເຂບກ່ຽວກັບເນື້ອໃນບົດຄົ້ນຄວ້າທິດສະດີ ແລະ ສະຫຼຸບພຶດຕິກຳໃຫ້ແກ່ການສ້າງປະຖົມປັດໄຈ ເພື່ອກ້າວເດີນສູ່ຈຸດໝາຍສັງຄົມນິຍົມ (ສະບັບຫຍໍ້) ຕໍ່ກອງປະຊຸມ ໂດຍຍົກໃຫ້ເຫັນພື້ນຖານທິດສະດີ ແລະພຶດຕິກຳກ່ຽວກັບການສ້າງບັນດາປັດໄຈເພື່ອກ້າວເດີນສູ່ຈຸດໝາຍສັງຄົມນິຍົມ; ຂະບວນວິວັດແຫ່ງການກຳເນີດ ແລະສ້າງບັນດາປັດໄຈ ເພື່ອກ້າວເດີນສູ່ຈຸດໝາຍສັງຄົມນິຍົມ; ການສືບຕໍ່ສ້າງປັດໄຈໃຫ້ແກ່ການກ້າວເດີນສູ່ຈຸດໝາຍສັງຄົມນິຍົມ ຢູ່ປະເທດເຮົາ.
ພ້ອມດຽວກັນນັ້ນ, ປະທານກອງປະຊຸມໄດ້ມີຄໍາຖາມເຈາະຈີ້ມໃນບາງບັນຫາທີ່ຍັງບໍ່ທັນຈະແຈ້ງ ເພື່ອໃຫ້ຜູ້ເຂົ້າຮ່ວມກອງປະຊຸມໄດ້ປະກອບຄຳຄິດຄຳເຫັນຕໍ່ຫົວຂໍ້ຄົ້ນຄວ້າດັ່ງກ່າວ, ພ້ອມທັງໄດ້ຊີ້ນຳການປະກອບຄຳເຫັນໃຫ້ມີລັກສະນະວິທະຍາສາດ ເພື່ອຮັບໃຊ້ໃຫ້ແກ່ການປັບປຸງເນື້ອໃນບົດຄົ້ນຄວ້າໃຫ້ມີຄຸນນະພາບດີຂຶ້ນກວ່າເກົ່າ ແລະ ສອດຄ່ອງກັບສະພາບຄວາມເປັນຈິງໃນປັດຈຸບັນ.
ນອກຈາກນີ້ບັນດາການນຳແຂວງທີ່ເຂົ້າຮ່ວມຍັງໄດ້ຂື້ນລາຍງານຜົນການຈັດສຳມະນາຢູ່ພາຍໃນບັນດາແຂວງພາກໃຕ້ນຳອີກ.
ໃນໂອກາດນີ້, ສະຫາຍ ປອ ກິແກ້ວ ຈັນທະບູຣີ ຮອງເລຂາ, ຮອງປະທານສະຖາບັນວິທະຍາສາດເສດຖະກິດ-ສັງຄົມແຫ່ງຊາດ, ຄະນະປະຈຳ ສທພ, ຫົວໜ້າຄະນະເລຂາທິການວິທະຍາສາດ ສະພາທິດສະດີສູນກາງພັກໄດ້ຕີລາຄາສູງຕໍ່ຄະນະຮັບຜິດຊອບການຄົ້ນຄວ້າໃນຂົງເຂດຕ່າງໆ ທີ່ໄດ້ເປັນເຈົ້າການໃນການຄົ້ນຄວ້າ-ຂຽນຮ່າງສະບັບເບື້ອງຕົ້ນ ກໍຄືບັນດາການນຳຂອງ 4 ແຂວງພາກໃຕ້ ແລະ ພາກສ່ວນທີ່ກ່ຽວຂ້ອງທີ່ໄດ້ສຸມສະຕິປັນຍາເຂົ້າໃນການຄົ້ນຄວ້າ; ຊົມເຊີຍກອງເລຂາດ້ານເນື້ອໃນທີ່ເປັນເຈົ້າການສັງລວມ, ປັບປຸງເນື້ອໃນ, ສ້າງເປັນສະບັບຮ່າງ ແລະ ສັງລວມສະບັບສັງລວມຫຍໍ້ທີ່ມີເນື້ອໃນຈະແຈ້ງຂຶ້ນຕື່ມ.
ໃນຕອນທ້າຍ ຂອງກອງປະຊຸມປະທານກອງປະຊຸມໄດ້ໃຫ້ທິດຊີ້ນໍາໃນການສືບຕໍ່ນຳເອົາເນື້ອໃນຈິດໃຈ ຂອງກອງປະຊຸມໃນຄັ້ງນີ້ ເພື່ອໃຫ້ຄະນະຮັບຜິດຊອບດ້ານເນື້ອໃນສຸມໃສ່ປັບປຸງຮ່າງເນື້ອໃນບົດຄົ້ນຄວ້າ ແລະ ນຳເອົາເນື້ອໃນຈິດໃຈຄວາມຄິດຄວາມເຫັນຂອງກອງປະຊຸມໃນຄັ້ງນີ້ ເພື່ອນຳໄປປັບປຸງບັນດາຂໍ້ມູນຕ່າງໆໃຫ້ມີວິທະຍາສາດ, ສອດຄ່ອງກັບຕົວຈິງ ແລະ ນຳໄປສະເໜີໃນກອງປະຊຸມສູນກາງຄັ້ງຕໍ່ໄປ.
