ບົດຮຽນ “ການທູດໄມ້ໄຜ“ ຂອງສສ ຫວຽດນາມ
ໃນຕອນເຊົ້າວັນທີ 24 ທັນວາ 2024ໄດ້ຈັດພິທີປາຖະກະຖາບົດຮຽນ“ການທູດໄມ້ໄຜ່“ ຂອງສສ ຫວຽດນາມ ທີ່ຫ້ອງປະຊຸມໃຫຍ່ຄະນະໂຄສະນາອົບຮົມສູນກາງພັກ ໃຫ້ກຽດປາຖະກະຖາໂດຍ ສະຫາຍ ຟານ ແອັງເຊີນ ປະທານສະຫະພັນບັນດາອົງການຈັດຕັ້ງມິດຕະພາບຫວຽດນາມ ພ້ອມນັ້ນກໍມີ:ບັນດາຄະນະພັກ, ຄະນະນຳຂອງຄະນະໂຄສະນາອົບຮົມສູນກາງພັກ, ຄະນະພົວພັນການຕ່າງປະເທດສູນກາງພັກ, ບັນດາກະຊວງອົງການ, ອ້ອມຂ້າງສູນກາງ ແລະ ນະຄອນຫຼວງເຂົ້າຮ່ວມປະມານ 200 ກວ່າຄົນ.
ໃນພິທີດັ່ງກ່າວສະຫາຍ ຟານ ແອັງເຊີນ ປະທານສະຫະພັນບັນດາອົງການຈັດຕັ້ງມິດຕະພາບຫວຽດນາມ ໃຫ້ກຽດຂື້ນເຜີຍແຜ່ ແນວທາງ “ການທູດໄມ້ໄຜ່“ ຂອງຫວຽດນາມ ແລະ ບັນດາແນວຄິດ ຊີ້ນຳນີ້ແມ່ນເຂັມຊີ້ທິດໃຫ້ຂະແໜງການທູດ ຫວຽດນາມ ສ້າງພື້ນຖານການທູດຢ່າງຮອບດ້ານ, ທັນສະໄໝ, ໝັ້ນຄົງເຂັ້ມແຂງ.
ສສ ຫວຽດນາມຍາມໃດກໍ່ຢືດໝັ້ນໃນຫຼັກການ ແລະ ມີໄຫວພິບໃນຍຸດໂທບາຍ, ໂດຍຖືເອົາຫຼັກການເອກະລາດຊົນຊາດ ແລະ ສັງຄົມນິຍົມ; ຖືເອົາຍຸດໂທບາຍ ເຄື່ອນທີ່ມີໄຫວພິບ, ດັດປັບຕາມແຕ່ລະບັນຫາ, ຈຸດເວລາ ແລະ ຕາມແຕ່ລະເປົ້າໝາຍ ຫຼື ຄູ່ຮ່ວມມື, ດັ່ງການຊີ້ນຳວຽກງານການຕ່າງປະເທດຂອງປະທານ ໂຮ່ຈີມິນໄດ້ເວົ້າວ່າ: “ເພີ່ມເພື່ອນ ຫຼຸດຜ່ອນສັດຕູ“. ສະນັ້ນ ສສ ຫວຽດນາມພ້ອມແລ້ວທີ່ຈະເປັນເພື່ອນມິດກັບທຸກໆປະເທດປະຊາທິປະໄຕ ແລະ ບໍ່ກໍ່ຄວາມ ອາດຄາດບາດໝາງກັບຜູ້ໃດ”. ຫວຽດນາມ ພ້ອມແລ້ວທີ່ຈະເປັນເພື່ອນ, ເປັນຄູ່ຮ່ວມມືທີ່ໄວ້ເນື້ອເຊື່ອໃຈ ແລະ ມີຄວາມຮັບຜິດຊອບກັບທຸກໆປະເທດໃນປະຊາຄົມສາກົນ ເວົ້າລວມ ເວົ້າສະເພາະກໍຄືສາຍພົວພັນອັນພິເສດອ້າຍນ້ອງລາວ-ຫວຽດນາມ. ສສ ຫວຽດນາມສະໜັບສະໜູນແນວທາງການຕ່າງປະເທດທີ່ຖືກຕ້ອງ, ຄືກັບເຊີດຊູຄັນທຸງແຫ່ງຄວາມເປັນທຳ ແລະ ການຜັນຂະຫຍາຍປະຕິບັດບັນດານະໂຍບາຍອັນລະອຽດຢ່າງມີປະສິດທິຜົນ ເພື່ອສ້າງຄວາມສາມັກຄີປອງດອງທົ່ວປວງຊົນທັງຊາດ ແລະ ເພື່ອນມິດສາກົນ. ຫຼັງຈາກນັ້ນ ຍັງໄດ້ມີການແລກປ່ຽນບົດຮຽນ ຖາມ-ຕອບ ເຈາະຈິ້ມຢ່າງກົງໄປກົງມາທາງດ້ານທິດສະດີ ແລະ ພາກປະຕິບັດຕົວຈິງ, ບັນດາຂໍ້ມູນຂ່າວສານ ແລະ ໂຄສະນາເຜີຍແຜ່; ເພີ່ມທະວີສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລາວ – ຫວຽດນາມໃນອະນາຄົດ.
ໃນທ້າຍຂອງພິທີປາຖະກະຖານີ້ສະຫາຍວິລະວອນ ພັນທະວົງ ຄະນະປະຈຳພັກ, ຮອງຫົວໜ້າຄະນະໂຄສະນາອົບຮົມສູນກາງພັກມີຄຳເຫັນ ແລະ ກ່າວຄຳຂອບໃຈຕໍ່ສະຫາຍຟານ ແອັງເຊີນ ປະທານສະຫະພັນບັນດາອົງການຈັດຕັ້ງມິດຕະພາບຫວຽດນາມ ທີ່ໄດ້ໃຫ້ກຽດມາເຜີຍແຜ່ບົດຮຽນ“ການທູດໄມ້ໄຜ່“ ຂອງສສ ຫວຽດນາມ ເພື່ດເປັນການເສີມຂະຫຍາຍສາຍພົວພັນແບບພິເສດຂອງສອງພັກສອງລັດລາວ-ຫວຽດນາມ ຫວຽດນາມ-ລາວ.
