ກອງປະຊຸມໃຫຍ່ຄັ້ງທີ II ຂອງໜ່ວຍພັກກົມສັງລວມ
ໃນວັນທີ 05 ມີນາ 2021 ໜ່ວຍພັກກົມສັງລວມຄະນະໂຄສະນາອົບຮົມສູນກາງພັກ ໄດ້ເປີດກອງປະຊຸມໃຫຍ່ ຄັ້ງທີ II ຂອງຕົນຂຶ້ນຢູ່ທີ່ຫ້ອງປະຊຸມ ຊັ້ນ 5 ຂອງຄະນະໂຄສະນາອົບຮົມສູນກາງພັກ ໂດຍການເປັນປະທານຮ່ວມຂອງ ສະຫາຍ ອານົງສັກ ອິນທະວົງ ຄະນະພັກ ຄະນະໂຄສະນາອົບຮົມສູນກາງພັກ, ສະຫາຍເລຂາ ແລະ ຮອງເລຂາໜ່ວຍພັກກົມສັງລວມ, ມີແຂກຖືກເຊີນຕາງໜ້າໜ່ວຍພັກບັນດາກົມອ້ອມຂ້າງ ຄອສພ ແລະ ບັນດາສະມາຊິກພັກສຳຮອງ-ສົມບູນພາຍໃນກົມສັງລວມເຂົ້າຮ່ວມຢ່າງພ້ອມພຽງ.
ໃນກອງປະຊຸມໄດ້ຮັບຟັງບົດລາຍງານການເມືອງ ຕໍ່ກອງປະຊຸມໃຫຍ່ ຄັ້ງທີ II ຂອງໜ່ວຍພັກກົມສັງລວມຄະນະໂຄສະນາອົບຮົມສູນກາງພັກ, ເຊິ່ງໃຫ້ກຽດສະເໜີໂດຍສະຫາຍ ນ. ແສງຕານ ແກ້ວອິນດາປິງ ເລຂາໜ່ວຍກົມສັງລວມເຊິ່ງໄດ້ສະຫຼູບຕີລາຄາຈຸດດີ, ຈຸດອ່ອນ ແລະ ຂໍ້ຄົງຄ້າງ ໃນການເຄື່ອນໄຫວປະຕິບັດໜ້າທີ່ເປັນເສນາທິການໃຫ້ແກ່ຄະນະພັກຄະນະໂຄສະນາອົບຮົມສູນກາງພັກ ເວົ້າລວມ, ເວົ້າສະເພາະກໍແມ່ນການເຄື່ອນໄຫວປະຕິບັດໜ້າທີຢູ່ພາຍໃນໜ່ວຍພັກກົມສັງລວມຕະຫຼອດໃນໄລຍະ 5 ປີຜ່ານມາ(2015-2019) ແລະ ວາງທິດທາງວຽກງານຈຸດສຸມໃນ 5 ປີຕໍ່ໜ້າ; ຈາກນັ້ນ, ຕາງໜ້າຄະນະໜ່ວຍກົມສັງລວມ ຊຸດເກົ່າ ໄດ້ຂື້ນຜ່ານບົດສຳຫຼວດໃນການຊີ້ນຳ-ນຳພາ ໃນໄລຍະຜ່ານມາ ພ້ອມທັງລາໜ້າທີ່ ແລະ ປ່ອນບັດຄັດເລືອກເອົາຄະນະໜ່ວຍກົມສັງລວມ ຊຸດໃໝ່ ເຊິ່ງມີຜູ້ລົງສະມັກເລືອກຕັ້ງຈຳນວນ 4 ສະຫາຍ, ຍິງ 2 ສະຫາຍ ໃນນັ້ນເລືອກເອົາ 3 ສະຫາຍຜ່ານການປ່ອນບັດເລືອກຕັ້ງ ແລະ ກອງປະຊຸມຄັ້ງປະຖົມມະລຶກສາມາດເລືອກໄດ້ 3 ສະຫາຍຄື:
- ສະຫາຍ ນ. ແສງຕານ ແກ້ວອິນດາປິງ ເປັນເລຂາໜ່ວຍພັກກົມສັງລວມ
- ສະຫາຍ ນ. ບຸນມາລີ ສີລິດາວົງ ເປັນຮອງເລາຂາໜ່ວຍພັກກົມສັງລວມ
- ສະຫາຍ ບຸນມີ ຫຼວງປັນຍາ ເປັນຄະນະ, ເປັນຜູ້ກວດກາໜ່ວຍພັກກົມສັງລວມ
ກອງປະຊຸມໄດ້ຮັບຟັງການການໂອ້ລົມຂອງສະຫາຍ ອານົງສັກ ອິນທະວົງ ຄະນະພັກ, ເຊິ່ງກ່ອນອື່ນໝົດທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການເຄື່ອນໄຫວໃນໄລຍະ 5 ປີຜ່ານມາ ທີ່ໜ່ວຍກົມສັງລວມ ຍາດໄດ້ຜົນງານອັນໃຫຍ່ຫຼວງ ແລະ ຜ່ານຜ່າຄວາມຫຍຸ້ງຍາກຕ່າງໆ ເວົ້າລວມ, ເວົ້າສະເພາະກໍຄືວຽກງານວິຊາສະເພາະຂອງຕົນ ແລະ ຜົນງານໃນການປະກອບສ່ວນເຂົ້າໃນກິດຈະກໍາຕ່າງໆຂອງໜ່ວຍກົມສັງລວມ ຄະນະໂຄສະນາອົບຮົມສູນກາງພັກ ເຊິ່ງມັນສະແດງອອກໃນຄວາມເປັນເຈົ້າການຕໍ່ໜ້າທີ່ວຽກງານ, ສະຕິຕໍ່ການຈັດຕັ້ງ, ຄວາມຈົ່ງຮັກພັກດີຕໍ່ພັກຕໍ່ປະເທດຊາດ, ການປະກອບສ່ວນເຂົ້າໃນການເຄື່ອນໄຫວປະຕິບັດໜ້າທີ່ການເມືອງຂອງຕົນຢ່າງຕັ້ງໜ້າ. ນອກນັ້ນ, ທ່ານຍັງໄດ້ຮຽກຮ້ອງມາຍັງຄະນະໜ່ວຍ, ສະມາຊິກພັກທຸກສະຫາຍຈົ່ງເພີ່ມທະວີຄວາມສາມັກຄີເປັນເອກະພາບ, ພ້ອມກັນບຸກບືນພັດທະນາຕົນເອງຢ່າງ ຮອບດ້ານ ແລະ ເອົາໃຈໃສ່ຄົ້ນຄວ້າຮ່ຳຮຽນທິດສະດີ, ແນວທາງ ແລະ ວຽກງານວິຊາສະເພາະເຊີດຊູນ້ຳໃຈຮັກຊາດ, ເປັນເຈົ້າຕົນເອງ, ສ້າງຄວາມເຂັ້ມແຂງດ້ວຍຕົນເອງ, ເພີ່ມທະວີຄວາມຮັບຜິດຊອບເຂົ້າໃນການຈັດຕັ້ງປະຕິບັດທິດທາງໜ້າທີ່ຈຸດສຸມ ທີ່ມະຕິກອງປະຊຸມໃຫຍ່ຄັ້ງທີ XI ຂອງພັກປະຊາຊົນປະຕິວັດລາວ ແລະ ມະຕິກອງປະຊຸມໃຫຍ່ຄັ້ງ II ຂອງໜ່ວຍກົມສັງລວມໄດ້ຮັບຮອງເອົາ.
