ອົບຮົມຄວາມຮູ້ພື້ນຖານດ້ານການເມືອງ–ການປົກຄອງ
ແລະການສ້າງບ້ານພັດທະນາ (ກຸ່ມບ້ານຫ້ວຍໄລ່ ເມືອງງາແຂວງອຸດົມໄຊ).
ໃນລະຫວ່າງວັນທີ 8-9 ກໍລະກົດ 2020 ກົມອົບຮົມ ຄະນະໂຄສະນາອົບຮົມສູນກາງພັກ ໄດ້ລົງສົມທົບກັບຄະນະໂຄສະນາອົບຮົມແຂວງອຸດົມໄຊ ແລະ ຄະນະໂຄສະນາອົບຮົມເມືອງງາ ຈັດຕັ້ງການອົບຮົມຄວາມຮູ້ພື້ນຖານດ້ານການເມືອງ-ການປົກຄອງ ແລະ ການສ້າງບ້ານພັດທະນາຂຶ້ນຢູ່ທີ່ຈຸດສຸ່ມກຸ່ມບ້ານຫ້ວຍໄລ່ຊຶ່ງແມ່ນໜຶ່ງໃນ 9 ຈຸດສຸມຂອງເມືອງງາ ແລະ ເປັນເມືອງທຸກຍາກກວ່າໝູ່ຂອງແຂວງອຸດົມໄຊ. ຊຸດອົບຮົມດັ່ງກ່າວໄດ້ດຳເນີນເປັນເວລາ 2 ວັນ ຢູ່ທີ່ໂຮງຮຽນປະຖົມສົມບູນບ້ານຫ້ວຍໄລ່ ໂດຍການເປັນປະທານ ແລະ ກ່າວເປີດຊຸດອົບຮົມຂອງ ທ່ານ ວຽງໄຊ ຄຳພະຈັນ ຄະ ນະປະຈຳພັກເມືອງ, ຮອງເລຂາພັກເມືອງ, ຮອງເຈົ້າເມືອງ ເມືອງງາ ແຂວງອຸດົມໄຊ ໂດຍໃຫ້ກຽດເຂົ້າຮ່ວມຂອງທ່ານ ຄຳເຄນ ຈັນທະວົງຫົວໜ້າກົມອົບຮົມ ຄະນະໂຄສະນາອົບຮົມສູນກາງພັກ ແລະ ທ່ານ ສາຍດຳ ໃຈຫຼ້າ ຮອງຫົວໜ້າຄະນະໂຄສະນາອົບຮົມແຂວງອຸດົມໄຊ.
ຊຸດອົບຮົມຄັ້ງນີ້ມີບັນດາເລຂາພັກກຸ່ມບ້ານ, ເລຂາໜ່ວຍບ້ານ, ກຳມະບານບ້ານ, ປກຊ-ປກສ, ກອງຫຼອນບ້ານ, ຫົວໜ້າສະຫະພັນແມ່ຍິງບ້ານ, ອົງການຈັດຕັ້ງຊາວໜຸ່ມບ້ານ, ແພດປະຈຳສຸກສະລາກຸ່ມບ້ານຫ້ວຍໄລ່, ຄູ-ອາຈານ ແລະ ອຳນວຍການໂຮງຮຽນມັດຖະຍົມສົມບູນຕອນຕົ້ນເຂົ້າຮ່ວມທັງໝົດຈຳນວນ 36 ທ່ານ, ຍິງ 6 ທ່ານໃນນັ້ນ,, ຊຶ່ງເນື້ອໃນເອກະສານອົບຮົມປະກອບມີ 5 ຫົວຂໍ້ຄື: 1. ຊາດລາວ, ຄົນລາວແລະມູນເຊື້ອອັນສະຫງ່າລາສີຂອງປະຊາຊົນລາວ, 2. ລະບົບການເມືອງ ແລະ ການປົກຄອງໃນລະບອບປະຊາທິປະໄຕປະຊາຊົນ, 3. ຍົກສູງຄວາມສາມາດນຳພາຂອງໜ່ວຍພັກບ້ານ ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, 4. ການສ້າງບ້ານເປັນຫົວໜ່ວຍພັດທະນາ ແລະ 5. ການແກ້ໄຂຄວາມທຸກຍາກ ແລະ ການຜະລິດເປັນສິນຄ້າ.
ຊຸດອົບຮົມຄັ້ງນີ້ເປັນການຍົກລະດັບຄວາມຮັບຮູ້, ເຂົ້າໃຈຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດໃຫ້ແກ່ສະມາຊິກພັກ-ພະນັກງານ, ເລຂາພັກກຸ່ມບ້ານ, ເລຂາໜ່ວຍບ້ານ, ຄູ-ອາຈານ, ປກຊ-ປກສ, ກອງຫຼອນບ້ານ ແລະ ອົງການຈັດຕັ້ງມະຫາຊົນຂອງບ້ານ ໃຫ້ກາຍເປັນຜູ້ນຳທີ່ເຂັ້ມແຂງ ແລະ ເປັນນັກພັດທະນາກອນທີ່ຫ້າວຫັນ, ດີເດັ່ນສາມາດນຳເອົາບົດຮຽນດັ່ງກ່າວໄປສຶກສາອົບຮົມປະຊາຊົນຢູ່ພາຍໃນບ້ານຂອງຕົນ ພ້ອມທັງເປັນເຈົ້າການໃນການແກ້ໄຂຄວາມທຸກຍາກ ແລະພັດທະນາບ້ານຂອງຕົນໃຫ້ກາຍເປັນບ້ານພັດທະນາ.
ພາຍຫຼັງສຳເລັດຊຸດອົບຮົມໄດ້ມີການສະຫຼຸບຖອດຖອນບົດຮຽນ ແລະ ມອບໃບຢັ້ງຢືນໃຫ້ແກ່ນັກອົບຮົມ ຊຶ່ງໃຫ້ກຽດມອບໃບຢັ້ງຢືນແລະໂອ້ລົມໂດຍ ທ່ານ ວຽງໄຊ ຄຳພະຈັນຄະນະປະຈຳພັກເມືອງ, ຮອງເລຂາພັກເມືອງ, ຮອງເຈົ້າເມືອງ ເມືອງງາ ແຂວງອຸດົມໄຊ.
ຂ່າວ: ກິຕ໋ອມ
