ແລກປ່ຽນບົດຮຽນວຽກງານອົບຮົມໃນໄລຍະໃໝ່ ລະຫວ່າງ ກົມອົບຮົມ ຄະນະໂຄສະນາອົບຮົມສູນກາງພັກ ປ ປ ລາວ ກັບກົມທິດສະດີການເມືອງ ຂອງຄະນະໂຄສະນາສຶກສາສູນກາງພັກກອມມູນິດຫວຽດນາມ
ໃນລະຫວ່າງວັນທີ 12-16 ພະຈິກ 2024 ກົມອົບຮົມ ຄະນະໂຄສະນາອົບຮົມສູນກາງພັກ ປປລາວ ໄດ້ໄປແລກປ່ຽນບົດຮຽນກັບກົມທິດສະດີການເມືອງ ຂອງຄະນະໂຄສະນາສຶກສາສູນກາງພັກກອມມູນິດຫວຽດນາມ ເຊິ່ງກອງປະຊຸມດັ່ງກ່າວໄດ້ຈັດຂຶ້ນໃນວັນທີ 13 ພະຈິກ 2024 ຢູ່ທີ່ຄະນະໂຄສະນາສຶກສາສູນກາງພັກກອມມູນິດຫວຽດ ນາມ (ນະຄອນຫຼວງຮ່າໂນ້ຍ); ຝ່າຍລາວ ນໍາພາໂດຍ ສະຫາຍ ຄໍາກອງ ທໍາມະເທວາ ຄະນະພັກ, ຫົວໜ້າກົມອົບຮົມ, ຄະນະໂຄສະນາອົບຮົມສູນກາງພັກ ປປລາວ ພ້ອມດ້ວຍວິຊາການ ຈຳນວນ 7 ສະຫາຍ; ຝ່າຍຫວຽດນາມ ນໍາໂດຍ ສະຫາຍ ນ. ມາຍອຽນງາ ຮອງຫົວໜ້າກົມທິດສະດີການເມືອງ, ຮອງຫົວໜ້າຫ້ອງການ, ຮອງຫົວໜ້າກົມຂໍ້ມູນຂ່າວສານຕ່າງປະເທດ ແລະ ຮ່ວມມືສາກົນ ພ້ອມດ້ວຍວິຊາການເຂົ້່າຮ່ວມ.
ນອກຈາກແລກປ່ຽນບົດຮຽນຢູ່ຄະນະໂຄສະນາສຶກສາສູນກາງພັກກອມມູນິດຫວຽດນາມແລ້ວ, ຄະນະຍັງໄດ້ໄປທັດສະນະສຶກສາແລກປ່ຽນບົດຮຽນນໍາ ຄະນະປົກຄອງນະຄອນໂຮ່ຈິມິນ, ຄະນະໂຄສະນາສາສຶກສານະຄອນໂຮ່ຈິມິນ ແລະ ພື້ນຖານເສດຖະກິດຈໍານວນໜຶ່ງ.
ເນື້ອໃນການແລກປ່ຽນບົດຮຽນ ແມ່ນກ່ຽວກັບການເຄື່ອນໄຫວ, ພາລະບົດບາດຂອງກົມທິດສະດີການເມືອງ (ຄະນະໂຄສະນາສຶກສາສູນກາງພັກກອມມູນນິດຫວຽດນາມ) ແລະ ພາລະບົດບາດຂອງກົມອົບຮົມ (ຄະນະໂຄສະນາອົບຮົມສູນກາງພັກ ປະຊາຊົນປະຕິວັດລາວ), ບົດຮຽນໃນການສ້າງ ແລະ ປັບປຸງເອກະສານອົບຮົມການເມືອງແນວຄິດ, ການຈັດຕັ້ງຝຶກອົບຮົມ, ການບໍາລຸງ-ກໍ່ສ້າງພະນັກງານ ແລະ ການຈັດຕັ້ງຜັນຂະຫຍາຍບັນດາມະຕິ, ຄໍາສັ່ງຕ່າງໆຂອງພັກ.
ການແລກປ່ຽນບົດຮຽນໃນຄັ້ງນີ້ ເປັນການປັບປຸງວຽກງານຂອງຕົນໃນໄລຍະໃໝ່ທັງເປັນການເສີມຂະຫຍາຍຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ລາວ-ຫວຽດນາມ ເວົ້າລວມ, ເວົ້າສະເພາະ ລະຫວ່າງຄະນະໂຄສະນາອົບຮົມສູນກາງພັກປະຊາຊົນປະຕິວັດລາວ ກັບຄະນະໂຄສະນາສຶກສາສູນກາງພັກກອມມູນນິດຫວຽດນາມ ກໍ່ຄື ກົມອົບຮົມກັບກົມທິດສະດີການເມືອງ ເພື່ອສ້າງການຫັນປ່ຽນໃຫ້ວຽກງານອົບຮົມໄປສູ່ຄຸນນະພາບໃໝ່ ຢ່າງແຂງແຮງ ແລະ ເລິກເຊິ່ງ.