ຄະນະໂຄສະນາອົບຮົມສູນກາງພັກຈັດພິທີປາຖະກະຖາວັນສ້າງຕັ້ງພັກກອມມູນິດຈີນ ຄົບຮອບ 100 ປີ (01/07/1921 – 01/07/2021).
ໂດຍ: ສີໄຄ ໄຊຍະວົງ
ໃນຕອນເຊົ້າຂອງວັນທີ 29/7/2021 ທີ່ຜ່ານມາຢູ່ທີ່ສະໂມສອນໃຫຍ່ຂອງຄະນະໂຄສະນາອົບຮົມສູນກາງພັກໄດ້ຈັດພິທີປາຖະກະຖາວັນສຳຄັນຂອງຊາດຂອງພັກຕິດພັນກັບວັນສ້າງຕັ້ງພັກກອມມູນິດຈີນ ຄົບຮອບ 100 ປີ (01/07/1921 – 01/07/2021). ໂດຍໃຫ້ກຽດເປັນປະທານ ແລະ ປາຖະກະຖາຂອງ ທ່ານ ລາວປາວຊົ່ງ ນະວົງໄຊ ກຳມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ; ມີບັນດາຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ, ຫົວ ໜ້າກົມ, ຮອງກົມ, ຫົວໜ້າພະແນກ, ຮອງພະແນກ ແລະ ສະມາຊິກພັກ, ພະນັກງານ – ລັດຖະກອນທົ່ວ ຄອສພ ເຂົ້າຮ່ວມຮັບຟັງ. ພິທີປາຖະກະຖາຄັ້ງນີ້ໄດ້ບັນຍາຍເຖີງ 3 ເອກະສານສຳຄັນຄື: ຫວນຄືນມູນເຊື້ອການກໍ່ຕັ້ງ, ການນຳພາຂອງພັກກອມມູນິດຈີນ ໃນໄລຍະ 100 ປີຜ່ານມາ, ວັນຄ້າຍວັນເກີດ ຄົບຮອບ 112 ປີຂອງ ປະທານ ສຸພານຸວົງ ແລະ ເອກະສານສຸດທ້າຍແມ່ນການເຜີຍແຜ່ກ່ຽວກັບມະຕິຂອງກອງປະຊຸມຄົບຄະນະບໍລິຫານງານສູນກາງພັກຄັ້ງທີ II ສະໄໝທີ XI ຂອງພັກ. ເຊິ່ງທ່ານໄດ້ເນັ້ນໜັກໃຫ້ ພະນັກງານ – ສະມາຊິກພັກ ແລະ ລັດຖະກອນ ໂດຍສະເພາະແມ່ນ ພະນັກງານຜູ້ທີ່ເຮັດວຽກງານໂຄສະນາອົບຮົມ ຕ້ອງໄດ້ກຳແໜ້ນໃນ 8 ໜ້າທີ່ຈຸດສຸມ ແລະ 2 ວາລະແຫ່ງຊາດທີ່ໄດ້ກຳນົດໄວ້ ເຊິ່ງຖືວ່າເປັນວຽກງານອັນໜຶ່ງສຳລັບຜູ້ທີ່ເປັນສະມາຊິກພັກ ແລະ ພະນັກງານ – ລັດຖະກອນ ທີ່ເຮັດວຽກງານການເມືອງ-ແນວຄິດ ຕ້ອງໄດ້ສືບຕໍ່ນໍາໄປຈັດຕັ້ງ ໂຄສະນາສຶກສາອົບຮົມໃຫ້ແກ່ພະນັກງານ – ສະມາຊິກພັກ ແລະ ປະຊາຊົນບັນດາເຜົ່າຮັບຮູ້, ເຂົ້າໃຈ ພ້ອມນຳໄປຈັດຕັ້ງປະຕິບັດ ຢ່າງທົ່ວເຖິງ ໂດຍສະເພາະແມ່ນວາລະແຫ່ງຊາດທີ່ພັກເຮົາໄດ້ກຳນົດອອກມາ ເປັນຕົ້ນແມ່ນ ການແກ້ໄຂຄວາມຫຍຸ້ງຍາກທາງດ້ານເສດຖະກິດ – ການເງິນ ແລະ ແກ້ໄຂບັນຫາຢາເສບຕິດ.
ໃນວາລະສຸດທ້າຍຂອງພິທີປາຖະກະຖາ ທ່ານຍັງໄດ້ຮຽກຮ້ອງມາຍັງພະນັກງານ – ລັດຖະກອນ ພາຍໃນຄະນະໂຄສະນາອົບຮົມສູນກາງພັກ ຈົ່ງນໍາເອົາເນື້ອໃນຂອງການປາຖະກະຖາຄັ້ງນີ້ ນໍາໄປຈັດຕັ້ງຜັນຂະຫຍາຍເຂົ້າໃນວຽກງານຕົວຈິງໃຫ້ມີຜົນສໍາເລັດເປັນກ້າວໆ.
