ອົບຮົມຄວາມຮູ້ພື້ນຖານດ້ານການເມືອງ-ການປົກຄອງ, ການສ້າງບ້ານພັດທະ ນາໃຫ້ແກ່ປະຊາຊົນຢູ່ ກຸ່ມບ້ານສີບຸນເຮືອງ ເມືອງຜາອຸດົມ ແຂວງ ບໍ່ແກ້ວ.
ປະຕິບັດຕາມຂໍ້ຕົກລົງຂອງຄະນະໂຄສະນາອົບຮົມສູນກາງພັກ ສະບັບເລກທີ201/ຄອສພ,ລົງວັນທີ23/ 12/2020ວ່າດ້ວຍການແຕ່ງຕັ້ງພະນັກງານລົງສົມທົບກັບຄະນະໂຄສະນາອົບຮົມແຂວງ,ເມືອງ ເພື່ອຈັດຕັ້ງອົບຮົມຄວາມຮູ້ພື້ນຖານດ້ານການເມືອງ-ການປົກຄອງ,ການສ້າງບ້ານພັດທະນາ ຢູ່ ກຸ່ມບ້ານສີບຸນເຮືອງ ເມືອງຜາອຸດົມ ແຂວງ ບໍແກ້ວ ຊື່ງປະກອບມີ ສະຫາຍ ຄໍາເຄນ ຈັນທະວົງ ຫົວໜ້າກົມອົບຮົມພ້ອມດ້ວຍຄະນະ, ຄະນະໂຄສະນາອົບຮົມແຂວງ, ຄະນະໂຄສະນາອົບຮົມເມືອງ ແລະ ການນຳເມືອງຜາອຸດົມ.
ການອົບຮົມຄັ້ງນີ້ໄດ້ຈັດຂຶ້ນທີ່ຫ້ອງການກຸ່ມສີບຸນເຮືອງ ເມືອງຜາອຸດົມ ແຂວງ ບໍ່ແກ້ວ ຊຶ່ງພາຍໃຕ້ການເປັນປະທານຂອງ ທ່ານ ພົງສະຫວັນ ປັນຍາສັກ ຮອງເລຂາພັກເມືອງ, ຊີ້ນໍາວຽກງານພັກ – ພະນັກງານ ມີຜູ້ເຂົ້າຮ່ວມອົບຮົມມາຈາກ 5 ບ້ານ ໃນກຸ່ມບ້ານສີບຸນເຮືອງ ທັງໝົດ 32 ຄົນ, ຍິງ 4 ຄົນ, ໃນນັ້ນມີເລຂາໝ່ວຍພັກ, ຄະນນະໜ່ວຍພັກ, ຫົວໜ້າອົງການຈັດຕັ້ງມະຫາຊົນບ້ານ, ຫົວໜ້າກອງຫຼອນບ້ານ, ຫົວໜ້າ ປກສ ບ້ານ, ສະມາຊິກພັກ ແລະ ພະນັກງານກໍ່ສ້າງຮາກຖານປະຈໍາບ້ານ.
ເນື້ອໃນອົບຮົມແມ່ນນຳໃຊ້ເອກະສານ 5 ບົດ ເອກະສານຄວາມຮູ້ພື້ນຖານດ້ານການເມືອງ-ການປົກຄອງ, ການສ້າງບ້ານພັດທະນາ:
+ ບົດທີ 1: ຊາດລາວ,ຄົນລາວ ແລະ ມູນເຊື້ອອັນສະຫງ່າລາສີຂອງປະຊາຊົນລາວ, ບົດທີ 3 ຍົກສູງຄວາມສາມາດນໍາພາຂອງໜ່ວຍພັກບ້ານ, ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ( ບັນຍາຍໂດຍ ທ່ານ ຄໍາເຄນ ຈັນທະວົງ ຫົວໜ້າກົມອົບຮົມ) .
+ ບົດທີ 2: ລະບົບການເມືອງ ແລະ ການປົກຄອງ ໃນລະບອບປະຊາທິປະໄຕປະຊາຊົນ (ບັນຍາຍໂດຍ ທ່ານ ອຸດົມການ ແກ້ວພວງເພັດ ຮອງຫົວໜ້າຄະນະໂຄສະນາອົບຮົມແຂວງ).
+ ບົດທີ 4: ການສ້າງບ້ານເປັນຫົວໜ່ວຍພັດທະນາ( ບັນຍາຍໂດຍ ທ່ານ ພູມີ ຄໍາໂພທອນ ຮອງຫົວໜ້າຄະນະໂຄສະນາອົບຮົມເມືອງ).
+ ບົດທີ 5: ການແກ້ໄຂຄວາມທຸກຍາກ ແລະ ຜະລິດເປັນສິນຄ້າ( ບັນຍາຍໂດຍ ທ່ານ ສົມສັກ ປັນຍາສິດ ຫົວໜ້າຂະແໜ່ງອົບຮົມ).
ຊຸດອົບຮົມຄັ້ງນີ້ແມ່ນໄດ້ຮັບການຮ່ວມມືຈາກ ຄະນະໂຄສະນາອົບຮົມແຂວງ ແລະ ຄະນະໂຄສະນາອົບຮົມເມືອງເປັນຢ່າງດີ, ມີການແຕ່ງຕັ້ງຄະນະຮັບຜີດຊອບ ແລະ ມີການແບ່ງງານແບ່ງຄວາມຮັບຜິດຊອບໃຫ້ແຕ່ລະສະຫາຍຢ່າງລະອຽດເຮັດໃຫ້ຊຸດອົບຮົມດຳເນີນຕາມແຜນ ແລະ ບັນລຸຕາມເປົ້າໝາຍທີ່ວາງໄວ້, ຜູ້ບັນຍາຍເອກະສານສ່ວນຫຼາຍແມ່ນມີປະສົບການສາມາດຊີ້ແຈງອະທິບາຍໃຫ້ຜູ້ເຂົ້າຮ່ວມມີຄວາມເຂົ້າໃຈເປັນຢ່າງດີ, ນັກອົບຮົມແຕ່ລະສະຫາຍມີຄວາມຫ້າວຫັນຕື່ນຕົວເຂົ້າຮ່ວມຊື່ງສະແດງອອກໃນການປະຕິບັດໂມງເວລາເຂັ້ມງວດ ແລະ ສົນທະນາແລກປ່ຽນຄຳເຫັນກັບຜູ້ບັນຍາຍຢ່າງຟົດຟື້ນ.