ພິທີປາຖະກະຖາ “ວັນຊາດທີ 2 ທັນວາ ຄົບຮອບ49ປີ” ແລະ “ວັນເກີດ ປະທານ ໄກສອນ ພົມວິຫານ ຄົບຮອບ 104ປີ”
ໃນຕອນເຊົ້າວັນທີ 25 ພະຈິກ 2024 ທີ່ຫ້ອງປະຊຸມໃຫຍ່ ຄະນະໂຄສະນາອົບຮົມສູນກາງພັກໄດ້ຈັດພິທີປາຖະກະຖາ “ວັນຊາດທີ 2 ທັນວາ ຄົບຮອບ49ປີ” ແລະ “ວັນເກີດ ປະທານ ໄກສອນ ພົມວິຫານ ຄົບຮອບ 104ປີ” ໃຫ້ກຽດປາຖະກະຖາ ໂດຍ ສະຫາຍ ລາວປາວຊົ່ງ ນະວົງໄຊ ກຳມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກເຂົ້າຮ່ວມຮັບຟັງຫວນຄືນເລົ່າມູນ 2 ວັນປະຫວັດສາດໃນຄັ້ງນີ້ມີ: ຄະນະພັກ, ຮອງຫົວໜ້າ ຄອສພ, ຄະນະກົມ, ຄະນະພະແນກ ແລະ ວິຊາການຈຳນວນ 100 ປາຍກວ່າຄົນ.
ໃນພິທີດັ່ງກ່າວ ສະຫາຍ ລາວປາວຊົ່ງ ນະວົງໄຊ ກຳມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ໄດ້ຍົກໃຫ້ເຫັນເນື້ອໃນມູນເຊື້ອວັນຊາດ 2 ທັນວາ ແມ່ນວັນແຫ່ງໄຊຊະນະອັນຍິ່ງໃຫຍ່ ໃນຂະບວນການຕໍ່ສູ້ປົດປ່ອຍຊາດ; ແມ່ນວັນທີ່ປະຊາຊົນລາວບັນດາເຜົ່າໄດ້ມີອິດສະຫຼະພາບ, ມີອະທິປະໄຕຢ່າງຄົບຖ້ວນ ແລະ ເປັນເຈົ້າຂອງປະເທດຊາດຢ່າງແທ້ຈິງ.ຜົນງານທີ່ຍາດມາໄດ້ຕະຫຼອດໄລຍະ 49 ປີຜ່ານມານັ້ນແມ່ນໄດ້ມີຫຼາຍດ້ານໄດ້ຮັບການເຕີບໃຫຍ່ຂະຫຍາຍຕົວເວົ້າລວມສະເພາະທາງດ້ານການເມືອງ, ວັດທະນະທຳ, ເສດຖະກິດ-ສັງຄົມ, ການຮ່ວມມືກັບສາກົນ ແລະ ອຶ່ນໆເຊິ່ງໄດ້ມີບາດກ້າວຂະຫຍາຍຕົວດີຂື້ນເລື້ອຍໆ. ພ້ອມນັ້ນປະທານຍັງໄດ້ຍົກໃຫ້ເຫັນມູນເຊື້ອຜົນງານ ແລະ ຄຸນງາມຄວາມດີຂອງປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກຂອງປວງຊົນລາວ ເຊິ່ງເພິ່ນໄດ້ເຂົ້າຮ່ວມເຄື່ອນໄຫວການປະຕິວັດແຕ່ເຍົາໄວ ແລະ ໄດ້ຜ່ານການຝຶກຝົນທົດສອບໃນແປວໄຟປະຕິວັດຕົວຈິງ, ເປັນນັກປຸກລະດົມຂົນຂວາຍທີ່ເຕັມໄປດ້ວຍຄວາມເສຍສະຫຼະ, ເປັນນັກໂຄສະນາປາຖະກະຖາທີ່ດີເລີດ, ເປັນນັກຍຸດທະສາດທີ່ປີຊາສາມາດ ແລະ ເປັນແກ່ນສານແຫ່ງຄວາມສາມັກຄີພາຍໃນຊາດ ຍາມໃດເພີ່ນກໍ່ເອົາໃຈໃສ່ສ້າງ, ຄວາມສາມັກຄີປອງດອງລະຫວ່າງປະຊາຊົນບັນດາເຜົ່າ ແລະ ຮັບຜິດຊອບວຽກງານແຕ່ນ້ອຍຫາໃຫຍ່ກ້າວຂຶ້ນເປັນຜູ້ນຳສູງສຸດຂອງພັກ. ປັດຈຸບັນພັກປະຊາຊົນປະຕິວັດລາວໄດ້ຖືເອົາແນວຄິດປະທານ ໄກສອນ ພົມວິຫານ ເປັນແນວຄິດຊີ້ນຳຂອງພັກ.
