ກົມສັງລວມ ຄະນະໂຄສະນາອົບຮົມສູນກາງພັກ ລົງເຄື່ອນໄຫວຝຶກອົບຮົມວຽກງານສັງລວມ-ຫາງສຽງສັງຄົມ ທີ່ເມືອງຕົ້ນເຜິ້ງ ແຂວງບໍ່ແກ້ວ.
ໃນລະຫວ່າງວັນທີ 11-19 ກໍລະກົດ 2020 ກົມສັງລວມ ຄະນະໂຄສະນາອົບຮົມສູນກາງພັກ ໄດ້ສົບທົບກັບຄະນະໂຄສະນາອົບຮົມແຂວງ ແລະ ຄະນະໂຄສະນາອົບຮົມເມືອງຕົ້ນເຜິ້ງ ຈັດຕັ້ງການຝຶກອົບຮົມວຽກງານສັງລວມ-ຫາງສຽງສັງຄົມ ຊຸດທີ II ທີ່ສະໂມສອນຫ້ອງວ່າການເມືອງຕົ້ນເຜິ້ງ ພາຍໃຕ້ເປັນປະທານຮ່ວມ ແລະ ກ່າວເປີດຂອງທ່ານ ເຄື່ອນເພັດ ວົງຈັນ ກໍາມະການພັກແຂວງ, ເລຂາພັກເມືອງ ເຈົ້າເມືອງຕົ້ນເຜິ້ງ ແລະ ທ່ານ ນາງ ແສງຕານ ແກ້ວອິນດາປີງ, ຫົວໜ້າກົມສັງລວມ ຄະນະໂຄສະນາອົບຮົມສູນກາງພັກ ຊຶ່ງມີນັກສໍາມະນາກອນທີ່ມາຈາກບັນດາຫ້ອງການ ແລະ ບ້ານ ທົ່ວເມືອງຕົ້ນເຜິ້ງ ໂດຍແມ່ນບັນດາຄະນະພັກ-ຫົວໜ້າຫ້ອງການ, ເລຂາພັກ-ນາຍບ້ານ ແລະ ຄະນະໂຄສະນາອົບຮົມເມືອງ ເຂົ້າຮ່ວມທັງໝົດ 55 ສະຫາຍ, ຍິງ 13 ສະຫາຍ.
ການຈັດຝຶກອົບຮົມໃນຄັ້ງນີ້ ໄດ້ນໍາໃຊ້ເອກະສານ 4 ບົດ ຄື: ບົດທີ1 ບັນຫາພື້ນຖານກ່ຽວກັບວຽກງານຫາງສຽງສັງ ຄົມ; ບົດທີ2 ວິທີການເກັບກໍາ ແລະ ການນໍາໃຊ້ຫາງສຽງສັງຄົມເຂົ້າໃນວຽກງານການເມືອງ-ແນວຄິດ; ບົດທີ3 ຕາໜ່າງເພື່ອນຮ່ວມງານ ແລະ ບົດທີ 4 ວຽກງານຄົ້ນຄວ້າສັງລວມ. ການຝຶກອົບຮົມໃນຄັ້ງນີ້ ແມ່ນເພື່ອເຮັດໃຫ້ພະນັກງານຜູ້ທີ່ເຮັດວຽກງານຄົ້ນຄວ້າສັງລວມ-ເກັບກໍາຫາງສຽງສັງຄົມ ກໍຄືພະນັກງານການນຳຫຼັກແຫຼ່ງທົ່ວເມືອງ ມີຄວາມຮັບຮູ້ເຂົ້າໃຈ ແລະ ກໍາໄດ້ຄວາມໝາຍຄວາມສໍາຄັນ, ພາລະບົດບາດ, ໜ້າທີ່ຂອງພະນັກງານ ທີ່ເຮັດວຽກງານຄົ້ນຄວ້າສັງລວມ-ຫາງສຽງສັງຄົມ.
ພາຍຫຼັງສຳເລັດພິທີຝຶກອົບຮົມແລ້ວ ໃນພິທີກ່າວປິດໃຫ້ກຽດໂອ້ລົມ ແລະ ມອບໃບຢັ້ງຢືນການຝຶກອົບຮົມໂດຍ ທ່ານ ເຄື່ອນເພັດ ວົງຈັນ ກໍາມະການພັກແຂວງ, ເລຂາພັກເມືອງ ເຈົ້າເມືອງຕົ້ນເຜິ້ງ.
