ໃນຕອນເຊົ້າ ຂອງວັນທີ 26 ສິງຫາ 2022, ເວລາ 8:30 ໂມງ; ທີ່ຫ້ອງປະຊຸມສະພາທິດສະດີສູນກາງພັກໄດ້ຈັດກອງປະຊຸມເຜີຍແຜ່ມະຕິກອງປະຊຸມຄົບຄະນະ ຄັ້ງທີ 4 ຂອງຄະນະບໍລິຫານງານສູນກາງພັກ ສະໄໝທີ XI” ພາຍໃຕ້ການເປັນປະທານ ຂອງສະຫາຍ ຄຳພັນ ເຜີຍຍະວົງ ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ ເຂົ້າຮ່ວມມີບັນດາສະຫາຍສະມາຊິກສະພາທິດສະດີສູນກາງພັກ ແລະ ພະນັກງານຫ້ອງການສະພາທິດສະດີສູນກາງພັກ ເຂົ້າຮ່ວມ 30 ສະຫາຍ.
ເພື່ອເຮັດໃຫ້ສະມາຊິກສະພາທິດສະດີສູນກາງພັກ ແລະ ພະນັກງານຫຼັກແຫຼ່ງສະພາທິດສະດີສູນກາງພັກໄດ້ເຂົ້າໃຈ ແລະກຳແໜ້ນເນື້ອໃນມະຕິກອງປະຊຸມຄົບຄະນະ ຂອງຄະນະບໍລິຫານງານສູນກາງພັກ ຄັ້ງທີ 4 ຂອງ ສະໄໝທີ XI” ເພື່ອຈັດຕັ້ງຜັນຂະຫຍາຍມະຕິດັ່ງກ່າວໃຫ້ປະກົດຜົນເປັນຈິງ ໂດຍສະເພາະ ທິດຊີ້ນຳ ຂອງສູນກາງພັກ ກ່ຽວກັບການຄົ້ນຄວ້າທິດສະດີ ແລະພຶດຕິກຳໃຫ້ແກ່ການສ້າງປະຖົມປັດໄຈ ເພື່ອກ້າວຂຶ້ນສູ່ຈຸດໝາຍສັງຄົມນິຍົມ ເຊິ່ງສູນກາງພັກໄດ້ມອບໝາຍໃຫ້ສະພາທິດສະດີສູນກາງພັກສົມທົບກັບພາກສ່ວນກ່ຽວຂ້ອງໃນການສືບຕໍ່ລົງເລິກຄົ້ນຄວ້າ-ວິໄຈ, ປັບປຸງດ້ານເນື້ອໃນໃຫ້ຄົບຖ້ວນ ເພື່ອເປັນບ່ອນອີງໃຫ້ແກ່ການສ້າງໂຄງການການເມືອງ ຂອງພັກ.
ໃນໂອກາດນີ້, ສະຫາຍ ຄຳພັນ ເຜີຍຍະວົງ ໄດ້ເນັ້ນໜັກໃຫ້ບັນດາສະຫາຍສະມາຊິກສະພາທິດສະດີສູນກາງພັກ ແລະພະນັກງານຫຼັກແຫຼ່ງສະພາທິດສະດີສູນກາງພັກເອົາໃຈໃສ່ເຊີດຊູຄວາມຮັບຜິດຊອບ ແລະຄວາມເປັນເຈົ້າການ ເພື່ອຈັດຕັ້ງຜັນຂະຫຍາຍມະຕິດັ່ງກ່າວໃຫ້ປະກົດຜົນເປັນຈິງ ຕິດພັນກັບການຈັດຕັ້ງປະຕິບັດໜ້າທີ່ການເມືອງ ຂອງຕົນ ພ້ອມກັນນັ້ນ ກໍສຸມສະຕິປັນຍາ, ການປະດິດສ້າງປະກອບສ່ວນເຂົ້າໃນການຍົກສູງການຄົ້ນຄວ້າທາງດ້ານທິດສະດີ ແລະພຶດຕິກຳ ແລະບັນດາໜ້າທີ່ວຽກງານຕ່າງໆທີ່ຕົນໄດ້ຮັບການມອບໝາຍ ເພື່ອເຮັດໃຫ້ສຳເລັດຕາມເປົ້າໝາຍທີ່ວາງໄວ້.