ໃນຕອນເຊົ້າວັນທີ 13 ທັນວາ 2017 ຜ່ານມາ. ຄະນະຊາວໜຸ່ມ ຄະນະໂຄສະນາອົບຮົມສູນກາງພັກ ຮ່ວມກັບ ຊາວໜຸ່ມ 6 ອົງການຈັດຕັ້ງພັກໄດ້ຈັດຕັ້ງພິທີລະນຶກວັນຄ້າຍວັນເກີດ ປະທານ ໄກສອນ
ພົມວິຫານ ຄົບຮອບ97 ປີ ຢູ່ທີ່ ຫໍພິພິທະພັນ ໄກສອນ ພົມວິຫານ. ເຊິ່ງນຳໂດຍເລຂາຊາວໜຸ່ມ ພ້ອມດ້ວຍສະມາຊິກຊາວໜຸ່ມແຕ່ລະອົງການ ເຂົ້າຮ່ວມຢ່າງພ້ອມພຽງ.
ໃນພິທີໄດ້ມີການວາງກະຕ່າດອກໄມ້ ເພື່ອໄວ້ອາໄລ ແລະ ຈາລຶກຜົນງານ, ຄຸນງາມຄວາມດີ ຂອງປະທານໄກສອນ ພົມວິຫານ ຜູ້ນຳທີ່ແສນເຄົາລົບຮັກ ຂອງປະຊາຊົນລາວບັນດາເຜົ່າ. ຫຼັງຈາກນັ້ນຂະບວນຊາວໜຸ່ມໄດ້ພ້ອມກັນມາອອກແຮງງານ ອະນາໄມສະຖານທີ່ເຂດອະນຸສອນສະ ຖານ ປະທານ ໄກສອນ ພົມວິຫານ (ໃນຫຼັກ 6 ) ຢ່າງເປັນຂະບວນຟົດຟື້ນ, ພ້ອມນັ້ນຍັງໄດ້ເຂົ້າຢ້ຽມ ຊົມ ທັດສະນະສຶກສາ ອານຸສອນສະຖານ ຂອງປະທານໄກສອນ ພົມວິຫານ ເພື່ອສ້າງຄວາມຮັບຮູ້ ແລະ ຮໍ່າຮຽນເອົາແບບແຜນດຳລົງຊີວິດ, ພາລະກິດການເຄື່ອນໄຫວ, ອຸດົມການຂອງເພິ່ນທີ່ມີຕໍ່ປະ ເທດຊາດ, ຕໍ່ປະຊາຊົນ. ປະທານ ໄກສອນ ພົມວິຫານ ເປັນຜູ້ນຳທີ່ມີຄວາມຈົງຮັກພັກດີຕໍ່ອຸດົມການປະຕິວັດຢ່າງເດັດຂາດ ຕໍ່ສູ້ຢ່າງອົງອາດກ້າແກ່ນ ແລະ ພິລະອາດຫານ, ເດັດດ່ຽວໜ້ຽວແໜ້ນ ຍາມໃດກໍຍົກສູງສະຕິລະບຽບວິໄນຕໍ່ການຈັດຕັ້ງ, ນັບຖືໝູ່ຄະນະມີຄວາມສາມັກຄີຮັກແພງເພື່ອນມິດສະຫາຍດ້ວຍຄວາມຈິງຈັງ ແລະ ຈິງໃຈ, ມີແບບແຜນການດຳລົງຊີວິດແບບລຽບງ່າຍ ແລະ ຊື່ສັດສຸດຈະລິດ, ເປັນນັກປັນຍາຊົນຜູ້ຍິ່ງໃຫຍ່ ທີ່ມີຄວາມມານະອົດທົນ ທັດສະນະຫຼັກໝັ້ນ ແລະ ນ້ຳໃຈຮັກຊາດອັນດູດດື່ມ, ມີຈິດໃຈຕໍ່ສູ້ຢ່າງອົງອາດກ້າຫານ, ມີນ້ຳໃຈເສຍສະລະອັນສູງສົ່ງເພື່ອປະເທດຊາດ ແລະ ປະ ຊາຊົນ, ປະທານ ໄກສອນ ພົມວິຫານ ເປັນນັກປະຕິວັດ ນັກຮັກຊາດທີ່ແທ້ຈິງ ເປັນໜຶ່ງໃນຜູ້ນຳທີ່ດີເດັ່ນຂອງປະຊາຊົນລາວບັນດາເຜົ່າ. ໃນຕະຫຼອດຊີວິດການປະຕິວັດພາລະກິດຂອງເພິ່ນບໍ່ວ່າຈະຢູ່ໃນຕຳແໜ່ງໃດ ໃນຄວາມຮັບຜິດຊອບອັນໃດ ເພິ່ນກໍໄດ້ອຸທິດເຫື່ອແຮງ, ສະຕິປັນຍາ ໝົດຈິດໝົດໃຈດ້ວຍຫົວຄິດປະດິດສ້າງຂອງຕົນເອງໃຫ້ແກ່ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ເພື່ອເອກະລາດອະທິປະໄຕຂອງຊາດ ແລະ ຄວາມອຸດົມ ສົມບູນພູນສຸກຂອງປະຊາຊົນລາວ.