ພົບປະສອງຝ່າຍ ລະຫວ່າງສະພາທິດສະດີສູນກາງພັກປະຊາຊົນປະຕິວັດລາວ ແລະສະພາທິດສະດີສູນກາງພັກກອມມູນິດຫວຽດນາມ
ໃນໂອກາດມາຮ່ວມກອງປະຊຸມສໍາມະນາທິດສະດີ ຄັ້ງທີ XI ລະຫວ່າງພັກປະຊາຊົນປະຕິວັດລາວ ແລະ ພັກກອມມູນິດຫວຽດນາມ ຄະນະຜູ້ແທນຂັ້ນສູງພັກກອມມູນິດຫວຽດນາມ ນຳໂດຍ ສະຫາຍ ສຈ ປອ ຫງວຽນ ຊວນ ຖັງ, ກຳມະ ການກົມການເມືອງສູນກາງພັກ, ຫົວໜ້າສະຖາບັນການເມືອງແຫ່ງຊາດ ໂຮ່ຈິມິນ, ປະທານສະພາທິດສະດີສູນກາງພັກ ພ້ອມດ້ວຍຄະນະໄດ້ເຂົ້າພົບປະແລກປ່ຽນສອງຝ່າຍຮ່ວມກັບການນຳຂັ້ນສູງ ຂອງສະພາທິດສະດີສູນກາງພັກປະຊາຊົນປະຕິວັດລາວ ນຳໂດຍ ສະຫາຍ ປອ. ຄຳພັນ ເຜີຍຍະວົງ, ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກປະຊາຊົນປະຕິວັດລາວ ພ້ອມດ້ວຍຄະນະໃນຕອນບ່າຍຂອງວັນທີ 26 ພະຈິກ 2024; ເວລາ: 14:00ໂມງ; ທີ່ຫ້ອງຊຸມ ຂອງໂຮງແຮມເມືອງແທ໋ງ, ນະຄອນຫຼວງວຽງຈັນ.
ການພົບປະສອງຝ່າຍໃນຄັ້ງນີ້ ເພື່ອແລກປ່ຽນບົດຮຽນກ່ຽວກັບການຮ່ວມມືໃນໄລຍະຜ່ານມາ ກໍຄືການຈັດຕັ້ງປະຕິບັດບົດບັນທຶກການຮ່ວມມື ລະຫວ່າງ ສອງສະພາທິດສະດີສູນກາງພັກ ເຊິ່ງເຫັນວ່າ ມີຜົນສຳເລັດໃນຫຼາຍດ້ານ ໂດຍສະເພາະການຈັດຕັ້ງຜັດປ່ຽນກັນເປັນເຈົ້າພາບໃນການດຳເນີນກອງປະຊຸມສອງພັກ ລາວ-ຫວຽດນາມ, ການແລກປ່ຽນບົດຮຽນດ້ານທິດສະດີ ແລະພຶດຕິກຳກ່ຽວກັບບັນຫາຕ່າງໆທີ່ໄດ້ກາຍເປັນການຕອບສະໜອງໃຫ້ແກ່ການປັບປຸງບູລະນະແນວທາງນະໂຍບາຍ ຂອງສອງພັກ ນອກຈາກນັ້ນ ການແລກປ່ຽນດ້ານຂໍ້ມູນ-ຂ່າວສານ ແລະການແລກປ່ຽນຄະນະຜູ້ແທນຂັ້ນສູງ ແລະຂັ້ນວິຊາການຂອງສອງຝ່າຍ ກໍໄດ້ປະຕິບັດຕາມແຜນ.
ສະນັ້ນ, ເພື່ອສືບຕໍ່ຈັດຕັ້ງຜັນຂະຫຍາຍບົດບັນທຶກການຮ່ວມມື ລະຫວ່າງ ສອງສະພາທິດສະດີສູນກາງພັກລາວ-ຫວຽດນາມ ໄລຍະນີ້ເຖິງປີ 2026, ສະຫາຍປະທານສະພາທິດສະດີສູນກາງພັກປະຊາຊົນປະຕິວັດລາວ ໄດ້ເນັ້ນໜັກບາງບັນຫາດັ່ງນີ້:
1). ສືບຕໍ່ປະຕິບັດບົດບັນທຶກການຮ່ວມມື ສອງສະພາທິດສະດີສູນກາງພັກ ທີ່ໄດ້ລົງນາມ ໂດຍສະເພາະແຜນການຮ່ວມມື ປີ 2025-2026 ແລະເຫັນວ່າ ສອງຝ່າຍ ຄວນມີແຜນການອັນລະອຽດເພີ່ມເຕີມໃນແຕ່ລະປີ ເພື່ອເຮັດໃຫ້ການຈັດຕັ້ງປະຕິບັດເນື້ອໃນບົດບັນທຶກການຮ່ວມມືໃນແຕ່ລະວຽກງານໄດ້ສຳເລັດຜົນຕາມລະດັບຄາດໝາຍ.
2). ສືບຕໍ່ການພົວພັນຮ່ວມມື; ການແລກປ່ຽນບົດຮຽນ ແລະການປະສານສົມທົບໃນການ ຈັດຕັ້ງການຄົ້ນຄວ້າທາງດ້ານທິດສະດີ ແລະພຶດຕິກຳ ໂດຍຕິດພັນເນື້ອໃນກອງປະຊຸມໃຫຍ່ ຂອງ ສອງພັກ ໂດຍສະເພາະບັນດາຫົວຂໍ້ລົງເລິກທາງດ້ານທິດສະດີ-ພຶດຕິກຳແຫ່ງການນຳພາ ຂອງສອງພັກ, ພ້ອມນັ້ນ ກໍສືບຕໍ່ແລກປ່ຽນບົດຮຽນກ່ຽວກັບການສ້າງໂຄງການການເມືອງ, ການສະຫຼຸບ 40 ປີ ແຫ່ງການປ່ຽນແປງໃໝ່ ຢູ່ ສປປ ລາວ.
3). ຄວນປັບປຸງກົນໄກການປະສານງານ ລະຫວ່າງ ສອງສະພາທິດສະດີສູນກາງພັກລາວ-ຫວຽດນາມ ເພື່ອສືບຕໍ່ເຮັດໃຫ້ການພົບປະ ແລະເຮັດວຽກຮ່ວມກັນໄດ້ເຂົ້າສູ່ລະບົບ ໃນນັ້ນ ຄວນຄົ້ນຄວ້າດ້ານຄວາມເປັນໄປໄດ້ໃນການພົວພັນປະສານງານໂດຍກົງ ຂອງສອງສະພາທິດສະດີສູນກາງພັກໃຫ້ກາຍເປັນກົນໄກໜຶ່ງໃນການເຮັດໃຫ້ການເຮັດວຽກຂອງສອງສະພາທິດສະດີສູນກາງພັກໄດ້ວ່ອງໄວ ແລະທັນສະພາບການ. ສຳລັບບັນຫາທີ່ລັກສະນະເປັນຫຼັກການ, ເປັນບັນຫາໃຫຍ່ແມ່ນປະສານງານຜ່ານຄະນະພົວພັນຕ່າງປະເທດ ຂອງສອງພັກ.
4). ສືບຕໍ່ເສີມຂະຫຍາຍການພົວພັນແລກປ່ຽນ ແລະການຕອບສະໜອງຂໍ້ມູນ-ຂ່າວສານທາງດ້ານວິທະຍາສາດ, ທາງດ້ານທິດສະດີ ແລະພຶດຕິກຳ ຂອງສອງພັກ, ສອງລັດ ໃຫ້ເປັນປົກກະຕິ ໂດຍສະເພາະບັນດາບັນຫາໃໝ່ທີ່ພົ້ນເດັ່ນໃນປັດຈຸບັນ ເພື່ອສະໜອງຂໍ້ມູນໃຫ້ແກ່ການປັບປຸງບູລະນະແນວທາງ ຂອງສອງພັກ, ສອງລັດຖະບານ.
5). ສືບຕໍ່ເສີມຂະຫຍາຍການຮ່ວມມືດ້ານວຽກງານກໍ່ສ້າງພະນັກງານ-ນັກຄົ້ນຄວ້າ ຂອງສອງສະພາທິດສະດີສູນກາງພັກ, ການສ້າງນັກຊ່ຽວຊານ ໃນນັ້ນ ສະເໜີໃຫ້ສະພາທິດສະດີສູນກາງພັກກອມມູນິດຫວຽດນາມຊ່ວຍເຫຼືອໃນການສ້າງພະນັກງານ ຂອງສະພາທິດສະດີສູນກາງພັກປະຊາຊົນປະຕິວັດລາວ, ການຕອບສະໜອງນັກຊ່ຽວຊານ ຂອງຝ່າຍຫວຽດນາມ ເພື່ອມາແລກປ່ຽນຖ່າຍທອດບົດຮຽນໃຫ້ແກ່ພະນັກງານຝ່າຍລາວ.
ໃນໂອກາດນີ້, ສະຫາຍ ປອ. ຄຳພັນ ເຜີຍຍະວົງ, ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກປະຊາຊົນປະຕິວັດລາວ ໄດ້ຕີລາຄາສູງຕໍ່ການພົບປະ ແລະຕ້ອນຮັບຄະນະຜູ້ແທນການນຳຂັ້ນສູງຈາກຝ່າຍ ສສ. ຫວຽດນາມ, ພ້ອມທັງຊົມເຊີຍບັນດາກົນໄກຂອງການຮ່ວມມືທີ່ມີປະສິດທິພາບ ແລະປະສິດທິຜົນລະຫວ່າງ ພັກປະຊາຊົນປະຕິວັດລາວ ແລະພັກກອມມູນິດຫວຽດນາມ ທາງດ້ານທິດສະດີ ແລະພຶດຕິກໍາຕົວຈິງທີ່ໄດ້ຮ່ວມມືກັນຄົ້ນຄວ້າໃນໄລຍະຜ່ານມາ, ເພື່ອເປັນການແລກປ່ຽນບົດຮຽນ, ເພີ່ມທະວີຄວາມເຂົ້າອົກເຂົ້າໃຈ, ປະກອບສ່ວນເຂົ້າໃນການຮັດແໜ້ນ ແລະ ເພີ່ມທະວີສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ກ້າວເຂົ້າສູ່ລວງເລິກໃນທຸກຂົງເຂດວຽກງານ.
ກອງປະຊຸມພົບປະສອງຝ່າຍ ລະຫວ່າງຄະນະຜູ້ແທນການນຳຂັ້ນສູງ ສອງສະພາທິດສະດີສູນກາງພັກປະຊາຊົນປະຕິວັດລາວ ແລະສະພາທິດສະດີສູນກາງພັກກອມມູນິດຫວຽດນາມໄດ້ປິດລົງໃນເວລາ 03:30 ໂມງ ຂອງວັນດຽວກັນດ້ວຍຜົນສຳເລັດອັນຈົບງາມ.
ແຫຼ່ງຂ່າວ: ພະແນກຄຸ້ມຄອງວິຊາການ ແລະ ການຄົ້ນຄວ້າ (ຫ້ອງສະພາທິດສະດີສູນກາງພັກ)
