ຮອງຫົວໜ້າຄະນະໂຄສະນາອົບຮົມສູນກາງພັກ ເຄື່ອນໄຫວວຽກງານຢູ່ແຂວງບໍລິຄຳໄຊ ແລະ ແຂວງຄຳມ່ວນ
ໃນລະຫວ່າງ ວັນທີ 04-09 ສິງຫາ 2024 ຜ່ານມາ ຄະນະກວດກາ, ກົມກວດກາ, ຄະນະໂຄສະນາອົບຮົມ ສູນກາງພັກ ນໍາໂດຍ ທ່ານ ນ. ວິລະວອນ ພັນທະວົງ ຄະນະປະຈຳພັກ, ຮອງຫົວໜ້າຄະນະໂຄສະນາອົບຮົມສູນກາງພັກ, ປະທານກວດກາ ໄດ້ນໍາພາພະນັກງານກົມກວດກາລົງເຄື່ອນໄຫວວຽກງານ ຢູ່ແຂວງ ຄໍາມ່ວນ ແລະ ແຂວງ ບໍລິຄຳໄຊ ໂດຍໄດ້ຮັບການຕ້ອນຮັບຢ່າງອົບອຸ່ນ ຈາກການນໍາ ຂອງແຂວງ, ຄະນະໂຄສະນາອົບຮົມແຂວງ ແລະ ເມືອງລົງເຄື່ອນໄຫວວຽກງານກໍເພື່ອລົງຕິດຕາມ, ຊຸກຍູ້ວຽກງານກວດກາຢູ່ຄະນະໂຄສະນາອົບຮົມຢູ່ທ້ອງຖິ່ນ ໂດຍສະເພາະ ຕິດຕາມ, ຊຸກຍູ້ ການຈັດຕັ້ງປະຕິບັດ, ສິດ, ໜ້າທີ່, ຄວາມຮັບຜິດຊອບ ຂອງຄະນະບໍລິຫານງານພັກແຂວງ, ການຈັດຕັ້ງປະຕິບັດບັນດາ ແຜນງານ ແລະ ຄວາມຮັບຜິດຊອບຂອງຕົນ ໂດຍສະເພາະຕິດຕາມ ຊຸກຍູ້ການຈັດຕັ້ງຜັນຂະຫຍາຍ ແລະ ການຈັດຕັ້ງ ປະຕິບັດແນວທາງນະໂຍບາຍຂອງພັກ-ລັດ, ມະຕິກອງປະຊຸມໃຫ່ຍ ຄັ້ງທີ XI ຂອງພັກ, ມະຕິກອງປະຊຸມໃຫ່ຍ ຄະນະ ບໍລິຫານງານພັກແຂວງ ແລະ ມະຕິກອງປະຊຸມໃຫ່ຍຄະນະບໍລິຫານພັກເມືອງ.
ໃນວັນ 06-07 ໄດ້ລົງເຄື່ອນໄຫວວຽກງານ ຢູ່ແຂວງ ຄໍາມ່ວນ ໄດ້ພົບປະເຮັດວຽກກັບ ທ່ານ ວົງເພັດ ຈິດ ປັນຍາ ຮອງເລຂາພັກແຂວງ, ຜູ້ຊີ້ນໍາຂົງເຂດການເມືອງ – ແນວຄິດ ຂອງແຂວງ, ຈາກນັ້ນ ກໍໄດ້ເຮັດວຽກນໍາຄະນະ ໂຄສະນາອົບຮົມແຂວງ ໂດຍໄດ້ຮັບຟັງການລາຍງານ ຂອງທ່ານ ບຸນເລິງ ເລີດບຸນຊູ ຮອງເລຂາໜ່ວຍພັກ, ຮອງຫົວໜ້າ ຄະນະໂຄສະນາອົບຮົມແຂວງ ກ່ຽວກັບການເຄື່ອນໄຫວວຽກງານໃນໄລຍະຜ່ານມາ, ພ້ອມນັ້ນ ກໍໄດ້ລົງເຄື່ອນໄຫວເຮັດ ວຽກຢູ່ເມືອງ ມະຫາໄຊ ແລະ ເມືອງ ຍົມມະລາດ.
ໃນວັນ 08-09 ໄດ້ລົງເຄື່ອນໄຫວວຽກງານ ຢູ່ແຂວງ ບໍລິຄຳໄຊ ໄດ້ເຂົ້າພົບປະຢ້ຽມຢາມເຮັດວຽກກັບ ທ່ານ ສອນທະນູ ທຳມະວົງ ເລຂາພັກແຂວງ, ເຈົ້າແຂວງບໍລິຄຳໄຊ, ຜູ້ຊີ້ນຳລວມຂອງແຂວງ, ຈາກນັ້ນ ກໍໄດ້ເຮັດວຽກນໍາ ຄະນະໂຄສະນາອົບຮົມແຂວງ ໂດຍໄດ້ຮັບຟັງການລາຍງານ ຂອງທ່ານ ອຸດອນ ສອນສຸລິນ ກຳມະການພັກແຂວງ, ຫົວ ໜ້າຄະນະໂຄສະນາອົບຮົມແຂວງ ກ່ຽວກັບການເຄື່ອນໄຫວວຽກງານໃນໄລຍະຜ່ານມາ, ພ້ອມນັ້ນ ກໍໄດ້ລົງເຄື່ອນໄຫວ ເຮັດວຽກຢູ່ເມືອງ ວອງທອງ.
ໃນໂອກາດລົງເຄື່ອນໄຫວຕິດຕາມ, ຊຸກຍູ້ວຽກງານກວດກາຄັ້ງນີ້ ທ່ານ ນ. ວິລະວອນ ພັນທະວົງ ຄະນະປະ ຈຳພັກ, ຮອງຫົວໜ້າຄະນະໂຄສະນາອົບຮົມສູນກາງພັກ, ປະທານກວດກາ ກໍໄດ້ໃຫ້ທິດຊີ້ນໍາຄະນະໂຄສະນາອົບຮົມ ແຂວງ ແລະ ເມືອງ ໂດຍສະເພາະແມ່ນການເພີ່ມທະວີການເຄື່ອນໄຫວວຽກງານກວດກາໃນໄລຍະໃໝ່ ແລະ ຍົກສູງ ພາລະບາດພາລະບົດບາດໃຫ້ສູງຂຶ້ນ ເພື່ອຮັບປະກັນໃນການເປັນເສນາທິການໃຫ້ຄະນະປະຈຳພັກແຂວງ ກໍຄືເມືອງ ກ່ຽວກັບວຽກງານການເມືອງ-ແນວຄິດ, ເຜີຍແຜ່ມະຕິ, ຄໍາສັ່ງ, ແນວທາງນະໂຍບາຍ ຂອງພັກ, ລະບຽບກົດໝາຍຂອງ ລັດ ໃຫ້ພະນັກງານ-ລັດຖະກອນ, ສະມາຊິກພັກ, ນັກຮົບ ແລະ ປະຊາຊົນບັນດາເຜົ່າ ໄດ້ຮັບຮູ້ເຂົ້າໃຈຕໍ່ກັບການຈັດຕັ້ງ ປະຕິບັດແນວທາງນະໂຍບາຍຂອງພັກ, ການຄຸ້ມຄອງລັດ-ຄຸ້ມຄອງສັງຄົມດ້ວຍລະບຽບກົດໝາຍ.
ພາບ-ຂ່າວ: ດວງມາລາ ຈັນທະວົງສາ
