ພິທີປາຖະກະຖາວັນສ້າງຕັ້ງພັກຄອມມູນິດກູບາ ຄົບຮອບ 55 ປີ
ໃນຕອນບ່າຍວັນທີ 2 ຕຸລາ 2020 ຄະນະໂຄສະນາອົບຮົມສູນກາງພັກ ຮ່ວມກັບ ຄະນະພົວພັນຕ່າງປະເທດສູນກາງພັກ, ສະມາຄົມມິດຕະພາບລາວ-ກູບາ ແລະ ສະຖານເອກອັກຄະລັດຖະທູດແຫ່ງ ສ.ກູບາ ປະຈຳສປປ ລາວ ໄດ້ຈັດພິທີປາຖະກະຖາວັນສ້າງຕັ້ງພັກຄອມມູນິດກູບາຄົບຮອບ 55 ປີ(03 ຕຸລາ 1965 – 03 ຕຸລາ 2020) ທີ່ຫ້ອງປະຊຸມໃຫຍ່ຄະນະໂຄສະນາອົບຮົມສູນກາງພັກ ເປັນກຽດເຂົ້າຮ່ວມຂອງ ສະຫາຍ ປອ ຄຳພັນ ພົມມະທັດ, ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ສະຫາຍ ນາງ ປອ ສູນທອນ ໄຊຍະຈັກ, ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ, ສະຫາຍ ຈະເລີນ ເຢຍປາວເຮີ, ກຳມະການສູນກາງພັກ, ລັດຖະມົນຕີປະຈຳສຳນັກງານນາຍົກລັດຖະມົນຕີ, ປະທານສະມະຄົມ ມິດຕະພາບລາວ-ກູບາ, ສະຫາຍ ປາ ບໂລ ອັງໂຕນີໂອ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສາທາລະນະລັດກູບາ ປະຈຳສປປ ລາວເຂົ້າຮ່ວມມີບັນດາສະຫາຍ ເລຂາ, ຮອງເລຂາຄະນະພັກ, ຄະນະນຳ ຈາກກະຊວງ-ອົງການ ອ້ອມຂ້າງສູນກາງ, ຫົວໜ້າກົມ, ສະຖາບັນສື່ຕ່າງໆ, ຮອງກົມ, ຫົວໜ້າພະແນກ, ຮອງຫົວໜ້າພະແນກ ແລະ ພະນັກງານວິຊາການຈຳນວນໜື່ງ ແລະ ນັກສຶກສາຝຶກງານຈາກສະຖາບັນເຂົ້າຮ່ວມຢ່າງພ້ອມພຽງ.
ໃນພິທີດັ່ງກ່າວ, ສະຫາຍ ປາ ບໂລ ອັງໂຕນີໂອ ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສາທາລະນະລັດກູບາ ປະຈຳ ສປປ ລາວ ໄດ້ເລົ່າຄືນເຖິງມູນເຊື້ອແຫ່ງການກຳເນີດ ແລະ ການເຕີບໃຫຍ່ຂະຫຍາຍຕົວຂອງການປະຕິວັດກູບາ ໂດຍຍົກໃຫ້ເຫັນບົດບາດການນຳພາອັນ ສະຫລາດສ່ອງໃສ ຂອງພັກຄອມມູນິດກູບາ. ໃນວັນທີ 3 ຕຸລາ 1965 ໄດ້ສ້າງຕັ້ງເປັນຄະນະບໍລິຫານງານສູນກາງພັກກອມມູນິດກູບາ (PCC) ຄັ້ງທຳອິດຂຶ້ນ, ຊຶ່ງໃນພິທີທາງການ ສະຫາຍ ຟີແດນ ກາສໂຕຼ ຊຶ່ງເປັນຜູ້ໜຶ່ງໃນການນໍາພາເພື່ອກໍ່ຕັ້ງພັກ, ຜູ້ເປັນແບບຢ່າງໃນການດໍາລົງຊີວິດ ແລະ ຜູ້ນໍາໜ້າຂອງອົງການຈັດຕັ້ງການປະຕິວັດ ໃນການພັດທະນາວິທະຍາສາດການເມືອງ-ອຸດົມການຂອງປະຊາຊົນກູບາ, ມີສະຫາຍ ຣາອູນ ກາດສໂຕຼ ຣູດສ ແລະ ສະຫາຍ ມີເກນ ດຽດສ ເປັນຜູ້ນຳຮຸ່ນຕໍ່ມາ ໄດ້ນຳພາປະຊາຊົນກູບາ ຍາດໄດ້ໄຊຊະນະ. ຜົນສຳເລັດຮອບດ້ານໃນພາລະກິດປົກປັກຮັກສາ ແລະ ສ້າງສາພັດທະນາ ປະເທດຊາດກູບາສາມາດປົກປ້ອງໝາກຜົນ ຂອງການປະຕິວັດໄວ້ໄດ້ຢ່າງໝັ້ນຄົງ, ປະກອບສ່ວນຢ່າງຕັ້ງໜ້າ ເຂົ້າໃນພາລະກິດແຫ່ງການ ປົກປັກຮັກສາສັນຕິພາບ ແລະ ສະຖຽນລະພາບໃນພາກພື້ນ ແລະ ໃນໂລກ; ເຮັດໃຫ້ບົດບາດ ແລະ ອິດທິພົນຂອງກູບາ ສູງເດັ່ນຂຶ້ນໃນເວທີພາກພື້ນ ແລະ ສາກົນ.
ການປາຖະກະຖາ ວັນສຳຄັນປະຫວັດສາດຄັ້ງນີ້ ເປັນການທົບທວນຄືນໃຫ້ເຫັນເຖິງມູນເຊື້ອ ອັນພິລາອາດຫານຂອງພັກ ແລະ ປະຊາຊົນກູບາອ້າຍນ້ອງ ໃນການຕໍ່ສູ້ເພື່ອເອກະລາດແຫ່ງຊາດ ທີ່ເຕັມໄປດ້ວຍການເສຍສະຫລະ ແລະ ເດັດດ່ຽວບໍ່ຍອມຈຳນົນ, ສາມາດຍາດໄດ້ໄຊຊະນະທີ່ໃຫຍ່ຫລວງ ກ້າວໄປສູ່ການຍາດເອົາ ເອກະລາດແຫ່ງຊາດ, ອະທິປະໄຕ, ເສລີພາບ ແລະ ຜືນແຜ່ນດິນອັນຄົບຖ້ວນ ປະຊາຊົນໄດ້ກາຍເປັນເຈົ້າ ຂອງປະເທດຊາດຢ່າງແທ້ຈິງ ແລະ ສະຖາປະນາເປັນສາທາລະນະລັດກູບາທີ່ເຂັ້ມແຂງ, ຕໍ່ສູ້ຕ້ານສົງຄາມຮຸກຮານ, ການປິດລ້ອມ ແລະ ການຂົ່ມຂູ່ທຸກຮູບແບບຂອງຈັກກະພັດຜູ້ຮຸກຮານຈົນເຖິງທຸກວັນນີ້. ພ້ອມນັ້ນ, ສະຫາຍ ປາ ບໂລ ອັງໂຕນີໂອ ຍັງໄດ້ຕີລາຄາສູງ ແລະ ຍົກໃຫ້ເຫັນເຖິງມູນເຊື້ອແຫ່ງສາຍພົວພັນມິດຕະພາບ ແລະ ການຮ່ວມມືລະຫວ່າງ 2 ພັກ, 2 ລັດ ແລະ ປະຊາຊົນ 2 ຊາດກູບາ-ລາວ ໃນໄລຍະຕໍ່ສູ້ກູ້ຊາດ ກໍຄືໄລຍະປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ. ພ້ອມທັງຢືນຢັນ ຈະສືບຕໍ່ເສີມຂະຫຍາຍ ສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອດັ່ງກ່າວ ໃຫ້ນັບມື້ນັບແໜ້ນແຟ້ນ ແລະ ແຕກດອກອອກຜົນຍິ່ງໆຂຶ້ນ.
ໃນທ້າຍພິທີ ສະຫາຍ ນາງ ປອ ສູນທອນ ໄຊຍະຈັກ, ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ໄດ້ຂື້ນມີຄຳເຫັນສະຫາຍໄດ້ຕີລາຄາສູງຕໍ່ການຈັດຕັ້ງນຳພາຂອງພັກກອມມູນິດກູບາ, ການພົວພັນຄູ່ຮ່ວມມືຮອບດ້ານລະຫວ່າງສປປ ລາວ – ສ.ກູບາ ໄດ້ມີບັນດາບາດກ້າວພັດທະນາທີ່ຂະຫຍັນຂັບເຄື່ອນ ແລະ ເຂັ້ມແຂງ ຂອງການຮ່ວມມື, ບົນພື້ນຖານຄວາມເຂົ້າໃຈເຊິ່ງກັນ ແລະ ກັນ. ເນື່ອງໃນໂອກາດນີ້, ສະຫາຍ ກໍສະແດງຄວາມຂອບອົກຂອບໃຈມາຍັງການນໍາຂັ້ນຕ່າງໆຂອງ ສ.ກູບາ ທີ່ຍາມໃດກໍໃຫ້ການສະໜັບສະໜູນສປປ ລາວ ໃນການສ້າງສາ ແລະ ພັດທະນາປະເທດຊາດ, ຊຸກຍູ້ສາຍພົວພັນລະຫວ່າງສປປ ລາວ ແລະ ສ.ກູບາ ເວົ້າລວມ, ເວົ້າສະເພາະກໍຄືປະຊາຊົນ 2 ຊາດ ລາວ-ກູບາ ໄດ້ນັບມືນັບແໜ້ນແຟ້ນຂື້ນຢ່າງຮອບດ້ານພ້ອມທັງປະກອບສ່ວນເຂ້ົາໃນການສ້າງສາ ແລະ ປົກປັກຮັກສາປະເທດຊາດ.
