ການແຂ່ງຂັນກິລາເຕະບານ ຊິງຂັນສະຫາຍເລຂາຄະນະບໍລິຫານງານ ສູນກາງຊາວໜຸ່ມປະຊາຊົນ ປະຕິວັດລາວ Lao Youth Union Cup ປະຈຳປີ 2024
ໃນວັນທີ 15 ມັງກອນ 2025 ຜ່ານມານີ້, ທີມບານເຕະຊາວໜຸ່ມ ຄະນະໂຄສະນາອົບຮົມສູນກາງພັກ ເຂົ້າຮ່ວມການແຂ່ງຂັນກິລາເຕະບານ ຊິງຂັນສະຫາຍເລຂາຄະນະບໍລິຫານງານ ສູນກາງຊາວໜຸ່ມປະຊາຊົນ ປະຕິວັດລາວ Lao Youth Union Cup ປະຈຳປີ 2024, ຢູ່ເດີ່ນບານ ລ້ານຊ້າງສະເຕດຽມ (ໜອງໄຮ).
ການແຂ່ງຂັນຄັ້ງນີ້ ແມ່ນເພື່ອເປັນການສ້າງຂະບວນການຂໍ່ານັບຮັບຕ້ອນ 3 ວັນປະຫວັດສາດຂອງຊາດຂອງພັກຄື: ວັນສ້າງຕັ້ງພັກປະຊາຊົນປະຕິວັດລາວຄົບຮອບ 70 ປີ, ວັນຊາດທີ 2 ທັນວາ ຄົບຮອບ 50 ປີ ແລະ ວັນເກີດປະທານ ໄກສອນ ພົມວິຫານ ຄົບຮອບ 105 ປີ, ພ້ອມນັ້ນ ກໍເປັນການສ້າງຂະບວນການຕ້ອນຮັບວັນສ້າງຕັ້ງຄະນະຊາວໜຸ່ມປະຊາຊົນ ປະຕິວັດລາວຄົບຮອບ 70 ປີ; ຜັນຂະຫຍາຍວາລະແຫ່ງຊາດ ໃນການຕ້ານ ແລະ ສະກັດກັ້ນບັນຫາຢາເສບຕິດ ເຊິ່ງເປັນການປູກຈິດສໍານຶກໃຫ້ຊາວໜຸ່ມ ເຍົາວະຊົນຫັນມາຫລິ້ນກິລາ ແລະ ຫ່າງໄກຈາກຢາເສບຕິດ; ພ້ອມດຽວກັນນັ້ນ ກໍເປັນການເຕົ້າໂຮມຄວາມສາມັກຄີ ລະຫວ່າງຄະນະຊາວໜຸ່ມ ບັນດາອົງການ, ກະຊວງ, ນະຄອນຫລວງວຽງຈັນເຊິ່ງມີຄະນະກິລາຊາວໜຸ່ມຈາກບັນດາກະຊວງອົງການ ແລະ ຊາວໜຸ່ມນະຄອນຫລວງ ເຂົ້າຮ່ວມ ຈຳນວນ 24 ທີມ. ໃນນັ້ນ, ແບ່ງອອກເປັນ 4 ສາຍ, ສາຍລະ 6 ທີມ.
ສຳລັບຜົນຂອງການແຂ່ງຂັນຂອງທີມຊາວໜຸ່ມ ຄອສພເຮັດໄດ້ພຽງຮອບທຳອິດເທົ່ານັ້ນຢ່າງໜ້າເສຍດາຍແຕ່ກໍສ້າງປະສົບການ ແລະ ບົດຮຽນຈຳນວນບໍ່ໜ້ອຍເພື່ອກຽມພ້ອມເຂົ້າຮ່ວມໃນໂອກາດໜ້າ.
