ວາລະສານ ອະລຸນໃໝ່ ລົງເຄື່ອນໄຫວວຽກງານ ແລະ ແລກປ່ຽນບົດຮຽນ ຢູ່ນະຄອນຫຼວງວຽງຈັນ
ໂດຍປະຕິບັດຕາມແຜນການເຄື່ອນໄຫວວຽກງານ ປະຈຳປີ 2022 ຂອງວາລະສານອະລຸນໃໝ່. ໃນຕອນເຊົ້າຂອງວັນທີ 10 ພະຈິກ 2022 ວາລະສານອະລຸນໃໝ່ ຂອງພັກປະຊາຊົນປະຕິວັດລາວ ໄດ້ລົງເຄື່ອນໄຫວເກັບກຳຂໍ້ມູນ ແລະ ແລກປ່ຽນບົດຮຽນ ກັບ ຄະນະໂຄສະນາອົບຮົມນະຄອນຫຼວງວຽງຈັນ ເຊິ່ງນຳພາໂດຍ ທ່ານ ປອ ວັນລາຕີ ຄຳວານວົງສາ ກຳມະການຄະນະພັກ ຄະນະໂຄສະນາອົບຮົມສູນກາງພັກ, ວ່າການຫົວໜ້າບັນນາທິການວາລະສານ ອະລຸນໃໝ່ ພ້ອມຄະນະ ແລະ ໃຫ້ກຽດຕ້ອນຮັບໂດຍ ທ່ານ ປອ ຊົງເລົ່າ ຢົງນູ ກຳມະການປະຈຳພັກນະຄອນຫຼວງວຽງຈັນ, ຫົວໜ້າຄະນະໂຄສະນາອົບຮົມນະຄອນຫຼວງວຽງຈັນ ພ້ອມດ້ວຍຄະນະ.
ໃນການລົງເຄື່ອນໄຫວວຽກງານ, ເກັບກຳຂໍ້ມູນ ແລະ ແລກປ່ຽນບົດຮຽນໃນຄັ້ງນີ້ ທ່ານ ປອ ຊົງເລົ່າ ຢົງນູ ກຳມະການປະຈຳພັກນະຄອນຫຼວງວຽງຈັນ, ຫົວໜ້າຄະນະໂຄສະນາອົບຮົມນະຄອນຫຼວງວຽງຈັນ ໄດ້ລາຍງານສະພາບການທີ່ພົ້ນເດັ່ນຂອງນະຄອນຫຼວງວຽງຈັນ ໂດຍສັງເຂບ ເປັນຕົ້ນແມ່ນວຽກງານກໍ່ສ້າງພັກ-ພະນັກງານ ຕິດພັນກັບການຍົກສູງຄວາມສາມາດນຳພາຂອງຄະນະພັກຮາກຖານ, ວຽກງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງນະຄອນຫຼວງວຽງຈັນ ໃນໄລຍະປີ 2021-2022, ການພັດທະນາວຽກງານທ່ອງທ່ຽວ ຕິດພັນກັບການເສີມຂະຫຍາຍທ່າແຮງບົ່ມຊ້ອນຂອງນະຄອນຫຼວງວຽງຈັນ ແລະ ການຜະລິດເປັນສິນຄ້າ ເພື່ອແກ້ໄຂຄວາມທຸກຍາກຂອງປະຊາຊົນ.
ຄຽງຄູ່ກັນນັ້ນ ກໍໄດ້ມີການແລກປ່ຽນບົດຮຽນດ້ານວິຊາສະເພາະຢ່າງກົງໄປກົງມາ ແລະ ມີລັກສະນະສ້າງສັນ ໂດຍສະເພາະແມ່ນວຽກງານຂອງສອງວາລະສານ ຄື: ວາລະສານອະລຸນໃໝ່ ຂອງພັກປະຊາຊົນປະຕິວັດລາວ ແລະ ວາລະສານນະຄອນຫຼວງວຽງຈັນ ເພື່ອແນໃສ່ສ້າງຄວາມຮັບຮູ້-ເຂົ້າໃຈ ໃນການພັດທະນາວຽກງານວາລະສານໃຫ້ມີບາດກ້າວດີຂຶ້ນກວ່າເກົ່າ.
ນອກນັ້ນ ຍັງໄດ້ລົງເຄື່ອນໄຫວວຽກງານ, ແລກປ່ຽນບົດຮຽນ ແລະ ຢ້ຽມຢາມພື້ນຖານການຜະລິດແຫຼ່ງທ່ອງທ່ຽວ ແລະ ຄອບຄົວຕົວແບບ ຢູ່ບັນດາເມືອງພາຍໃນນະຄອນຫຼວງວຽງຈັນ ເຊິ່ງໄດ້ຮັບການຕ້ອນຮັບທີ່ອົບອຸ່ນຈາກການນຳຂອງເມືອງ ກໍຄືການນຳຂອງຄະນະໂຄສະນາອົບຮົມເມືອງ.
