ກົມຂໍ້ມູນຂ່າວສານປະກອບສ່ວນສິດສອນນັກສຶກສາປະລິນຍາຕີ ສາຂາໂຄສະນາອົບຮົມທີ່ສະຖາບັນການເມືອງການປົກຄອງແຫ່ງຊາດທ່າງອນສົກປີ 2019-2020
ອີງຕາມໂຄງການຂື້ນຫ້ອງສິດສອນພາກວິຊາໂຄສະນາອົບຮົມແຕ່ລະປີທີ່ທາງ ຄອສພ ໄດ້ປະກອບສ່ວນເຂົ້າໃນແຜນການຮຽນ ແລະ ການສອນ.
ກົມຂໍ້ມູນຂ່າວສານກໍແມ່ນກົມໜື່ງທີ່ໄດ້ປະກອບສ່ວນເຂົ້າໃນການສິດສອນນັກສຶກສາປະລິນຍາຕີສາຂາໂຄສະນາອົບຮົມທີ່ສະຖາບັນການເມືອງການປົກຄອງແຫ່ງຊາດທ່າງອນໂດຍມີສຶກສາທັງໝົດ 16 ຄົນ, ຍິງ 4 ຄົນ. ເຊິ່ງນຳໂດຍ ອາຈານ ວັນຕຸລາ ຣັກນຸດ ວ່າການຫົວໜ້າກົມຂໍ້ມູນຂ່າວສານ ເປັນຜູ້ຊີ້ນໍາ ແລະ ຂື້ນຫ້ອງສິດສອນພ້ອມບັນດາຄູອາຈານແຕ່ລະພະແນກ.
ຈຸດປະສົງ ແມ່ນເພື່ອຍົກລະດັບຄວາມຮູ້, ຄວາມສາມາດໃຫ້ແກ່ນັກສຶກສາກ່ຽວກັບວຽກງານຂໍ້ມູນຂ່າວສານ ໃຫ້ນັບມື້ນັບສູງ ແລະ ທັນກັບຄວາມຮຽກຮ້ອງຕ້ອງການຂອງ ໜ້າທີ່ວຽກງານ. ບັນດາເອກະສານທີ່ນໍາມາສະເໜີໃນຄັ້ງນີ້ປະກອບມີ 6 ບົດຄື:
ບົດທີ 1: ການນຳໃຊ້ເຕັກໂນໂລຢີ ຂໍ້ມູນຂ່າວສານ ເຂົ້າໃນວຽກງານໂຄສະນາອົບຮົມໃນໄລຍະໃໝ່.
ບົດທີ 2: ວິທີການນຳໃຊ້ຄອມພິວເຕີ.
ບົດທີ 3: ວິທີການນຳໃຊ້ອິນເຕີເນັດ Internet.
ບົດທີ 4: ຂ່າວສານເອເລັກໂຕຣນິກ(ເວັບໄຊສ).
ບົດທີ 5: ວຽກງານຫ້ອງສະໝຸດ ແລະ ສຳເນົາເອກະສານ.
ບົດທີ 6: ການນຳໃຊ້ລະບົບເຄືອຂ່າຍເອເລັກໂຕຼນິກເຂົ້າໃນການເຄື່ອນໄຫວວຽກງານ.
ນັກສຶກສາໄດ້ຮຽນຮູ້ພື້ນຖານ ວຽກງານໄອທີຂັ້ນຕົ້ນ, ຂັ້ນກາງ ແລະ ຂັ້ນສູງ, ທັງພາກທິດສະດີ ແລະ ພາກປະຕິບັດ ຕົວຈິງ; ໄດ້ຄົ້ນຄ້ວາ, ຮຽນຮູ້ ແລະ ປະດິດສ້າງເຕັກໂນໂລຢີ ຂໍ້ມູນຂ່າວສານ ເຂົ້າໃນວຽກງານໂຄສະນາອົບຮົມໃນຍຸກປັດຈູບັນເປັນຕົ້ນ ການສ້າງ ແລະ ສົ່ງເມວ, ການອັບຂໍ້ມູນຜ່ານ Google drive, ການເຂົ້າເຖີງສື່ຕ່າງໆ(ເວັບໄຊສ), ການນໍາໃຊ້ໂປຣແກຣມ ອັນຕີໄວຣັດ, ການເກັບຮັກສາເອກະສານເກົ່າມາເປັນອັນໃໝ່, ການສົ່ງຂໍ້ມູນຜ່ານສາຍແລນ ແລະ ອື່ນໆ…
ນອກນັ້ນແລ້ວອາຈານ ວັນຕູລາ ຣັກນຸດວ່າການຫົວໜ້າກົມຂໍ້ມູນຂ່າວສານ ຍັງໄດ້ຮຽກຮ້ອງໃຫ້ບັນດານັກຝຶກອົບຮົມ ຈົ່ງຕັ້ງໜ້າຄົ້ນຄວ້າ, ຍາດແຍ່ງ ເອົາຄວາມຮູ້ນຳອາຈານເພື່ອນຳໄປພັດທະນາ, ໜູນໃຊ້ເຂົ້າໃນວຽກງານວິຊາສະເພາະຂອງຕົນໃຫ້ນັບມື້ດີຂຶ້ນ ສ້າງຄວາມສະດວກໃນການຕິດຕໍ່ ປະສານງານ ລະຫວ່າງເມືອງ ກັບແຂວງ ກໍ່ຄືຂະແໜງການ ທີ່ກ່ຽວຂ້ອງ ໃຫ້ມີຄວາມວ່ອງໄວ ເພື່ອປັບປຸງໜ້າທີ່ວິຊາສະເພາະຂອງຕົນໃຫ້ມີການຫັນປ່ຽນຂື້ນຢ່າງຈະແຈ້ງ.
