ຫຼາຍພາກສ່ວນບໍລິຈາກເຄື່ອງຊ່ວຍເຫຼືອຕ້ານໄພນ້ຳຖ້ວມຢູ່ບັນດາແຂວງພາກເໜືອ
ໃນວັນທີ 18 ກັນຍາ 2024 ທີ່ຫ້ອງຮັບແຂກຄະນະໂຄສະນາອົບຮົບສູນກາງພັກ, ທ່ານ ວັນໄຊ ຕະວິນຍານ ຮອງຫົວໜ້າ ຄອສພ ບ.ກ ໜັງສືພິມປະຊາຊົນ ຕາງໜ້າໃຫ້ 4 ພາກສ່ວນເຊິ່ງມີ: 1. ສູນວັດທະນະທຳຈີນປະຈຳສປປ ລາວ, 2. ບໍລິສັດ ພັນທະມິດ ທົດລອງ ແລະ ວິໄຈ ຈຳກັດ, 3. ນັກສຶກສາກຳປູເຈຍທີ່ກຳລັງສຶກສາຢູ່ທີ່ວິທະຍາໄລແຫ່ງຊາດລາວ ແລະ 4. ຮ້ານ ອາຫານໄທອອນເມນສຣີມອບເງິນຈຳນວນ 4 ລ້ານກີບ ໄດ້ນຳເອົາວັດຖຸປັດໄຈ, ເຄື່ອງນຸ່ງຫົ່ມ, ນ້ຳດື່ມ, ເຂົ້າສານອາຫານແຫ້ງມາມອບໃຫ້ຄະນະຮັບຜິດຊອບຕ້ານໄພນ້ຳຖ້ວມ ຄອສພ ເພື່ອນຳໄປຊ່ວຍເຫຼືອໃຫ້ຜູ້ປະສົບໄພນ້ຳຖ້ວມຢູ່ 6 ແຂວງພາກເໜືອ. ຕາງໜ້າຄະນະພັກ, ຄະນະໂຄສະນາອົບຮົມສູນກາງພັກ ກ່າວຮັບໂດຍ ທ່ານ ລາວປາວຊົ່ງ ນະວົງໄຊ ກຳມະການສູນກາງພັກ, ຮອງຫົວໜ້າຄະນະໂຄສະນາອົບຮົມສູນກາງພັກ, ເຂົ້າຮ່ວມເປັນສັກຂີພະຍານ ມີ ບັນດາ ຄະນະພັກ, ຄະນະກົມພາຍໃນ ຄອສພ.
ໂອກາດດັ່ງກ່າວ ທ່ານ ລາວປາວຊົ່ງ ນະວົງໄຊ ຮອງຫົວໜ້າ ຄອສພ ໄດ້ສະແດງຄວາມຂອບໃຈເປັນຢ່າງສູງຕໍ່ພາກສ່ວນຕ່າງໆທີ່ ໄດ້ນຳເອົາວັດຖຸຈິດໃຈ ແລະ ເຄື່ອງໃຊ້ຕ່າງໆ ມາມອບໃຫ້ຄັ້ງນີ້ ເພື່ອຈະນໍາໄປຊ່ວຍ ເຫຼືອແກ່ປະຊາຊົນ 6 ແຂວງພາກເໜືອທີ່ຖືກເຄາະຮ້າຍຈາກໄພພິບັດໃນຄັ້ງນີ້.
